{"id":"mil5.4.6","title":"6. Mettābhāvanānisaṁsapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil5.4.6","title":"6. Mettābhāvanānisaṁsapañha","units":[{"id":"mil5.4.6:0","sourceIds":["mil5.4.6:0.1","mil5.4.6:0.2","mil5.4.6:0.3","mil5.4.6:0.4"],"kind":"text","text":{"pi":"Milindapañha\nMeṇḍakapañha\nSabbaññutañāṇavagga\n6. Mettābhāvanānisaṁsapañha"}},{"id":"mil5.4.6:1","sourceIds":["mil5.4.6:1.1","mil5.4.6:1.2","mil5.4.6:1.3","mil5.4.6:1.4","mil5.4.6:1.5","mil5.4.6:1.6"],"kind":"text","text":{"pi":"“Bhante nāgasena, bhāsitampetaṁ bhagavatā—\n‘mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṁsā pāṭikaṅkhā.\nKatame ekādasa?\nSukhaṁ supati, sukhaṁ paṭibujjhati, na pāpakaṁ supinaṁ passati, manussānaṁ piyo hoti, amanussānaṁ piyo hoti, devatā rakkhanti, nāssa aggi vā visaṁ vā satthaṁ vā kamati, tuvaṭaṁ cittaṁ samādhiyati, mukhavaṇṇo vippasīdati, asammūḷho kālaṁ karoti, uttariṁ appaṭivijjhanto brahmalokūpago hotī’ti.\nPuna ca tumhe bhaṇatha—\n‘sāmo kumāro mettāvihārī migasaṅghena parivuto pavane vicaranto pīḷiyakkhena raññā viddho visapītena sallena tattheva mucchito patito’ti."}},{"id":"mil5.4.6:2","sourceIds":["mil5.4.6:2.1","mil5.4.6:2.2","mil5.4.6:2.3","mil5.4.6:2.4","mil5.4.6:2.5","mil5.4.6:2.6"],"kind":"text","text":{"pi":"Yadi, bhante nāgasena, bhagavatā bhaṇitaṁ—\n‘mettāya bhikkhave …pe…\nbrahmalokūpago hotī’ti, tena hi ‘sāmo kumāro mettāvihārī migasaṅghena parivuto pavane vicaranto pīḷiyakkhena raññā viddho visapītena sallena tattheva mucchito patito’ti yaṁ vacanaṁ, taṁ micchā.\nYadi sāmo kumāro mettāvihārī migasaṅghena parivuto pavane vicaranto pīḷiyakkhena raññā viddho visapītena sallena tattheva mucchito patito, tena hi ‘mettāya, bhikkhave …pe…\nsatthaṁ vā kamatī’ti tampi vacanaṁ micchā.\nAyampi ubhato koṭiko pañho sunipuṇo parisaṇho sukhumo gambhīro, api sunipuṇānaṁ manujānaṁ gatte sedaṁ moceyya, so tavānuppatto, vijaṭehi taṁ mahājaṭājaṭitaṁ, anāgatānaṁ jinaputtānaṁ cakkhuṁ dehi nibbāhanāyā”ti."}},{"id":"mil5.4.6:3","sourceIds":["mil5.4.6:3.1","mil5.4.6:3.2","mil5.4.6:3.3","mil5.4.6:3.4","mil5.4.6:3.5","mil5.4.6:3.6"],"kind":"text","text":{"pi":"“Bhāsitampetaṁ, mahārāja, bhagavatā—\n‘mettāya bhikkhave …pe…\nsatthaṁ vā kamatī’ti.\nSāmo ca kumāro mettāvihārī migasaṅghena parivuto pavane vicaranto pīḷiyakkhena raññā viddho visapītena sallena tattheva mucchito patito, tattha pana, mahārāja, kāraṇaṁ atthi.\nKatamaṁ tattha kāraṇaṁ?\nNete, mahārāja, guṇā puggalassa, mettābhāvanāyete guṇā, sāmo, mahārāja, kumāro ghaṭaṁ ukkhipanto tasmiṁ khaṇe mettābhāvanāya pamatto ahosi."}},{"id":"mil5.4.6:4","sourceIds":["mil5.4.6:4.1","mil5.4.6:4.2","mil5.4.6:4.3","mil5.4.6:4.4","mil5.4.6:4.5"],"kind":"text","text":{"pi":"Yasmiṁ, mahārāja, khaṇe puggalo mettaṁ samāpanno hoti, na tassa puggalassa tasmiṁ khaṇe aggi vā visaṁ vā satthaṁ vā kamati.