{"id":"mil3.1.13","title":"13. Satilakkhaṇapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil3.1.13","title":"13. Satilakkhaṇapañha","units":[{"id":"mil3.1.13:0","sourceIds":["mil3.1.13:0.1","mil3.1.13:0.2","mil3.1.13:0.3"],"kind":"text","text":{"pi":"Milindapañha\nMahāvagga\n13. Satilakkhaṇapañha"}},{"id":"mil3.1.13:1","sourceIds":["mil3.1.13:1.1","mil3.1.13:1.2","mil3.1.13:1.3","mil3.1.13:1.4","mil3.1.13:1.5","mil3.1.13:1.6","mil3.1.13:1.7","mil3.1.13:1.8"],"kind":"text","text":{"pi":"Rājā āha—\n“bhante nāgasena, kiṁlakkhaṇā satī”ti?\n“Apilāpanalakkhaṇā, mahārāja, sati, upaggaṇhanalakkhaṇā cā”ti.\n“Kathaṁ, bhante, apilāpanalakkhaṇā satī”ti?\n“Sati, mahārāja, uppajjamānā kusalākusalasāvajjānavajjahīnappaṇītakaṇhasukkasappaṭibhāgadhamme apilāpeti ‘ime cattāro satipaṭṭhānā, ime cattāro sammappadhānā, ime cattāro iddhipādā, imāni pañcindriyāni, imāni pañca balāni, ime satta bojjhaṅgā, ayaṁ ariyo aṭṭhaṅgiko maggo, ayaṁ samatho, ayaṁ vipassanā, ayaṁ vijjā, ayaṁ vimuttī’ti.\nTato yogāvacaro sevitabbe dhamme sevati, asevitabbe dhamme na sevati.\nBhajitabbe dhamme bhajati abhajitabbe dhamme na bhajati.\nEvaṁ kho, mahārāja, apilāpanalakkhaṇā satī”ti."}},{"id":"mil3.1.13:2","sourceIds":["mil3.1.13:2.1","mil3.1.13:2.2","mil3.1.13:2.3","mil3.1.13:2.4","mil3.1.13:2.5","mil3.1.13:2.6"],"kind":"text","text":{"pi":"“Opammaṁ karohī”ti.\n“Yathā, mahārāja, rañño cakkavattissa bhaṇḍāgāriko rājānaṁ cakkavattiṁ sāyaṁ pātaṁ yasaṁ sarāpeti ‘ettakā, deva, te hatthī, ettakā assā, ettakā rathā, ettakā pattī, ettakaṁ hiraññaṁ, ettakaṁ suvaṇṇaṁ, ettakaṁ sāpateyyaṁ, taṁ devo saratū’ti rañño sāpateyyaṁ apilāpeti;\nevameva kho, mahārāja, sati uppajjamānā kusalākusalasāvajjānavajjahīnappaṇītakaṇhasukkasappaṭibhāgadhamme apilāpeti ‘ime cattāro satipaṭṭhānā, ime cattāro sammappadhānā, ime cattāro iddhipādā, imāni pañcindriyāni, imāni pañca balāni, ime satta bojjhaṅgā, ayaṁ ariyo aṭṭhaṅgiko maggo, ayaṁ samatho, ayaṁ vipassanā, ayaṁ vijjā, ayaṁ vimuttī’ti.\nTato yogāvacaro sevitabbe dhamme sevati, asevitabbe dhamme na sevati.\nBhajitabbe dhamme bhajati, abhajitabbe dhamme na bhajati.\nEvaṁ kho, mahārāja, apilāpanalakkhaṇā satī”ti."}},{"id":"mil3.1.13:3","sourceIds":["mil3.1.13:3.1","mil3.1.13:3.2","mil3.1.13:3.3","mil3.1.13:3.4","mil3.1.13:3.5","mil3.1.13:3.6"],"kind":"text","text":{"pi":"“Kathaṁ, bhante, upaggaṇhanalakkhaṇā satī”ti?\n“Sati, mahārāja, uppajjamānā hitāhitānaṁ dhammānaṁ gatiyo samanveti ‘ime dhammā hitā, ime dhammā ahitā.\nIme dhammā upakārā, ime dhammā anupakārā’ti.\nTato yogāvacaro ahite dhamme apanudeti, hite dhamme upaggaṇhāti.\nAnupakāre dhamme apanudeti, upakāre dhamme upaggaṇhāti.\nEvaṁ kho, mahārāja, upaggaṇhanalakkhaṇā satī”ti."}},{"id":"mil3.1.13:4","sourceIds":["mil3.1.13:4.1","mil3.1.13:4.2","mil3.1.13:4.3","mil3.1.13:4.4","mil3.1.13:4.5","mil3.1.13:4.6","mil3.1.13:4.7","mil3.1.13:4.8","mil3.1.13:4.9","mil3.1.13:4.10","mil3.1.13:4.11","mil3.1.13:4.12"],"kind":"text","text":{"pi":"“Opammaṁ karohī”ti.\n“Yathā, mahārāja, rañño cakkavattissa pariṇāyakaratanaṁ rañño hitāhite jānāti ‘ime rañño hitā, ime ahitā.\nIme upakārā, ime anupakārā’ti.\nTato ahite apanudeti, hite upaggaṇhāti.\nAnupakāre apanudeti, upakāre upaggaṇhāti.\nEvameva kho, mahārāja, sati uppajjamānā hitāhitānaṁ dhammānaṁ gatiyo samanveti ‘ime dhammā hitā, ime dhammā ahitā.\nIme dhammā upakārā, ime dhammā anupakārā’ti.\nTato yogāvacaro ahite dhamme apanudeti, hite dhamme upaggaṇhāti.\nAnupakāre dhamme apanudeti, upakāre damme upaggaṇhāti.\nEvaṁ kho, mahārāja, upaggaṇhanalakkhaṇā sati.\nBhāsitampetaṁ, mahārāja, bhagavatā—\n‘satiñca khvāhaṁ, bhikkhave, sabbatthikaṁ vadāmī’”ti."}},{"id":"mil3.1.13:5","sourceIds":["mil3.1.13:5.1"],"kind":"text","text":{"pi":"“Kallosi, bhante nāgasenā”ti."}},{"id":"mil3.1.13:6","sourceIds":["mil3.1.13:6.1"],"kind":"text","text":{"pi":"Satilakkhaṇapañho terasamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil3.1.13/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}