{"id":"an5.57","title":"Subjects for Regular Reviewing","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an5.57","title":"Subjects for Regular Reviewing","units":[{"id":"an5.57:0","sourceIds":["an5.57:0.1","an5.57:0.2","an5.57:0.3"],"kind":"text","text":{"pi":"Aṅguttara Nikāya 5.57\n6. Nīvaraṇavagga\nAbhiṇhapaccavekkhitabbaṭhānasutta","en":"Numbered Discourses 5.57\n6. Hindrances\nSubjects for Regular Reviewing"}},{"id":"an5.57:1","sourceIds":["an5.57:1.1","an5.57:1.2","an5.57:1.3","an5.57:1.4","an5.57:1.5","an5.57:1.6","an5.57:1.7","an5.57:1.8","an5.57:1.9"],"kind":"text","text":{"pi":"“Pañcimāni, bhikkhave, ṭhānāni abhiṇhaṁ paccavekkhitabbāni itthiyā vā purisena vā gahaṭṭhena vā pabbajitena vā.\nKatamāni pañca?\n‘Jarādhammomhi, jaraṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.\n‘Byādhidhammomhi, byādhiṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.\n‘Maraṇadhammomhi, maraṇaṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.\n‘Sabbehi me piyehi manāpehi nānābhāvo vinābhāvo’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.\n‘Kammassakomhi, kammadāyādo kammayoni kammabandhu kammapaṭisaraṇo.\nYaṁ kammaṁ karissāmi—kalyāṇaṁ vā pāpakaṁ vā—\ntassa dāyādo bhavissāmī’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.","en":"“Mendicants, a woman or a man, a layperson or a renunciate should often review these five subjects.\nWhat five?\n‘I am liable to grow old, I am not exempt from old age.’ A woman or a man, a layperson or a renunciate should often review this.\n‘I am liable to get sick, I am not exempt from sickness.’ …\n‘I am liable to die, I am not exempt from death.’ …\n‘I must be parted and separated from all I hold dear and beloved.’ …\n‘I am the owner of my deeds and heir to my deeds. Deeds are my womb, my relative, and my refuge.\nI shall be the heir of whatever deeds I do, whether good or bad.’\nA woman or a man, a layperson or a renunciate should often review this."}},{"id":"an5.57:2","sourceIds":["an5.57:2.1","an5.57:2.2","an5.57:2.3","an5.57:2.4"],"kind":"text","text":{"pi":"Kiñca, bhikkhave, atthavasaṁ paṭicca ‘jarādhammomhi, jaraṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?\nAtthi, bhikkhave, sattānaṁ yobbane yobbanamado, yena madena mattā kāyena duccaritaṁ caranti, vācāya duccaritaṁ caranti, manasā duccaritaṁ caranti.\nTassa taṁ ṭhānaṁ abhiṇhaṁ paccavekkhato yo yobbane yobbanamado so sabbaso vā pahīyati tanu vā pana hoti.\nIdaṁ kho, bhikkhave, atthavasaṁ paṭicca ‘jarādhammomhi, jaraṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.","en":"What is the advantage for a woman or a man, a layperson or a renunciate of often reviewing this: ‘I am liable to grow old, I am not exempt from old age’?\nThere are sentient beings who, intoxicated with the vanity of youth, do bad things by way of body, speech, and mind.\nReviewing this subject often, they entirely give up the vanity of youth, or at least reduce it.\nThis is the advantage for a woman or a man, a layperson or a renunciate of often reviewing this: ‘I am liable to grow old, I am not exempt from old age’."}},{"id":"an5.57:3","sourceIds":["an5.57:3.1","an5.57:3.2","an5.57:3.3","an5.57:3.4"],"kind":"text","text":{"pi":"Kiñca, bhikkhave, atthavasaṁ paṭicca ‘byādhidhammomhi, byādhiṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?\nAtthi, bhikkhave, sattānaṁ ārogye ārogyamado, yena madena mattā kāyena duccaritaṁ caranti, vācāya duccaritaṁ caranti, manasā duccaritaṁ caranti.\nTassa taṁ ṭhānaṁ abhiṇhaṁ paccavekkhato yo ārogye ārogyamado so sabbaso vā pahīyati tanu vā pana hoti.