\nTassa ye keci ahitakāmā upagantvā taṁ na passanti, na tasmiṁ okāsaṁ labhanti.\nNete, mahārāja, guṇā puggalassa, mettābhāvanāyete guṇā.\nIdha, mahārāja, puriso saṅgāmasūro abhejjakavacajālikaṁ sannayhitvā saṅgāmaṁ otareyya, tassa sarā khittā upagantvā patanti vikiranti, na tasmiṁ okāsaṁ labhanti, neso, mahārāja, guṇo saṅgāmasūrassa, abhejjakavacajālikāyeso guṇo, yassa sarā khittā upagantvā patanti vikiranti.\nEvameva kho, mahārāja, nete guṇā puggalassa, mettābhāvanāyete guṇā."}},{"id":"mil5.4.6:5","sourceIds":["mil5.4.6:5.1","mil5.4.6:5.2","mil5.4.6:5.3","mil5.4.6:5.4","mil5.4.6:5.5"],"kind":"text","text":{"pi":"Yasmiṁ, mahārāja, khaṇe puggalo mettaṁ samāpanno hoti, na tassa puggalassa tasmiṁ khaṇe aggi vā visaṁ vā satthaṁ vā kamati.\nTassa ye keci ahitakāmā upagantvā taṁ na passanti, tasmiṁ okāsaṁ na labhanti, nete, mahārāja, guṇā puggalassa, mettābhāvanāyete guṇā.\nIdha pana, mahārāja, puriso dibbaṁ antaradhānaṁ mūlaṁ hatthe kareyya, yāva taṁ mūlaṁ tassa hatthagataṁ hoti, tāva na añño koci pakatimanusso taṁ purisaṁ passati.\nNeso, mahārāja, guṇo purisassa, mūlasseso guṇo antaradhānassa, yaṁ so pakatimanussānaṁ cakkhupathe na dissati.\nEvameva kho, mahārāja, nete guṇā puggalassa, mettābhāvanāyete guṇā."}},{"id":"mil5.4.6:6","sourceIds":["mil5.4.6:6.1","mil5.4.6:6.2","mil5.4.6:6.3","mil5.4.6:6.4","mil5.4.6:6.5"],"kind":"text","text":{"pi":"Yasmiṁ, mahārāja, khaṇe puggalo mettaṁ samāpanno hoti, na tassa puggalassa tasmiṁ khaṇe aggi vā visaṁ vā satthaṁ vā kamati.\nTassa ye keci ahitakāmā upagantvā taṁ na passanti, na tasmiṁ okāsaṁ labhanti.\nNete, mahārāja, guṇā puggalassa, mettābhāvanāyete guṇā.\nYathā vā pana, mahārāja, purisaṁ sukataṁ mahāleṇamanuppaviṭṭhaṁ mahatimahāmegho abhivassanto na sakkoti temayituṁ, neso, mahārāja, guṇo purisassa, mahāleṇasseso guṇo, yaṁ mahāmegho abhivassamāno na taṁ temeti.\nEvameva kho, mahārāja, nete guṇā puggalassa, mettābhāvanāyete guṇā."}},{"id":"mil5.4.6:7","sourceIds":["mil5.4.6:7.1","mil5.4.6:7.2","mil5.4.6:7.3","mil5.4.6:7.4"],"kind":"text","text":{"pi":"Yasmiṁ, mahārāja, khaṇe puggalo mettaṁ samāpanno hoti, na tassa puggalassa tasmiṁ khaṇe aggi vā visaṁ vā satthaṁ vā kamati.\nTassa ye keci ahitakāmā upagantvā taṁ na passanti, na tassa sakkonti ahitaṁ kātuṁ, nete, mahārāja, guṇā puggalassa, mettābhāvanāyete guṇā”ti.\n“Acchariyaṁ, bhante nāgasena, abbhutaṁ, bhante nāgasena, sabbapāpanivāraṇā mettābhāvanā”ti.\n“Sabbakusalaguṇāvahā, mahārāja, mettābhāvanā hitānampi ahitānampi, ye te sattā viññāṇabaddhā, sabbesaṁ mahānisaṁsā mettābhāvanā saṁvibhajitabbā”ti."}},{"id":"mil5.4.6:8","sourceIds":["mil5.4.6:8.1"],"kind":"text","text":{"pi":"Mettābhāvanānisaṁsapañho chaṭṭho."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil5.4.6/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}