{"id":"mil3.7.1","title":"1. Satiuppajjanapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil3.7.1","title":"1. Satiuppajjanapañha","units":[{"id":"mil3.7.1:0","sourceIds":["mil3.7.1:0.1","mil3.7.1:0.2","mil3.7.1:0.3"],"kind":"text","text":{"pi":"Milindapañha\nArūpadhammavavatthānavagga\n1. Satiuppajjanapañha"}},{"id":"mil3.7.1:1","sourceIds":["mil3.7.1:1.1","mil3.7.1:1.2","mil3.7.1:1.3","mil3.7.1:1.4","mil3.7.1:1.5"],"kind":"text","text":{"pi":"Rājā āha—\n“bhante nāgasena, katihākārehi sati uppajjatī”ti?\n“Sattarasahākārehi, mahārāja, sati uppajjatī”ti.\n“Katamehi sattarasahākārehī”ti?\n“Abhijānatopi, mahārāja, sati uppajjati, kaṭumikāyapi sati uppajjati, oḷārikaviññāṇatopi sati uppajjati, hitaviññāṇatopi sati uppajjati, ahitaviññāṇatopi sati uppajjati, sabhāganimittatopi sati uppajjati, visabhāganimittatopi sati uppajjati, kathābhiññāṇatopi sati uppajjati, lakkhaṇatopi sati uppajjati, sāraṇatopi sati uppajjati, muddātopi sati uppajjati, gaṇanātopi sati uppajjati, dhāraṇatopi sati uppajjati, bhāvanatopi sati uppajjati, potthakanibandhanatopi sati uppajjati, upanikkhepatopi sati uppajjati, anubhūtatopi sati uppajjatīti."}},{"id":"mil3.7.1:2","sourceIds":["mil3.7.1:2.1","mil3.7.1:2.2"],"kind":"text","text":{"pi":"Kathaṁ abhijānato sati uppajjati?\nYathā, mahārāja, āyasmā ca ānando khujjuttarā ca upāsikā, ye vā pana aññepi keci jātissarā jātiṁ saranti, evaṁ abhijānato sati uppajjati."}},{"id":"mil3.7.1:3","sourceIds":["mil3.7.1:3.1","mil3.7.1:3.2"],"kind":"text","text":{"pi":"Kathaṁ kaṭumikāya sati uppajjati?\nYo pakatiyā muṭṭhassatiko, pare ca taṁ sarāpanatthaṁ nibandhanti, evaṁ kaṭumikāya sati uppajjati."}},{"id":"mil3.7.1:4","sourceIds":["mil3.7.1:4.1","mil3.7.1:4.2"],"kind":"text","text":{"pi":"Kathaṁ oḷārikaviññāṇato sati uppajjati?\nYadā rajje vā abhisitto hoti, sotāpattiphalaṁ vā patto hoti, evaṁ oḷārikaviññāṇato sati uppajjati."}},{"id":"mil3.7.1:5","sourceIds":["mil3.7.1:5.1","mil3.7.1:5.2"],"kind":"text","text":{"pi":"Kathaṁ hitaviññāṇato sati uppajjati?\nYamhi sukhāpito, ‘amukasmiṁ evaṁ sukhāpito’ti sarati, evaṁ hitaviññāṇato sati uppajjati."}},{"id":"mil3.7.1:6","sourceIds":["mil3.7.1:6.1","mil3.7.1:6.2"],"kind":"text","text":{"pi":"Kathaṁ ahitaviññāṇato sati uppajjati?\nYamhi dukkhāpito, ‘amukasmiṁ evaṁ dukkhāpito’ti sarati, evaṁ ahitaviññāṇato sati uppajjati."}},{"id":"mil3.7.1:7","sourceIds":["mil3.7.1:7.1","mil3.7.1:7.2"],"kind":"text","text":{"pi":"Kathaṁ sabhāganimittato sati uppajjati?\nSadisaṁ puggalaṁ disvā mātaraṁ vā pitaraṁ vā bhātaraṁ vā bhaginiṁ vā sarati, oṭṭhaṁ vā goṇaṁ vā gadrabhaṁ vā disvā aññaṁ tādisaṁ oṭṭhaṁ vā goṇaṁ vā gadrabhaṁ vā sarati, evaṁ sabhāganimittato sati uppajjati."}},{"id":"mil3.7.1:8","sourceIds":["mil3.7.1:8.1","mil3.7.1:8.2"],"kind":"text","text":{"pi":"Kathaṁ visabhāganimittato sati uppajjati?\nAsukassa nāma vaṇṇo ediso, saddo ediso, gandho ediso, raso ediso, phoṭṭhabbo edisoti sarati, evampi visabhāganimittatopi sati uppajjati."