{"id":"mil4.1","title":"1. Aṭṭhamantaparivajjanīyaṭṭhāna","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil4.1","title":"1. Aṭṭhamantaparivajjanīyaṭṭhāna","units":[{"id":"mil4.1:0","sourceIds":["mil4.1:0.1","mil4.1:0.2","mil4.1:0.3","mil4.1:0.4"],"kind":"text","text":{"pi":"Milindapañha\nMeṇḍakapañhārambhakathā\nUpāsakaguṇavagga\n1. Aṭṭhamantaparivajjanīyaṭṭhāna"}},{"id":"mil4.1:1","sourceIds":["mil4.1:1.1","mil4.1:1.2","mil4.1:1.3","mil4.1:1.4"],"kind":"text","text":{"pi":"Bhassappavādo vetaṇḍī,\natibuddhi vicakkhaṇo;\nMilindo ñāṇabhedāya,\nnāgasenamupāgami."}},{"id":"mil4.1:2","sourceIds":["mil4.1:2.1","mil4.1:2.2","mil4.1:2.3","mil4.1:2.4"],"kind":"text","text":{"pi":"Vasanto tassa chāyāya,\nparipucchaṁ punappunaṁ;\nPabhinnabuddhi hutvāna,\nsopi āsi tipeṭako."}},{"id":"mil4.1:3","sourceIds":["mil4.1:3.1","mil4.1:3.2","mil4.1:3.3","mil4.1:3.4"],"kind":"text","text":{"pi":"Navaṅgaṁ anumajjanto,\nrattibhāge rahogato;\nAddakkhi meṇḍake pañhe,\ndunniveṭhe saniggahe."}},{"id":"mil4.1:4","sourceIds":["mil4.1:4.1","mil4.1:4.2","mil4.1:4.3","mil4.1:4.4"],"kind":"text","text":{"pi":"“Pariyāyabhāsitaṁ atthi,\natthi sandhāyabhāsitaṁ;\nSabhāvabhāsitaṁ atthi,\ndhammarājassa sāsane."}},{"id":"mil4.1:5","sourceIds":["mil4.1:5.1","mil4.1:5.2","mil4.1:5.3","mil4.1:5.4"],"kind":"text","text":{"pi":"Tesamatthaṁ aviññāya,\nmeṇḍake jinabhāsite;\nAnāgatamhi addhāne,\nviggaho tattha hessati."}},{"id":"mil4.1:6","sourceIds":["mil4.1:6.1","mil4.1:6.2","mil4.1:6.3","mil4.1:6.4"],"kind":"text","text":{"pi":"Handa kathiṁ pasādetvā,\nchejjāpessāmi meṇḍake;\nTassa niddiṭṭhamaggena,\nniddisissantyanāgate”ti."}},{"id":"mil4.1:7","sourceIds":["mil4.1:7.1","mil4.1:7.2","mil4.1:7.3"],"kind":"text","text":{"pi":"Atha kho milindo rājā pabhātāya rattiyā uddhaste aruṇe sīsaṁ nhatvā sirasi añjaliṁ paggahetvā atītānāgatapaccuppanne sammāsambuddhe anussaritvā aṭṭha vattapadāni samādiyi “ito me anāgatāni satta divasāni aṭṭha guṇe samādiyitvā tapo caritabbo bhavissati, sohaṁ ciṇṇatapo samāno ācariyaṁ ārādhetvā meṇḍake pañhe pucchissāmī”ti.\nAtha kho milindo rājā pakatidussayugaṁ apanetvā ābharaṇāni ca omuñcitvā kāsāvaṁ nivāsetvā muṇḍakapaṭisīsakaṁ sīse paṭimuñcitvā munibhāvamupagantvā aṭṭha guṇe samādiyi “imaṁ sattāhaṁ mayā na rājattho anusāsitabbo, na rāgūpasañhitaṁ cittaṁ uppādetabbaṁ, na dosūpasañhitaṁ cittaṁ uppādetabbaṁ, na mohūpasañhitaṁ cittaṁ uppādetabbaṁ, dāsakammakaraporise janepi nivātavuttinā bhavitabbaṁ, kāyikaṁ vācasikaṁ anurakkhitabbaṁ, chapi āyatanāni niravasesato anurakkhitabbāni, mettābhāvanāya mānasaṁ pakkhipitabban”ti.