{"id":"mil5.3.9","title":"9. Aggaggasamaṇapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil5.3.9","title":"9. Aggaggasamaṇapañha","units":[{"id":"mil5.3.9:0","sourceIds":["mil5.3.9:0.1","mil5.3.9:0.2","mil5.3.9:0.3","mil5.3.9:0.4"],"kind":"text","text":{"pi":"Milindapañha\nMeṇḍakapañha\nPaṇāmitavagga\n9. Aggaggasamaṇapañha"}},{"id":"mil5.3.9:1","sourceIds":["mil5.3.9:1.1","mil5.3.9:1.2","mil5.3.9:1.3"],"kind":"text","text":{"pi":"“Bhante nāgasena, bhāsitampetaṁ bhagavatā—\n‘āsavānaṁ khayā samaṇo hotī’ti.\nPuna ca bhaṇitaṁ—"}},{"id":"mil5.3.9:2","sourceIds":["mil5.3.9:2.1","mil5.3.9:2.2"],"kind":"text","text":{"pi":"‘Catubbhi dhammehi samaṅgibhūtaṁ,\nTaṁ ve naraṁ samaṇaṁ āhu loke’ti."}},{"id":"mil5.3.9:3","sourceIds":["mil5.3.9:3.1","mil5.3.9:3.2","mil5.3.9:3.3","mil5.3.9:3.4"],"kind":"text","text":{"pi":"Tatrime cattāro dhammā khanti appāhāratā rativippahānaṁ ākiñcaññaṁ.\nSabbāni panetāni aparikkhīṇāsavassa sakilesasseva honti.\nYadi, bhante nāgasena, āsavānaṁ khayā samaṇo hoti, tena hi ‘catubbhi dhammehi samaṅgibhūtaṁ, taṁ ve naraṁ samaṇaṁ āhu loke’ti yaṁ vacanaṁ, taṁ micchā.\nYadi catubbhi dhammehi samaṅgibhūto samaṇo hoti, tena hi ‘āsavānaṁ khayā samaṇo hotī’ti tampi vacanaṁ micchā, ayampi ubhato koṭiko pañho tavānuppatto, so tayā nibbāhitabbo”ti."}},{"id":"mil5.3.9:4","sourceIds":["mil5.3.9:4.1","mil5.3.9:4.2","mil5.3.9:4.3","mil5.3.9:4.4","mil5.3.9:4.5"],"kind":"text","text":{"pi":"“Bhāsitampetaṁ, mahārāja, bhagavatā ‘āsavānaṁ khayā samaṇo hotī’ti.\nPuna ca bhaṇitaṁ—\n‘catubbhi dhammehi samaṅgibhūtaṁ, taṁ ve naraṁ samaṇaṁ āhu loke’ti.\nTadidaṁ, mahārāja, vacanaṁ tesaṁ tesaṁ puggalānaṁ guṇavasena bhaṇitaṁ—\n‘catubbhi dhammehi samaṅgibhūtaṁ, taṁ ve naraṁ samaṇaṁ āhu loke’ti, idaṁ pana niravasesavacanaṁ ‘āsavānaṁ khayā samaṇo hotī’ti."}},{"id":"mil5.3.9:5","sourceIds":["mil5.3.9:5.1","mil5.3.9:5.2","mil5.3.9:5.3"],"kind":"text","text":{"pi":"Api ca, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyati.\nYathā, mahārāja, yāni kānici jalajathalajapupphāni, vassikaṁ tesaṁ aggamakkhāyati, avasesāni yāni kānici vividhāni pupphajātāni, sabbāni tāni pupphāniyeva, upādāyupādāya pana vassikaṁyeva pupphaṁ janassa patthitaṁ pihayitaṁ;\nevameva kho, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyati."}},{"id":"mil5.3.9:6","sourceIds":["mil5.3.9:6.1","mil5.3.9:6.2","mil5.3.9:6.3"],"kind":"text","text":{"pi":"Yathā vā pana, mahārāja, sabbadhaññānaṁ sāli aggamakkhāyati, yā kāci avasesā vividhā dhaññajātiyo, tā sabbā upādāyupādāya bhojanāni sarīrayāpanāya, sāliyeva tesaṁ aggamakkhāyati;\nevameva kho, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyatī”ti.\n“Sādhu, bhante nāgasena, evametaṁ tathā sampaṭicchāmī”ti."}},{"id":"mil5.3.9:7","sourceIds":["mil5.3.9:7.1"],"kind":"text","text":{"pi":"Aggaggasamaṇapañho navamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil5.3.9/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}