\nIdaṁ kho, bhikkhave, atthavasaṁ paṭicca ‘byādhidhammomhi, byādhiṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.","en":"What is the advantage of often reviewing this: ‘I am liable to get sick, I am not exempt from sickness’?\nThere are sentient beings who, drunk on the vanity of health, do bad things by way of body, speech, and mind.\nReviewing this subject often, they entirely give up the vanity of health, or at least reduce it.\nThis is the advantage of often reviewing this: ‘I am liable to get sick, I am not exempt from sickness’."}},{"id":"an5.57:4","sourceIds":["an5.57:4.1","an5.57:4.2","an5.57:4.3","an5.57:4.4"],"kind":"text","text":{"pi":"Kiñca, bhikkhave, atthavasaṁ paṭicca ‘maraṇadhammomhi, maraṇaṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?\nAtthi, bhikkhave, sattānaṁ jīvite jīvitamado, yena madena mattā kāyena duccaritaṁ caranti, vācāya duccaritaṁ caranti, manasā duccaritaṁ caranti.\nTassa taṁ ṭhānaṁ abhiṇhaṁ paccavekkhato yo jīvite jīvitamado so sabbaso vā pahīyati tanu vā pana hoti.\nIdaṁ kho, bhikkhave, atthavasaṁ paṭicca ‘maraṇadhammomhi, maraṇaṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.","en":"What is the advantage of often reviewing this: ‘I am liable to die, I am not exempt from death’?\nThere are sentient beings who, drunk on the vanity of life, do bad things by way of body, speech, and mind.\nReviewing this subject often, they entirely give up the vanity of life, or at least reduce it.\nThis is the advantage of often reviewing this: ‘I am liable to die, I am not exempt from death’."}},{"id":"an5.57:5","sourceIds":["an5.57:5.1","an5.57:5.2","an5.57:5.3","an5.57:5.4"],"kind":"text","text":{"pi":"Kiñca, bhikkhave, atthavasaṁ paṭicca ‘sabbehi me piyehi manāpehi nānābhāvo vinābhāvo’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?\nAtthi, bhikkhave, sattānaṁ piyesu manāpesu yo chandarāgo yena rāgena rattā kāyena duccaritaṁ caranti, vācāya duccaritaṁ caranti, manasā duccaritaṁ caranti.\nTassa taṁ ṭhānaṁ abhiṇhaṁ paccavekkhato yo piyesu manāpesu chandarāgo so sabbaso vā pahīyati tanu vā pana hoti.\nIdaṁ kho, bhikkhave, atthavasaṁ paṭicca ‘sabbehi me piyehi manāpehi nānābhāvo vinābhāvo’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.","en":"What is the advantage of often reviewing this: ‘I must be parted and separated from all I hold dear and beloved’?\nThere are sentient beings who, aroused by desire and lust for their dear and beloved, do bad things by way of body, speech, and mind.\nReviewing this subject often, they entirely give up desire and lust for their dear and beloved, or at least reduce it.\nThis is the advantage of often reviewing this: ‘I must be parted and separated from all I hold dear and beloved’."}},{"id":"an5.57:6","sourceIds":["an5.57:6.1","an5.57:6.2","an5.57:6.3","an5.57:6.4","an5.57:6.5","an5.57:6.6","an5.57:6.7"],"kind":"text","text":{"pi":"Kiñca, bhikkhave, atthavasaṁ paṭicca ‘kammassakomhi, kammadāyādo kammayoni kammabandhu kammapaṭisaraṇo, yaṁ kammaṁ karissāmi—\nkalyāṇaṁ vā pāpakaṁ vā—tassa dāyādo bhavissāmī’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?\nAtthi, bhikkhave, sattānaṁ kāyaduccaritaṁ vacīduccaritaṁ manoduccaritaṁ.\nTassa taṁ ṭhānaṁ abhiṇhaṁ paccavekkhato sabbaso vā duccaritaṁ pahīyati tanu vā pana hoti.