{"id":"kv10.3","title":"Pañcaviññāṇasamaṅgissamaggakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv10.3","title":"Pañcaviññāṇasamaṅgissamaggakathā","units":[{"id":"kv10.3:0","sourceIds":["kv10.3:0.1","kv10.3:0.2","kv10.3:0.3","kv10.3:0.4"],"kind":"text","text":{"pi":"Kathāvatthu\nMahāpaṇṇāsaka\nDasamavagga\nPañcaviññāṇasamaṅgissamaggakathā"}},{"id":"kv10.3:1","sourceIds":["kv10.3:1.1","kv10.3:1.2","kv10.3:1.3","kv10.3:1.4","kv10.3:1.5","kv10.3:1.6"],"kind":"text","text":{"pi":"Pañcaviññāṇasamaṅgissa atthi maggabhāvanāti?\nĀmantā.\nNanu pañcaviññāṇā uppannavatthukā uppannārammaṇāti?\nĀmantā.\nHañci pañcaviññāṇā uppannavatthukā uppannārammaṇā, no ca vata re vattabbe—\n“pañcaviññāṇasamaṅgissa atthi maggabhāvanā”ti."}},{"id":"kv10.3:2","sourceIds":["kv10.3:2.1","kv10.3:2.2","kv10.3:2.3","kv10.3:2.4"],"kind":"text","text":{"pi":"Nanu pañcaviññāṇā purejātavatthukā purejātārammaṇā ajjhattikavatthukā bāhirārammaṇā asambhinnavatthukā asambhinnārammaṇā nānāvatthukā nānārammaṇā na aññamaññassa gocaravisayaṁ paccanubhonti, na asamannāhārā uppajjanti, na amanasikārā uppajjanti, na abbokiṇṇā uppajjanti, na apubbaṁ acarimaṁ uppajjanti, na aññamaññassa samanantarā uppajjanti, nanu pañcaviññāṇā anābhogāti?\nĀmantā.\nHañci pañcaviññāṇā anābhogā, no ca vata re vattabbe—\n“pañcaviññāṇasamaṅgissa atthi maggabhāvanā”ti."}},{"id":"kv10.3:3","sourceIds":["kv10.3:3.1","kv10.3:3.2","kv10.3:3.3","kv10.3:3.4","kv10.3:3.5","kv10.3:3.6","kv10.3:3.7","kv10.3:3.8","kv10.3:3.9","kv10.3:3.10","kv10.3:3.11","kv10.3:3.12","kv10.3:3.13","kv10.3:3.14","kv10.3:3.15","kv10.3:3.16","kv10.3:3.17","kv10.3:3.18","kv10.3:3.19"],"kind":"text","text":{"pi":"Cakkhuviññāṇasamaṅgissa atthi maggabhāvanāti?\nĀmantā.\nCakkhuviññāṇaṁ suññataṁ ārabbha uppajjatīti?\nNa hevaṁ vattabbe …pe…\ncakkhuviññāṇaṁ suññataṁ ārabbha uppajjatīti?\nĀmantā.\nCakkhuñca paṭicca suññatañca uppajjati cakkhuviññāṇanti?\nNa hevaṁ vattabbe …pe…\ncakkhuñca paṭicca suññatañca uppajjati cakkhuviññāṇanti?\nĀmantā.\n“Cakkhuñca paṭicca suññatañca uppajjati cakkhuviññāṇan”ti—\nattheva suttantoti?\nNatthi.\n“Cakkhuñca paṭicca rūpe ca uppajjati cakkhuviññāṇan”ti—\nattheva suttantoti?\nĀmantā.\nHañci “cakkhuñca paṭicca rūpe ca uppajjati cakkhuviññāṇan”ti—\nattheva suttanto, no ca vata re vattabbe—\n“cakkhuñca paṭicca suññatañca uppajjati cakkhuviññāṇan”ti."