{"id":"mil1","title":"1. Ārambhakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil1","title":"1. Ārambhakathā","units":[{"id":"mil1:0","sourceIds":["mil1:0.1","mil1:0.2"],"kind":"text","text":{"pi":"Milindapañha\n1. Ārambhakathā"}},{"id":"mil1:1","sourceIds":["mil1:1.1"],"kind":"text","text":{"pi":"Namo tassa Bhagavato Arahato Sammāsambuddhassa."}},{"id":"mil1:2","sourceIds":["mil1:2.1","mil1:2.2","mil1:2.3","mil1:2.4"],"kind":"text","text":{"pi":"Milindo nāma so rājā,\nsāgalāyaṁ puruttame;\nUpagañchi nāgasenaṁ,\ngaṅgā ca yathā sāgaraṁ."}},{"id":"mil1:3","sourceIds":["mil1:3.1","mil1:3.2","mil1:3.3","mil1:3.4"],"kind":"text","text":{"pi":"Āsajja rājā citrakathiṁ,\nukkādhāraṁ tamonudaṁ;\nApucchi nipuṇe pañhe,\nṭhānāṭṭhānagate puthū."}},{"id":"mil1:4","sourceIds":["mil1:4.1","mil1:4.2","mil1:4.3","mil1:4.4"],"kind":"text","text":{"pi":"Pucchā visajjanā ceva,\ngambhīratthūpanissitā;\nHadayaṅgamā kaṇṇasukhā,\nabbhutā lomahaṁsanā."}},{"id":"mil1:5","sourceIds":["mil1:5.1","mil1:5.2","mil1:5.3","mil1:5.4"],"kind":"text","text":{"pi":"Abhidhammavinayogāḷhā,\nsuttajālasamattitā;\nNāgasenakathā citrā,\nopammehi nayehi ca."}},{"id":"mil1:6","sourceIds":["mil1:6.1","mil1:6.2","mil1:6.3","mil1:6.4"],"kind":"text","text":{"pi":"Tattha ñāṇaṁ paṇidhāya,\nhāsayitvāna mānasaṁ;\nSuṇātha nipuṇe pañhe,\nkaṅkhāṭṭhānavidālaneti."}},{"id":"mil1:7","sourceIds":["mil1:7.1","mil1:7.2","mil1:7.3"],"kind":"text","text":{"pi":"Taṁ yathānusūyate—\natthi yonakānaṁ nānāpuṭabhedanaṁ sāgalaṁ nāma nagaraṁ nadīpabbatasobhitaṁ ramaṇīyabhūmippadesabhāgaṁ ārāmuyyānopavanataḷākapokkharaṇisampannaṁ nadīpabbatavanarāmaṇeyyakaṁ sutavantanimmitaṁ nihatapaccatthikaṁ paccāmittānupapīḷitaṁ vividhavicitradaḷhamaṭṭālakoṭṭhakaṁ varapavaragopuratoraṇaṁ gambhīraparikhāpaṇḍarapākāraparikkhittantepuraṁ.\nSuvibhattavīthicaccaracatukkasiṅghāṭakaṁ suppasāritānekavidhavarabhaṇḍaparipūritantarāpaṇaṁ vividhadānaggasatasamupasobhitaṁ himagirisikharasaṅkāsavarabhavanasatasahassappaṭimaṇḍitaṁ gajahayarathapattisamākulaṁ abhirūpanaranārigaṇānucaritaṁ ākiṇṇajanamanussaṁ puthukhattiyabrāhmaṇavessasuddaṁ vividhasamaṇabrāhmaṇasabhājanasaṅghaṭitaṁ bahuvidhavijjāvanta naraciranisevitaṁ kāsikakoṭumbarikādinānāvidhavatthāpaṇasampannaṁ suppasāritarucirabahuvidhapupphagandhāpaṇaṁ gandhagandhitaṁ āsīsanīyabahuratanaparipūritaṁ disāmukhasuppasāritāpaṇaṁ siṅgāravāṇijagaṇānucaritaṁ kahāpaṇarajatasuvaṇṇakaṁsapattharaparipūraṁ pajjotamānanidhiniketaṁ pahūtadhanadhaññavittūpakaraṇaṁ paripuṇṇakosakoṭṭhāgāraṁ bahvannapānaṁ bahuvidhakhajjabhojjaleyyapeyyasāyanīyaṁ uttarakurusaṅkāsaṁ sampannasassaṁ āḷakamandā viya devapuraṁ."}},{"id":"mil1:8","sourceIds":["mil1:8.1","mil1:8.2","mil1:8.3"],"kind":"text","text":{"pi":"Ettha ṭhatvā tesaṁ pubbakammaṁ kathetabbaṁ, kathentena ca chadhā vibhajitvā kathetabbaṁ.\nSeyyathidaṁ—\npubbayogo milindapañhaṁ lakkhaṇapañhaṁ meṇḍakapañhaṁ anumānapañhaṁ opammakathāpañhanti."}},{"id":"mil1:9","sourceIds":["mil1:9.1","mil1:9.2"],"kind":"text","text":{"pi":"Tattha milindapañho lakkhaṇapañho, vimaticchedanapañhoti duvidho.\nMeṇḍakapañhopi mahāvaggo, yogikathāpañhoti duvidho."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil1/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}