\nIme aṭṭha guṇe samādiyitvā tesveva aṭṭhasu guṇesu mānasaṁ patiṭṭhapetvā bahi anikkhamitvā sattāhaṁ vītināmetvā aṭṭhame divase pabhātāya rattiyā pageva pātarāsaṁ katvā okkhittacakkhu mitabhāṇī susaṇṭhitena iriyāpathena avikkhittena cittena haṭṭhena udaggena vippasannena theraṁ nāgasenaṁ upasaṅkamitvā therassa pāde sirasā vanditvā ekamantaṁ ṭhito idamavoca—"}},{"id":"mil4.1:8","sourceIds":["mil4.1:8.1","mil4.1:8.2","mil4.1:8.3"],"kind":"text","text":{"pi":"“Atthi me, bhante nāgasena, koci attho tumhehi saddhiṁ mantayitabbo, na tattha añño koci tatiyo icchitabbo, suññe okāse pavivitte araññe aṭṭhaṅgupāgate samaṇasāruppe.\nTattha so pañho pucchitabbo bhavissati, tattha me guyhaṁ na kātabbaṁ na rahassakaṁ, arahāmahaṁ rahassakaṁ suṇituṁ sumantane upagate, upamāyapi so attho upaparikkhitabbo, yathā kiṁ viya, yathā nāma, bhante nāgasena, mahāpathavī nikkhepaṁ arahati nikkhepe upagate.\nEvameva kho, bhante nāgasena, arahāmahaṁ rahassakaṁ suṇituṁ sumantane upagate”ti."}},{"id":"mil4.1:9","sourceIds":["mil4.1:9.1","mil4.1:9.2","mil4.1:9.3","mil4.1:9.4","mil4.1:9.5"],"kind":"text","text":{"pi":"Garunā saha pavivittapavanaṁ pavisitvā idamavoca—\n“bhante nāgasena, idha purisena mantayitukāmena aṭṭha ṭhānāni parivajjayitabbāni bhavanti, na tesu ṭhānesu viññū puriso atthaṁ manteti, mantitopi attho paripatati na sambhavati.\nKatamāni aṭṭha ṭhānāni?\nVisamaṭṭhānaṁ parivajjanīyaṁ, sabhayaṁ parivajjanīyaṁ, ativātaṭṭhānaṁ parivajjanīyaṁ, paṭicchannaṭṭhānaṁ parivajjanīyaṁ, devaṭṭhānaṁ parivajjanīyaṁ, pantho parivajjanīyo, saṅgāmo parivajjanīyo, udakatitthaṁ parivajjanīyaṁ.\nImāni aṭṭha ṭhānāni parivajjanīyānī”ti."}},{"id":"mil4.1:10","sourceIds":["mil4.1:10.1","mil4.1:10.2","mil4.1:10.3","mil4.1:10.4"],"kind":"text","text":{"pi":"Thero āha—\n“ko doso visamaṭṭhāne, sabhaye, ativāte, paṭicchanne, devaṭṭhāne, panthe, saṅgāme, udakatitthe”ti?\n“Visame, bhante nāgasena, mantito attho vikirati vidhamati paggharati na sambhavati, sabhaye mano santassati, santassito na sammā atthaṁ samanupassati, ativāte saddo avibhūto hoti, paṭicchanne upassutiṁ tiṭṭhanti, devaṭṭhāne mantito attho garukaṁ pariṇamati, panthe mantito attho tuccho bhavati, saṅgāme cañcalo bhavati, udakatitthe pākaṭo bhavati.\nBhavatīha—"}},{"id":"mil4.1:11","sourceIds":["mil4.1:11.1","mil4.1:11.2","mil4.1:11.3","mil4.1:11.4"],"kind":"text","text":{"pi":"‘Visamaṁ sabhayaṁ ativāto,\nPaṭicchannaṁ devanissitaṁ;\nPantho ca saṅgāmo titthaṁ,\nAṭṭhete parivajjiyā’”ti."}},{"id":"mil4.1:12","sourceIds":["mil4.1:12.1"],"kind":"text","text":{"pi":"Aṭṭha mantanassa parivajjanīyaṭṭhānāni."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil4.1/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}