\nIdaṁ kho, bhikkhave, atthavasaṁ paṭicca ‘kammassakomhi, kammadāyādo kammayoni kammabandhu kammapaṭisaraṇo, yaṁ kammaṁ karissāmi—\nkalyāṇaṁ vā pāpakaṁ vā—\ntassa dāyādo bhavissāmī’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.","en":"What is the advantage of often reviewing like this: ‘I am the owner of my deeds and heir to my deeds. Deeds are my womb, my relative, and my refuge.\nI shall be the heir of whatever deeds I do, whether good or bad’?\nThere are sentient beings who do bad things by way of body, speech, and mind.\nReviewing this subject often, they entirely give up bad conduct, or at least reduce it.\nThis is the advantage for a woman or a man, a layperson or a renunciate of often reviewing like this: ‘I am the owner of my deeds and heir to my deeds. Deeds are my womb, my relative, and my refuge.\nI shall be the heir of whatever deeds I do, whether good or bad.’"}},{"id":"an5.57:7","sourceIds":["an5.57:7.1","an5.57:7.2","an5.57:7.3","an5.57:7.4","an5.57:7.5"],"kind":"text","text":{"pi":"Sa kho so, bhikkhave, ariyasāvako iti paṭisañcikkhati:\n‘na kho ahaññeveko jarādhammo jaraṁ anatīto, atha kho yāvatā sattānaṁ āgati gati cuti upapatti sabbe sattā jarādhammā jaraṁ anatītā’ti.\nTassa taṁ ṭhānaṁ abhiṇhaṁ paccavekkhato maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saṁyojanāni sabbaso pahīyanti anusayā byantīhonti.","en":"Then that noble disciple reflects:\n‘It’s not just me who is liable to grow old, not being exempt from old age. For all sentient beings grow old according to their nature, as long as they come and go, pass away and are reborn.’\nWhen they review this subject often, the path is born in them.\nThey cultivate, develop, and make much of it.\nBy doing so, they give up the fetters and eliminate the underlying tendencies."}},{"id":"an5.57:8","sourceIds":["an5.57:8.1","an5.57:8.2","an5.57:8.3","an5.57:8.4"],"kind":"text","text":{"pi":"‘Na kho ahaññeveko byādhidhammo byādhiṁ anatīto, atha kho yāvatā sattānaṁ āgati gati cuti upapatti sabbe sattā byādhidhammā byādhiṁ anatītā’ti.\nTassa taṁ ṭhānaṁ abhiṇhaṁ paccavekkhato maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saṁyojanāni sabbaso pahīyanti, anusayā byantīhonti.","en":"‘It’s not just me who is liable to get sick, not being exempt from sickness. For all sentient beings get sick according to their nature, as long as they come and go, pass away and are reborn.’\nWhen they review this subject often, the path is born in them.\nThey cultivate, develop, and make much of it.\nBy doing so, they give up the fetters and eliminate the underlying tendencies."}},{"id":"an5.57:9","sourceIds":["an5.57:9.1","an5.57:9.2","an5.57:9.3","an5.57:9.4"],"kind":"text","text":{"pi":"‘Na kho ahaññeveko maraṇadhammo maraṇaṁ anatīto, atha kho yāvatā sattānaṁ āgati gati cuti upapatti sabbe sattā maraṇadhammā maraṇaṁ anatītā’ti.\nTassa taṁ ṭhānaṁ abhiṇhaṁ paccavekkhato maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saṁyojanāni sabbaso pahīyanti, anusayā byantīhonti.","en":"‘It’s not just me who is liable to die, not being exempt from death. For all sentient beings die according to their nature, as long as they come and go, pass away and are reborn.’\nWhen they review this subject often, the path is born in them.\nThey cultivate, develop, and make much of it.\nBy doing so, they give up the fetters and eliminate the underlying tendencies."}},{"id":"an5.57:10","sourceIds":["an5.57:10.1","an5.57:10.2","an5.57:10.3","an5.57:10.4"],"kind":"text","text":{"pi":"‘Na kho mayhevekassa sabbehi piyehi manāpehi nānābhāvo vinābhāvo, atha kho yāvatā sattānaṁ āgati gati cuti upapatti sabbesaṁ sattānaṁ piyehi manāpehi nānābhāvo vinābhāvo’ti.