{"id":"an3.141","title":"Excellent Horses","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an3.141","title":"Excellent Horses","units":[{"id":"an3.141:0","sourceIds":["an3.141:0.1","an3.141:0.2","an3.141:0.3"],"kind":"text","text":{"pi":"Aṅguttara Nikāya 3.141\n14. Yodhājīvavagga\nAssaparassasutta","en":"Numbered Discourses 3.141\n14. A Warrior\nExcellent Horses"}},{"id":"an3.141:1","sourceIds":["an3.141:1.1","an3.141:1.2","an3.141:1.3","an3.141:1.4"],"kind":"text","text":{"pi":"“Tayo ca, bhikkhave, assaparasse desessāmi tayo ca purisaparasse.\nTaṁ suṇātha, sādhukaṁ manasi karotha, bhāsissāmī”ti.\n“Evaṁ, bhante”ti kho te bhikkhū bhagavato paccassosuṁ.\nBhagavā etadavoca:","en":"“Mendicants, I will teach you the three excellent horses and the three excellent people.\nListen and apply your mind well, I will speak.”\n“Yes, sir,” they replied.\nThe Buddha said this:"}},{"id":"an3.141:2","sourceIds":["an3.141:2.1","an3.141:2.2","an3.141:2.3","an3.141:2.4","an3.141:2.5"],"kind":"text","text":{"pi":"“Katame ca, bhikkhave, tayo assaparassā?\nIdha, bhikkhave, ekacco assaparasso javasampanno hoti; na vaṇṇasampanno na ārohapariṇāhasampanno.\nIdha pana, bhikkhave, ekacco assaparasso javasampanno hoti vaṇṇasampanno ca; na ārohapariṇāhasampanno.\nIdha pana, bhikkhave, ekacco assaparasso javasampanno ca hoti vaṇṇasampanno ca ārohapariṇāhasampanno ca.\nIme kho, bhikkhave, tayo assaparassā.","en":"“What are the three excellent horses?\nOne excellent horse is fast, but not beautiful or well proportioned.\nAnother excellent horse is fast and beautiful, but not well proportioned.\nWhile another excellent horse is fast, beautiful, and well proportioned.\nThese are the three excellent horses."}},{"id":"an3.141:3","sourceIds":["an3.141:3.1","an3.141:3.2","an3.141:3.3","an3.141:3.4"],"kind":"text","text":{"pi":"Katame ca, bhikkhave, tayo purisaparassā?\nIdha, bhikkhave, ekacco purisaparasso javasampanno hoti; na vaṇṇasampanno na ārohapariṇāhasampanno.\nIdha pana, bhikkhave, ekacco purisaparasso javasampanno ca hoti vaṇṇasampanno ca; na ārohapariṇāhasampanno.\nIdha pana, bhikkhave, ekacco purisaparasso javasampanno ca hoti vaṇṇasampanno ca ārohapariṇāhasampanno ca.","en":"What are the three excellent people?\nOne excellent person is fast, but not beautiful or well proportioned.\nAnother excellent person is fast and beautiful, but not well proportioned.\nWhile another excellent person is fast, beautiful, and well proportioned."}},{"id":"an3.141:4","sourceIds":["an3.141:4.1","an3.141:4.2","an3.141:4.3","an3.141:4.4","an3.141:4.5","an3.141:4.6","an3.141:4.7","an3.141:4.8"],"kind":"text","text":{"pi":"Kathañca, bhikkhave, purisaparasso javasampanno hoti; na vaṇṇasampanno, na ārohapariṇāhasampanno?\nIdha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.\nIdamassa javasmiṁ vadāmi.\nAbhidhamme kho pana abhivinaye pañhaṁ puṭṭho saṁsādeti, no vissajjeti.\nIdamassa na vaṇṇasmiṁ vadāmi.\nNa kho pana lābhī hoti cīvarapiṇḍapātasenāsanagilānappaccayabhesajjaparikkhārānaṁ.\nIdamassa na ārohapariṇāhasmiṁ vadāmi. Evaṁ kho, bhikkhave, purisaparasso javasampanno hoti;\nna vaṇṇasampanno, na ārohapariṇāhasampanno.","en":"And how is an excellent person fast, but not beautiful or well proportioned?