{"id":"an7.47","title":"Fires (2nd)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an7.47","title":"Fires (2nd)","units":[{"id":"an7.47:0","sourceIds":["an7.47:0.1","an7.47:0.2","an7.47:0.3"],"kind":"text","text":{"pi":"Aṅguttara Nikāya 7.47\n5. Mahāyaññavagga\nDutiyaaggisutta","en":"Numbered Discourses 7.47\n5. A Great Sacrifice\nFires (2nd)"}},{"id":"an7.47:1","sourceIds":["an7.47:1.1","an7.47:1.2","an7.47:1.3","an7.47:1.4"],"kind":"text","text":{"pi":"Tena kho pana samayena uggatasarīrassa brāhmaṇassa mahāyañño upakkhaṭo hoti.\nPañca usabhasatāni thūṇūpanītāni honti yaññatthāya, pañca vacchatarasatāni thūṇūpanītāni honti yaññatthāya, pañca vacchatarisatāni thūṇūpanītāni honti yaññatthāya, pañca ajasatāni thūṇūpanītāni honti yaññatthāya, pañca urabbhasatāni thūṇūpanītāni honti yaññatthāya.\nAtha kho uggatasarīro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.\nSammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho uggatasarīro brāhmaṇo bhagavantaṁ etadavoca:","en":"Now at that time the brahmin Uggatasarīra had prepared a large sacrifice.\nBulls, bullocks, heifers, goats and rams—five hundred of each—had been led to the post for the sacrifice.\nThen the brahmin Uggatasarīra went up to the Buddha, and exchanged greetings with him.\nWhen the greetings and polite conversation were over, he sat down to one side and said to the Buddha,"}},{"id":"an7.47:2","sourceIds":["an7.47:2.1","an7.47:2.2","an7.47:2.3","an7.47:2.4","an7.47:2.5","an7.47:2.6","an7.47:2.7"],"kind":"text","text":{"pi":"“Sutaṁ metaṁ, bho gotama, aggissa ādānaṁ yūpassa ussāpanaṁ mahapphalaṁ hoti mahānisaṁsan”ti.\n“Mayāpi kho etaṁ, brāhmaṇa, sutaṁ aggissa ādānaṁ yūpassa ussāpanaṁ mahapphalaṁ hoti mahānisaṁsan”ti.\nDutiyampi kho uggatasarīro brāhmaṇo …pe…\ntatiyampi kho uggatasarīro brāhmaṇo bhagavantaṁ etadavoca:\n“sutaṁ metaṁ, bho gotama, aggissa ādānaṁ yūpassa ussāpanaṁ mahapphalaṁ hoti mahānisaṁsan”ti.\n“Mayāpi kho etaṁ, brāhmaṇa, sutaṁ aggissa ādānaṁ yūpassa ussāpanaṁ mahapphalaṁ hoti mahānisaṁsan”ti.\n“Tayidaṁ, bho gotama, sameti bhoto ceva gotamassa amhākañca, yadidaṁ sabbena sabbaṁ”.","en":"“Worthy Gotama, I have heard that kindling the sacrificial fire and raising the sacrificial post is very fruitful and beneficial.”\n“I’ve also heard this, brahmin.”\nFor a second time …\nand third time Uggatasarīra said to the Buddha,\n“Worthy Gotama, I have heard that kindling the sacrificial fire and raising the sacrificial post is very fruitful and beneficial.”\n“I’ve also heard this, brahmin.”\n“Then the worthy Gotama and I are in total agreement in this matter.”"}},{"id":"an7.47:3","sourceIds":["an7.47:3.1","an7.47:3.2","an7.47:3.3","an7.47:3.4","an7.47:3.5","an7.47:3.6","an7.47:3.7"],"kind":"text","text":{"pi":"Evaṁ vutte āyasmā ānando uggatasarīraṁ brāhmaṇaṁ etadavoca:\n“na kho, brāhmaṇa, tathāgatā evaṁ pucchitabbā:\n‘sutaṁ metaṁ, bho gotama, aggissa ādānaṁ yūpassa ussāpanaṁ mahapphalaṁ hoti mahānisaṁsan’ti.\nEvaṁ kho, brāhmaṇa, tathāgatā pucchitabbā:\n‘ahañhi, bhante, aggiṁ ādātukāmo, yūpaṁ ussāpetukāmo.\nOvadatu maṁ, bhante, bhagavā.