{"id":"mil3.4.8","title":"8. Nirodhanibbānapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil3.4.8","title":"8. Nirodhanibbānapañha","units":[{"id":"mil3.4.8:0","sourceIds":["mil3.4.8:0.1","mil3.4.8:0.2","mil3.4.8:0.3"],"kind":"text","text":{"pi":"Milindapañha\nNibbānavagga\n8. Nirodhanibbānapañha"}},{"id":"mil3.4.8:1","sourceIds":["mil3.4.8:1.1","mil3.4.8:1.2","mil3.4.8:1.3","mil3.4.8:1.4","mil3.4.8:1.5","mil3.4.8:1.6"],"kind":"text","text":{"pi":"Rājā āha—\n“bhante nāgasena, nirodho nibbānan”ti?\n“Āma, mahārāja, nirodho nibbānan”ti.\n“Kathaṁ, bhante nāgasena, nirodho nibbānan”ti?\n“Sabbe bālaputhujjanā kho, mahārāja, ajjhattikabāhire āyatane abhinandanti abhivadanti ajjhosāya tiṭṭhanti, te tena sotena vuyhanti, na parimuccanti jātiyā jarāya maraṇena sokena paridevena dukkhehi domanassehi upāyāsehi ‘na parimuccanti dukkhasmā’ti vadāmi.\nSutavā ca kho, mahārāja, ariyasāvako ajjhattikabāhire āyatane nābhinandati nābhivadati nājjhosāya tiṭṭhati, tassa taṁ anabhinandato anabhivadato anajjhosāya tiṭṭhato taṇhā nirujjhati, taṇhānirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṁ sokaparidevadukkhadomanassupāyāsā nirujjhanti, evametassa kevalassa dukkhakkhandhassa nirodho hoti, evaṁ kho, mahārāja, nirodho nibbānan”ti."}},{"id":"mil3.4.8:2","sourceIds":["mil3.4.8:2.1"],"kind":"text","text":{"pi":"“Kallosi, bhante nāgasenā”ti."}},{"id":"mil3.4.8:3","sourceIds":["mil3.4.8:3.1"],"kind":"text","text":{"pi":"Nirodhanibbānapañho aṭṭhamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil3.4.8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}