\nIt’s when a mendicant, with the ending of the five lower fetters, is reborn spontaneously. They’re extinguished there, and are not liable to return from that world.\nThis is how they’re fast, I say.\nBut when asked a question about the teaching or training, they falter without answering.\nThis is how they’re not beautiful, I say.\nAnd they don’t receive robes, almsfood, lodgings, and medicines and supplies for the sick.\nThis is how they’re not well proportioned, I say. This is how an excellent person is fast,\nbut not beautiful or well proportioned."}},{"id":"an3.141:5","sourceIds":["an3.141:5.1","an3.141:5.2","an3.141:5.3","an3.141:5.4","an3.141:5.5","an3.141:5.6","an3.141:5.7","an3.141:5.8"],"kind":"text","text":{"pi":"Kathañca, bhikkhave, purisaparasso javasampanno ca hoti vaṇṇasampanno ca, na ārohapariṇāhasampanno?\nIdha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.\nIdamassa javasmiṁ vadāmi.\nAbhidhamme kho pana abhivinaye pañhaṁ puṭṭho vissajjeti, no saṁsādeti.\nIdamassa vaṇṇasmiṁ vadāmi.\nNa kho pana lābhī hoti cīvarapiṇḍapātasenāsanagilānappaccayabhesajjaparikkhārānaṁ.\nIdamassa na ārohapariṇāhasmiṁ vadāmi.\nEvaṁ kho, bhikkhave, purisaparasso javasampanno ca hoti; vaṇṇasampanno ca, na ārohapariṇāhasampanno.","en":"And how is an excellent person fast and beautiful, but not well proportioned?\nIt’s when a mendicant, with the ending of the five lower fetters, is reborn spontaneously. They’re extinguished there, and are not liable to return from that world.\nThis is how they’re fast, I say.\nWhen asked a question about the teaching or training, they answer without faltering.\nThis is how they’re beautiful, I say.\nBut they don’t receive robes, almsfood, lodgings, and medicines and supplies for the sick.\nThis is how they’re not well proportioned, I say.\nThis is how an excellent person is fast and beautiful, but not well proportioned."}},{"id":"an3.141:6","sourceIds":["an3.141:6.1","an3.141:6.2","an3.141:6.3","an3.141:6.4","an3.141:6.5","an3.141:6.6","an3.141:6.7","an3.141:6.8","an3.141:6.9","an3.141:6.10"],"kind":"text","text":{"pi":"Kathañca, bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca?\nIdha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.\nIdamassa javasmiṁ vadāmi.\nAbhidhamme kho pana abhivinaye pañhaṁ puṭṭho vissajjeti, no saṁsādeti.\nIdamassa vaṇṇasmiṁ vadāmi.\nLābhī kho pana hoti cīvarapiṇḍapātasenāsanagilānappaccayabhesajjaparikkhārānaṁ.\nIdamassa ārohapariṇāhasmiṁ vadāmi.\nEvaṁ kho, bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca.\nIme kho, bhikkhave, tayo purisaparassā”ti.\nNavamaṁ.","en":"And how is an excellent person fast, beautiful, and well proportioned?\nIt’s when a mendicant, with the ending of the five lower fetters, is reborn spontaneously. They’re extinguished there, and are not liable to return from that world.\nThis is how they’re fast, I say.\nWhen asked a question about the teaching or training, they answer without faltering.\nThis is how they’re beautiful, I say.\nThey receive robes, almsfood, lodgings, and medicines and supplies for the sick.\nThis is how they’re well proportioned, I say.\nThis is how an excellent person is fast, beautiful, and well proportioned.\nThese are the three excellent people.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an3.141/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}