\nAnusāsatu maṁ, bhante, bhagavā yaṁ mama assa dīgharattaṁ hitāya sukhāyā’”ti.","en":"When he said this, Venerable Ānanda said to Uggatasarīra,\n“Brahmin, you shouldn’t ask the Buddha in this way.\nYou should ask in this way:\n‘Sir, I want to kindle the sacrificial fire and raise the sacrificial post.\nMay the Buddha please advise\nand instruct me. It will be for my lasting welfare and happiness.’”"}},{"id":"an7.47:4","sourceIds":["an7.47:4.1","an7.47:4.2","an7.47:4.3","an7.47:4.4"],"kind":"text","text":{"pi":"Atha kho uggatasarīro brāhmaṇo bhagavantaṁ etadavoca:\n“ahañhi, bho gotama, aggiṁ ādātukāmo yūpaṁ ussāpetukāmo.\nOvadatu maṁ bhavaṁ gotamo.\nAnusāsatu maṁ bhavaṁ gotamo yaṁ mama assa dīgharattaṁ hitāya sukhāyā”ti.","en":"Then Uggatasarīra said to the Buddha,\n“Worthy Gotama, I want to kindle the sacrificial fire and raise the sacrificial post.\nMay the worthy Gotama please advise\nand instruct me. It will be for my lasting welfare and happiness.”"}},{"id":"an7.47:5","sourceIds":["an7.47:5.1","an7.47:5.2","an7.47:5.3","an7.47:5.4","an7.47:5.5","an7.47:5.6","an7.47:5.7"],"kind":"text","text":{"pi":"“Aggiṁ, brāhmaṇa, ādento yūpaṁ ussāpento pubbeva yaññā tīṇi satthāni ussāpeti akusalāni dukkhudrayāni dukkhavipākāni.\nKatamāni tīṇi?\nKāyasatthaṁ, vacīsatthaṁ, manosatthaṁ.\nAggiṁ, brāhmaṇa, ādento yūpaṁ ussāpento pubbeva yaññā evaṁ cittaṁ uppādesi:\n‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti.\nSo ‘puññaṁ karomī’ti apuññaṁ karoti, ‘kusalaṁ karomī’ti akusalaṁ karoti, ‘sugatiyā maggaṁ pariyesāmī’ti duggatiyā maggaṁ pariyesati.\nAggiṁ, brāhmaṇa, ādento yūpaṁ ussāpento pubbeva yaññā idaṁ paṭhamaṁ manosatthaṁ ussāpeti akusalaṁ dukkhudrayaṁ dukkhavipākaṁ.","en":"“Even before kindling the sacrificial fire and raising the sacrificial post, one raises three unskillful knives which ripen and result in suffering.\nWhat three?\nThe knives of the body, speech, and mind.\nEven before kindling the sacrificial fire and raising the sacrificial post one gives rise to the thought:\n‘May this many bulls, bullocks, heifers, goats, and rams be slaughtered for the sacrifice!’\nThinking, ‘May I make goodness’, one makes wickedness. Thinking, ‘May I do good’, one does bad. Thinking, ‘May I seek the path to a good rebirth’, one seeks the path to a bad rebirth.\nEven before kindling the sacrificial fire and raising the sacrificial post one raises this first unskillful mental knife which ripens and results in suffering."}},{"id":"an7.47:6","sourceIds":["an7.47:6.1","an7.47:6.2","an7.47:6.3","an7.47:6.4"],"kind":"text","text":{"pi":"Puna caparaṁ, brāhmaṇa, aggiṁ ādento yūpaṁ ussāpento pubbeva yaññā evaṁ vācaṁ bhāsati:\n‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti.\nSo ‘puññaṁ karomī’ti apuññaṁ karoti, ‘kusalaṁ karomī’ti akusalaṁ karoti, ‘sugatiyā maggaṁ pariyesāmī’ti duggatiyā maggaṁ pariyesati.\nAggiṁ, brāhmaṇa, ādento yūpaṁ ussāpento pubbeva yaññā idaṁ dutiyaṁ vacīsatthaṁ ussāpeti akusalaṁ dukkhudrayaṁ dukkhavipākaṁ.","en":"Furthermore, even before kindling the sacrificial fire and raising the sacrificial post, one says such things as:\n‘May this many bulls, bullocks, heifers, goats, and rams be slaughtered for the sacrifice!’