{"id":"kv22.7","title":"Āsevanapaccayakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv22.7","title":"Āsevanapaccayakathā","units":[{"id":"kv22.7:0","sourceIds":["kv22.7:0.1","kv22.7:0.2","kv22.7:0.3","kv22.7:0.4"],"kind":"text","text":{"pi":"Kathāvatthu\nMahāpaṇṇāsaka\nBāvīsatimavagga\nĀsevanapaccayakathā"}},{"id":"kv22.7:1","sourceIds":["kv22.7:1.1","kv22.7:1.2","kv22.7:1.3","kv22.7:1.4","kv22.7:1.5","kv22.7:1.6","kv22.7:1.7"],"kind":"text","text":{"pi":"Natthi kāci āsevanapaccayatāti?\nĀmantā.\nNanu vuttaṁ bhagavatā—\n“pāṇātipāto, bhikkhave, āsevito bhāvito bahulīkato nirayasaṁvattaniko tiracchānayonisaṁvattaniko pettivisayasaṁvattaniko, yo sabbalahuso pāṇātipātassa vipāko manussabhūtassa appāyukasaṁvattaniko hotī”ti.\nAttheva suttantoti?\nĀmantā.\nTena hi atthi kāci āsevanapaccayatāti."}},{"id":"kv22.7:2","sourceIds":["kv22.7:2.1","kv22.7:2.2","kv22.7:2.3","kv22.7:2.4","kv22.7:2.5","kv22.7:2.6","kv22.7:2.7","kv22.7:2.8","kv22.7:2.9","kv22.7:2.10","kv22.7:2.11","kv22.7:2.12","kv22.7:2.13"],"kind":"text","text":{"pi":"Natthi kāci āsevanapaccayatāti?\nĀmantā.\nNanu vuttaṁ bhagavatā—\n“adinnādānaṁ, bhikkhave, āsevitaṁ bhāvitaṁ bahulīkataṁ nirayasaṁvattanikaṁ tiracchānayonisaṁvattanikaṁ pettivisayasaṁvattanikaṁ, yo sabbalahuso adinnādānassa vipāko manussabhūtassa bhogabyasanasaṁvattaniko hoti …pe…\nyo sabbalahuso kāmesumicchācārassa vipāko manussabhūtassa sapattaverasaṁvattaniko hoti …pe…\nyo sabbalahuso musāvādassa vipāko manussabhūtassa abbhūtabbhakkhānasaṁvattaniko hoti …pe…\nyo sabbalahuso pisuṇāya vācāya vipāko manussabhūtassa mittehi bhedanasaṁvattaniko hoti …pe…\nyo sabbalahuso pharusāya vācāya vipāko manussabhūtassa amanāpasaddasaṁvattaniko hoti …pe…\nyo sabbalahuso samphappalāpassa vipāko manussabhūtassa anādeyyavācāsaṁvattaniko hoti, surāmerayapānaṁ, bhikkhave, āsevitaṁ …pe…\nyo sabbalahuso surāmerayapānassa vipāko manussabhūtassa ummattakasaṁvattaniko hotī”ti.\nAttheva suttantoti?\nĀmantā.\nTena hi atthi kāci āsevanapaccayatāti."}},{"id":"kv22.7:3","sourceIds":["kv22.7:3.1","kv22.7:3.2","kv22.7:3.3","kv22.7:3.4","kv22.7:3.5","kv22.7:3.6","kv22.7:3.7"],"kind":"text","text":{"pi":"Natthi kāci āsevanapaccayatāti?\nĀmantā.\nNanu vuttaṁ bhagavatā—\n“micchādiṭṭhi, bhikkhave, āsevitā bhāvitā bahulīkatā nirayasaṁvattanikā tiracchānayonisaṁvattanikā pettivisayasaṁvattanikā”ti.\nAttheva suttantoti?\nĀmantā.\nTena hi atthi kāci āsevanapaccayatāti."}},{"id":"kv22.7:4","sourceIds":["kv22.7:4.1","kv22.7:4.2","kv22.7:4.3","kv22.7:4.4","kv22.7:4.5","kv22.7:4.6","kv22.7:4.7","kv22.7:4.8"],"kind":"text","text":{"pi":"Natthi kāci āsevanapaccayatāti?\nĀmantā.\nNanu vuttaṁ bhagavatā—\n“micchāsaṅkappo …pe…\nmicchāsamādhi, bhikkhave, āsevito bhāvito …pe… pettivisayasaṁvattaniko”ti.\nAttheva suttantoti?\nĀmantā.\nTena hi atthi kāci āsevanapaccayatāti."}},{"id":"kv22.7:5","sourceIds":["kv22.7:5.1","kv22.7:5.2","kv22.7:5.3","kv22.7:5.4","kv22.7:5.5","kv22.7:5.6","kv22.7:5.7"],"kind":"text","text":{"pi":"Natthi kāci āsevanapaccayatāti?\nĀmantā.\nNanu vuttaṁ bhagavatā—\n“sammādiṭṭhi, bhikkhave, āsevitā bhāvitā bahulīkatā amatogadhā hoti amataparāyanā amatapariyosānā”ti.\nAttheva suttantoti?\nĀmantā.\nTena hi atthi kāci āsevanapaccayatāti."}},{"id":"kv22.7:6","sourceIds":["kv22.7:6.1","kv22.7:6.2","kv22.7:6.3","kv22.7:6.4","kv22.7:6.5","kv22.7:6.6","kv22.7:6.7","kv22.7:6.8","kv22.7:6.9"],"kind":"text","text":{"pi":"Natthi kāci āsevanapaccayatāti?\nĀmantā.\nNanu vuttaṁ bhagavatā—\n“sammāsaṅkappo, bhikkhave, āsevito bhāvito bahulīkato …pe…\nsammāsamādhi, bhikkhave, āsevito bhāvito bahulīkato amatogadho hoti amataparāyano amatapariyosāno”ti.\nAttheva suttantoti?\nĀmantā.\nTena hi atthi kāci āsevanapaccayatāti.\nĀsevanapaccayakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv22.7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}