}},{"id":"mil3.7.1:9","sourceIds":["mil3.7.1:9.1","mil3.7.1:9.2"],"kind":"text","text":{"pi":"Kathaṁ kathābhiññāṇato sati uppajjati?\nYo pakatiyā muṭṭhassatiko hoti, taṁ pare sarāpenti, tena so sarati, evaṁ kathābhiññāṇato sati uppajjati."}},{"id":"mil3.7.1:10","sourceIds":["mil3.7.1:10.1","mil3.7.1:10.2"],"kind":"text","text":{"pi":"Kathaṁ lakkhaṇato sati uppajjati?\nYo pakatiyā balībaddānaṁ aṅgena jānāti, lakkhaṇena jānāti, evaṁ lakkhaṇato sati uppajjati."}},{"id":"mil3.7.1:11","sourceIds":["mil3.7.1:11.1","mil3.7.1:11.2"],"kind":"text","text":{"pi":"Kathaṁ sāraṇato sati uppajjati?\nYo pakatiyā muṭṭhassatiko hoti, yo taṁ ‘sarāhi bho, sarāhi bho’ti punappunaṁ sarāpeti, evaṁ sāraṇato sati uppajjati."}},{"id":"mil3.7.1:12","sourceIds":["mil3.7.1:12.1","mil3.7.1:12.2"],"kind":"text","text":{"pi":"Kathaṁ muddāto sati uppajjati?\nLipiyā sikkhitattā jānāti ‘imassa akkharassa anantaraṁ imaṁ akkharaṁ kātabban’ti evaṁ muddāto sati uppajjati."}},{"id":"mil3.7.1:13","sourceIds":["mil3.7.1:13.1","mil3.7.1:13.2"],"kind":"text","text":{"pi":"Kathaṁ gaṇanāto sati uppajjati?\nGaṇanāya sikkhitattā gaṇakā bahumpi gaṇenti, evaṁ gaṇanāto sati uppajjati."}},{"id":"mil3.7.1:14","sourceIds":["mil3.7.1:14.1","mil3.7.1:14.2"],"kind":"text","text":{"pi":"Kathaṁ dhāraṇato sati uppajjati?\nDhāraṇāya sikkhitattā dhāraṇakā bahumpi dhārenti, evaṁ dhāraṇato sati uppajjati."}},{"id":"mil3.7.1:15","sourceIds":["mil3.7.1:15.1","mil3.7.1:15.2","mil3.7.1:15.3","mil3.7.1:15.4"],"kind":"text","text":{"pi":"Kathaṁ bhāvanāto sati uppajjati?\nIdha bhikkhu anekavihitaṁ pubbenivāsaṁ anussarati, seyyathidaṁ—\nekampi jātiṁ dvepi jātiyo …pe…\niti sākāraṁ sauddesaṁ pubbenivāsaṁ anussarati, evaṁ bhāvanāto sati uppajjati."}},{"id":"mil3.7.1:16","sourceIds":["mil3.7.1:16.1","mil3.7.1:16.2"],"kind":"text","text":{"pi":"Kathaṁ potthakanibandhanato sati uppajjati?\nRājāno anusāsaniyaṁ assarantā etaṁ potthakaṁ āharathāti, tena potthakena anussaranti, evaṁ potthakanibandhanato sati uppajjati."}},{"id":"mil3.7.1:17","sourceIds":["mil3.7.1:17.1","mil3.7.1:17.2"],"kind":"text","text":{"pi":"Kathaṁ upanikkhepato sati uppajjati?\nUpanikkhittaṁ bhaṇḍaṁ disvā sarati, evaṁ upanikkhepato sati uppajjati."}},{"id":"mil3.7.1:18","sourceIds":["mil3.7.1:18.1","mil3.7.1:18.2","mil3.7.1:18.3"],"kind":"text","text":{"pi":"Kathaṁ anubhūtato sati uppajjati?\nDiṭṭhattā rūpaṁ sarati, sutattā saddaṁ sarati, ghāyitattā gandhaṁ sarati, sāyitattā rasaṁ sarati, phuṭṭhattā phoṭṭhabbaṁ sarati, viññātattā dhammaṁ sarati, evaṁ anubhūtato sati uppajjati.\nImehi kho, mahārāja, sattarasahākārehi sati uppajjatī”ti."}},{"id":"mil3.7.1:19","sourceIds":["mil3.7.1:19.1"],"kind":"text","text":{"pi":"“Kallosi, bhante nāgasenā”ti."}},{"id":"mil3.7.1:20","sourceIds":["mil3.7.1:20.1"],"kind":"text","text":{"pi":"Satiuppajjanapañho paṭhamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil3.7.1/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}