\nThinking, ‘May I make goodness’, one makes wickedness. Thinking, ‘May I do good’, one does bad. Thinking, ‘May I seek the path to a good rebirth’, one seeks the path to a bad rebirth.\nEven before kindling the sacrificial fire and raising the sacrificial post one raises this second unskillful verbal knife which ripens and results in suffering."}},{"id":"an7.47:7","sourceIds":["an7.47:7.1","an7.47:7.2","an7.47:7.3","an7.47:7.4"],"kind":"text","text":{"pi":"Puna caparaṁ, brāhmaṇa, aggiṁ ādento yūpaṁ ussāpento pubbeva yaññā sayaṁ paṭhamaṁ samārambhati usabhā hantuṁ yaññatthāya, sayaṁ paṭhamaṁ samārambhati vacchatarā hantuṁ yaññatthāya, sayaṁ paṭhamaṁ samārambhati vacchatariyo hantuṁ yaññatthāya, sayaṁ paṭhamaṁ samārambhati ajā hantuṁ yaññatthāya, sayaṁ paṭhamaṁ samārambhati urabbhā hantuṁ yaññatthāya.\nSo ‘puññaṁ karomī’ti apuññaṁ karoti, ‘kusalaṁ karomī’ti akusalaṁ karoti, ‘sugatiyā maggaṁ pariyesāmī’ti duggatiyā maggaṁ pariyesati.\nAggiṁ, brāhmaṇa, ādento yūpaṁ ussāpento pubbeva yaññā idaṁ tatiyaṁ kāyasatthaṁ ussāpeti akusalaṁ dukkhudrayaṁ dukkhavipākaṁ.\nAggiṁ, brāhmaṇa, ādento yūpaṁ ussāpento pubbeva yaññā imāni tīṇi satthāni ussāpeti akusalāni dukkhudrayāni dukkhavipākāni.","en":"Furthermore, even before kindling the sacrificial fire and raising the sacrificial post one first personally undertakes preparations for the sacrificial slaughter of bulls, bullocks, heifers, goats, and rams.\nThinking, ‘May I make goodness’, one makes wickedness. Thinking, ‘May I do good’, one does bad. Thinking, ‘May I seek the path to a good rebirth’, one seeks the path to a bad rebirth.\nEven before kindling the sacrificial fire and raising the sacrificial post, one raises this third unskillful bodily knife which ripens and results in suffering.\nEven before kindling the sacrificial fire and raising the sacrificial post, one raises these three unskillful knives which ripen and result in suffering."}},{"id":"an7.47:8","sourceIds":["an7.47:8.1","an7.47:8.2","an7.47:8.3"],"kind":"text","text":{"pi":"Tayome, brāhmaṇa, aggī pahātabbā parivajjetabbā, na sevitabbā.\nKatame tayo?\nRāgaggi, dosaggi, mohaggi.","en":"Brahmin, these three fires should be given up and shunned, not cultivated.\nWhat three?\nThe fires of greed, hate, and delusion."}},{"id":"an7.47:9","sourceIds":["an7.47:9.1","an7.47:9.2","an7.47:9.3","an7.47:9.4"],"kind":"text","text":{"pi":"Kasmā cāyaṁ, brāhmaṇa, rāgaggi pahātabbo parivajjetabbo, na sevitabbo?\nRatto kho, brāhmaṇa, rāgena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati.\nSo kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.\nTasmāyaṁ rāgaggi pahātabbo parivajjetabbo, na sevitabbo.","en":"And why should the fire of greed be given up and shunned, not cultivated?\nA greedy person does bad things by way of body, speech, and mind.\nWhen their body breaks up, after death, they’re reborn in a place of loss, a bad place, the underworld, hell.\nThat’s why the fire of greed should be given up and shunned, not cultivated."