\nTassa taṁ ṭhānaṁ abhiṇhaṁ paccavekkhato maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saṁyojanāni sabbaso pahīyanti, anusayā byantīhonti.","en":"‘It’s not just me who must be parted and separated from all I hold dear and beloved. For all sentient beings must be parted and separated from all they hold dear and beloved, as long as they come and go, pass away and are reborn.’\nWhen they review this subject often, the path is born in them.\nThey cultivate, develop, and make much of it.\nBy doing so, they give up the fetters and eliminate the underlying tendencies."}},{"id":"an5.57:11","sourceIds":["an5.57:11.1","an5.57:11.2","an5.57:11.3","an5.57:11.4","an5.57:11.5"],"kind":"text","text":{"pi":"‘Na kho ahaññeveko kammassako kammadāyādo kammayoni kammabandhu kammapaṭisaraṇo, yaṁ kammaṁ karissāmi—kalyāṇaṁ vā pāpakaṁ vā—tassa dāyādo bhavissāmi;\natha kho yāvatā sattānaṁ āgati gati cuti upapatti sabbe sattā kammassakā kammadāyādā kammayoni kammabandhu kammapaṭisaraṇā, yaṁ kammaṁ karissanti—kalyāṇaṁ vā pāpakaṁ vā—tassa dāyādā bhavissantī’ti.\nTassa taṁ ṭhānaṁ abhiṇhaṁ paccavekkhato maggo sañjāyati.\nSo taṁ maggaṁ āsevati bhāveti bahulīkaroti.\nTassa taṁ maggaṁ āsevato bhāvayato bahulīkaroto saṁyojanāni sabbaso pahīyanti, anusayā byantīhontīti.","en":"‘It’s not just me who shall be the owner of my deeds and heir to my deeds.\nFor all sentient beings shall be the owners of their deeds and heirs to their deeds, as long as they come and go, pass away and are reborn.’\nWhen they review this subject often, the path is born in them.\nThey cultivate, develop, and make much of it.\nBy doing so, they give up the fetters and eliminate the underlying tendencies."}},{"id":"an5.57:12","sourceIds":["an5.57:12.1","an5.57:12.2","an5.57:12.3","an5.57:12.4"],"kind":"text","text":{"pi":"Byādhidhammā jarādhammā,\natho maraṇadhammino;\nYathā dhammā tathā sattā,\njigucchanti puthujjanā.","en":"For others, sickness is natural,\nand so are old age and death.\nThough this is how their nature is,\nordinary people feel disgusted."}},{"id":"an5.57:13","sourceIds":["an5.57:13.1","an5.57:13.2","an5.57:13.3","an5.57:13.4"],"kind":"text","text":{"pi":"Ahañce taṁ jiguccheyyaṁ,\nevaṁ dhammesu pāṇisu;\nNa metaṁ patirūpassa,\nmama evaṁ vihārino.","en":"If I were to be disgusted\nwith creatures whose nature is such,\nit would not be appropriate for me,\nsince my life is just the same."}},{"id":"an5.57:14","sourceIds":["an5.57:14.1","an5.57:14.2","an5.57:14.3","an5.57:14.4"],"kind":"text","text":{"pi":"Sohaṁ evaṁ viharanto,\nñatvā dhammaṁ nirūpadhiṁ;\nĀrogye yobbanasmiñca,\njīvitasmiñca ye madā.","en":"Living in such a way,\nI understood the truth without attachments.\nI mastered all vanities—\nof health, of youth,"}},{"id":"an5.57:15","sourceIds":["an5.57:15.1","an5.57:15.2","an5.57:15.3","an5.57:15.4"],"kind":"text","text":{"pi":"Sabbe made abhibhosmi,\nNekkhammaṁ daṭṭhu khemato;\nTassa me ahu ussāho,\nNibbānaṁ abhipassato.","en":"and even of life—\nseeing renunciation as sanctuary.\nZeal sprang up in me\nas I looked to extinguishment."}},{"id":"an5.57:16","sourceIds":["an5.57:16.1","an5.57:16.2","an5.57:16.3","an5.57:16.4","an5.57:16.5"],"kind":"text","text":{"pi":"Nāhaṁ bhabbo etarahi,\nKāmāni paṭisevituṁ;\nAnivatti bhavissāmi,\nBrahmacariyaparāyaṇo”ti.\nSattamaṁ.","en":"Now I’m unable\nto indulge in sensual pleasures;\nthere’s no turning back,\nI’m committed to the spiritual life.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an5.57/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}