}},{"id":"kv10.3:4","sourceIds":["kv10.3:4.1","kv10.3:4.2","kv10.3:4.3","kv10.3:4.4","kv10.3:4.5","kv10.3:4.6","kv10.3:4.7","kv10.3:4.8","kv10.3:4.9","kv10.3:4.10","kv10.3:4.11","kv10.3:4.12","kv10.3:4.13","kv10.3:4.14","kv10.3:4.15","kv10.3:4.16"],"kind":"text","text":{"pi":"Cakkhuviññāṇasamaṅgissa atthi maggabhāvanāti?\nĀmantā.\nCakkhuviññāṇaṁ atītānāgataṁ ārabbha uppajjatīti?\nNa hevaṁ vattabbe …pe…\ncakkhuviññāṇasamaṅgissa atthi maggabhāvanāti?\nĀmantā.\nCakkhuviññāṇaṁ phassaṁ ārabbha …\nvedanaṁ ārabbha …\nsaññaṁ ārabbha …\ncetanaṁ ārabbha …\ncittaṁ ārabbha …\ncakkhuṁ ārabbha …pe…\nkāyaṁ ārabbha …pe…\nsaddaṁ ārabbha …pe…\nphoṭṭhabbaṁ ārabbha uppajjatīti?\nNa hevaṁ vattabbe …pe…."}},{"id":"kv10.3:5","sourceIds":["kv10.3:5.1","kv10.3:5.2","kv10.3:5.3","kv10.3:5.4","kv10.3:5.5","kv10.3:5.6","kv10.3:5.7","kv10.3:5.8","kv10.3:5.9","kv10.3:5.10","kv10.3:5.11","kv10.3:5.12","kv10.3:5.13","kv10.3:5.14","kv10.3:5.15","kv10.3:5.16"],"kind":"text","text":{"pi":"Manoviññāṇasamaṅgissa atthi maggabhāvanā, manoviññāṇaṁ suññataṁ ārabbha uppajjatīti?\nĀmantā.\nCakkhuviññāṇasamaṅgissa atthi maggabhāvanā, cakkhuviññāṇaṁ suññataṁ ārabbha uppajjatīti?\nNa hevaṁ vattabbe …pe…\nmanoviññāṇasamaṅgissa atthi maggabhāvanā, manoviññāṇaṁ atītānāgataṁ ārabbha uppajjatīti?\nĀmantā.\nCakkhuviññāṇasamaṅgissa atthi maggabhāvanā, cakkhuviññāṇaṁ atītānāgataṁ ārabbha uppajjatīti?\nNa hevaṁ vattabbe …pe…\nmanoviññāṇasamaṅgissa atthi maggabhāvanā, manoviññāṇaṁ phassaṁ ārabbha …\nvedanaṁ ārabbha …pe…\nphoṭṭhabbaṁ ārabbha uppajjatīti?\nĀmantā.\nCakkhuviññāṇasamaṅgissa atthi maggabhāvanā, cakkhuviññāṇaṁ phassaṁ ārabbha …\nvedanaṁ ārabbha …pe…\nphoṭṭhabbaṁ ārabbha uppajjatīti?\nNa hevaṁ vattabbe …pe…."}},{"id":"kv10.3:6","sourceIds":["kv10.3:6.1","kv10.3:6.2","kv10.3:6.3","kv10.3:6.4","kv10.3:6.5","kv10.3:6.6","kv10.3:6.7","kv10.3:6.8","kv10.3:6.9","kv10.3:6.10","kv10.3:6.11","kv10.3:6.12","kv10.3:6.13"],"kind":"text","text":{"pi":"Na vattabbaṁ—\n“pañcaviññāṇasamaṅgissa atthi maggabhāvanā”ti?\nĀmantā.\nNanu vuttaṁ bhagavatā—\n“idha, bhikkhave, bhikkhu cakkhunā rūpaṁ disvā na nimittaggāhī hoti nānubyañjanaggāhī …pe…\nsotena saddaṁ sutvā …pe…\nghānena gandhaṁ ghāyitvā …pe…\njivhāya rasaṁ sāyitvā …pe…\nkāyena phoṭṭhabbaṁ phusitvā na nimittaggāhī hoti nānubyañjanaggāhī”ti.\nAttheva suttantoti?\nĀmantā.\nTena hi pañcaviññāṇasamaṅgissa atthi maggabhāvanāti.\nPañcaviññāṇasamaṅgissa maggakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv10.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}