}},{"id":"an7.47:10","sourceIds":["an7.47:10.1","an7.47:10.2","an7.47:10.3","an7.47:10.4"],"kind":"text","text":{"pi":"Kasmā cāyaṁ, brāhmaṇa, dosaggi pahātabbo parivajjetabbo, na sevitabbo?\nDuṭṭho kho, brāhmaṇa, dosena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati.\nSo kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.\nTasmāyaṁ dosaggi pahātabbo parivajjetabbo, na sevitabbo.","en":"And why should the fire of hate be given up and shunned, not cultivated?\nA hateful person does bad things by way of body, speech, and mind.\nWhen their body breaks up, after death, they’re reborn in a place of loss, a bad place, the underworld, hell.\nThat’s why the fire of hate should be given up and shunned, not cultivated."}},{"id":"an7.47:11","sourceIds":["an7.47:11.1","an7.47:11.2","an7.47:11.3","an7.47:11.4","an7.47:11.5"],"kind":"text","text":{"pi":"Kasmā cāyaṁ, brāhmaṇa, mohaggi pahātabbo parivajjetabbo, na sevitabbo?\nMūḷho kho, brāhmaṇa, mohena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati.\nSo kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.\nTasmāyaṁ mohaggi pahātabbo parivajjetabbo, na sevitabbo.\nIme kho tayo, brāhmaṇa, aggī pahātabbā parivajjetabbā, na sevitabbā.","en":"And why should the fire of delusion be given up and shunned, not cultivated?\nA deluded person does bad things by way of body, speech, and mind.\nWhen their body breaks up, after death, they’re reborn in a place of loss, a bad place, the underworld, hell.\nThat’s why the fire of delusion should be given up and shunned, not cultivated.\nThese three fires should be given up and shunned, not cultivated."}},{"id":"an7.47:12","sourceIds":["an7.47:12.1","an7.47:12.2","an7.47:12.3"],"kind":"text","text":{"pi":"Tayo kho, brāhmaṇa, aggī sakkatvā garuṁ katvā mānetvā pūjetvā sammā sukhaṁ parihātabbā.\nKatame tayo?\nĀhuneyyaggi, gahapataggi, dakkhiṇeyyaggi.","en":"Brahmin, you should properly and happily take care of three fires, honoring, respecting, esteeming, and venerating them.\nWhat three?\nThe fire of those worthy of offerings dedicated to the gods. The fire of a householder. And the fire of those worthy of a religious donation."}},{"id":"an7.47:13","sourceIds":["an7.47:13.1","an7.47:13.2","an7.47:13.3","an7.47:13.4"],"kind":"text","text":{"pi":"Katamo ca, brāhmaṇa, āhuneyyaggi?\nIdha, brāhmaṇa, yassa te honti mātāti vā pitāti vā, ayaṁ vuccati, brāhmaṇa, āhuneyyaggi.\nTaṁ kissa hetu?\nAtohayaṁ, brāhmaṇa, āhuto sambhūto, tasmāyaṁ āhuneyyaggi sakkatvā garuṁ katvā mānetvā pūjetvā sammā sukhaṁ parihātabbo.","en":"And what is the fire of those worthy of offerings dedicated to the gods?\nYour mother and father are called the fire of those worthy of offerings dedicated to the gods.\nWhy is that?\nSince it is from them that you’ve been incubated and produced. So you should properly and happily take care of this fire, honoring, respecting, esteeming, and venerating it."}},{"id":"an7.47:14","sourceIds":["an7.47:14.1","an7.47:14.2","an7.47:14.3"],"kind":"text","text":{"pi":"Katamo ca, brāhmaṇa, gahapataggi?\nIdha, brāhmaṇa, yassa te honti puttāti vā dārāti vā dāsāti vā pessāti vā kammakarāti vā, ayaṁ vuccati, brāhmaṇa, gahapataggi.\nTasmāyaṁ gahapataggi sakkatvā garuṁ katvā mānetvā pūjetvā sammā sukhaṁ parihātabbo.","en":"And what is the fire of a householder?\nYour children, partners, bondservants, servants, and workers are called a householder’s fire.\nSo you should properly and happily take care of this fire, honoring, respecting, esteeming, and venerating it."}},{"id":"an7.47:15","sourceIds":["an7.47:15.1","an7.47:15.2","an7.47:15.3","an7.47:15.4"],"kind":"text","text":{"pi":"Katamo ca, brāhmaṇa, dakkhiṇeyyaggi?\nIdha, brāhmaṇa, ye te samaṇabrāhmaṇā parappavādā paṭiviratā khantisoracce niviṭṭhā ekamattānaṁ damenti, ekamattānaṁ samenti, ekamattānaṁ parinibbāpenti, ayaṁ vuccati, brāhmaṇa, dakkhiṇeyyaggi.\nTasmāyaṁ dakkhiṇeyyaggi sakkatvā garuṁ katvā mānetvā pūjetvā sammā sukhaṁ parihātabbo.\nIme kho, brāhmaṇa, tayo aggī sakkatvā garuṁ katvā mānetvā pūjetvā sammā sukhaṁ parihātabbā.","en":"And what is the fire of those worthy of a religious donation?\nThe ascetics and brahmins who refrain from intoxication and negligence, are settled in patience and gentleness, and who tame, calm, and extinguish themselves are called the fire of those worthy of a religious donation.\nSo you should properly and happily take care of this fire, honoring, respecting, esteeming, and venerating it.\nYou should properly and happily take care of these three fires, honoring, respecting, esteeming, and venerating them."}},{"id":"an7.47:16","sourceIds":["an7.47:16.1"],"kind":"text","text":{"pi":"Ayaṁ kho pana, brāhmaṇa, kaṭṭhaggi kālena kālaṁ ujjaletabbo, kālena kālaṁ ajjhupekkhitabbo, kālena kālaṁ nibbāpetabbo, kālena kālaṁ nikkhipitabbo”ti.","en":"But the wood fire, brahmin, should, from time to time, be fanned, watched over with equanimity, extinguished, or put aside.”"}},{"id":"an7.47:17","sourceIds":["an7.47:17.1","an7.47:17.2","an7.47:17.3","an7.47:17.4","an7.47:17.5","an7.47:17.6"],"kind":"text","text":{"pi":"Evaṁ vutte, uggatasarīro brāhmaṇo bhagavantaṁ etadavoca:\n“abhikkantaṁ, bho gotama, abhikkantaṁ, bho gotama …pe…\nupāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatanti.\nEsāhaṁ, bho gotama, pañca usabhasatāni muñcāmi jīvitaṁ demi, pañca vacchatarasatāni muñcāmi jīvitaṁ demi, pañca vacchatarisatāni muñcāmi jīvitaṁ demi, pañca ajasatāni muñcāmi jīvitaṁ demi, pañca urabbhasatāni muñcāmi jīvitaṁ demi.\nHaritāni ceva tiṇāni khādantu, sītāni ca pānīyāni pivantu, sīto ca nesaṁ vāto upavāyatan”ti.\nCatutthaṁ.","en":"When he said this, the brahmin Uggatasarīra said to the Buddha,\n“Excellent, worthy Gotama! Excellent! …\nFrom this day forth, may the worthy Gotama remember me as a lay follower who has gone for refuge for life.\nWorthy Gotama, I now set free these five hundred bulls, five hundred bullocks, five hundred heifers, five hundred goats, and five hundred rams. I give them life!\nMay they eat grass and drink cool water and enjoy a cool breeze!”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an7.47/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}