{"id":"mn115","title":"Many Elements","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn115","title":"Many Elements","units":[{"id":"mn115:0","sourceIds":["mn115:0.1","mn115:0.2"],"kind":"text","text":{"pi":"Majjhima Nikāya 115\nBahudhātukasutta","en":"Middle Discourses 115\nMany Elements"}},{"id":"mn115:1","sourceIds":["mn115:1.1","mn115:1.2","mn115:1.3","mn115:1.4","mn115:1.5","mn115:1.6"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.\nTatra kho bhagavā bhikkhū āmantesi:\n“bhikkhavo”ti.\n“Bhadante”ti te bhikkhū bhagavato paccassosuṁ.\nBhagavā etadavoca:","en":"So I have heard.\nAt one time the Buddha was staying near Sāvatthī in Jeta’s Grove, Anāthapiṇḍika’s monastery.\nThere the Buddha addressed the mendicants,\n“Mendicants!”\n“Venerable sir,” they replied.\nThe Buddha said this:"}},{"id":"mn115:2","sourceIds":["mn115:2.1","mn115:2.2","mn115:2.3","mn115:2.4","mn115:2.5","mn115:2.6","mn115:2.7","mn115:2.8","mn115:2.9","mn115:2.10","mn115:2.11","mn115:2.12","mn115:2.13"],"kind":"text","text":{"pi":"“Yāni kānici, bhikkhave, bhayāni uppajjanti sabbāni tāni bālato uppajjanti, no paṇḍitato;\nye keci upaddavā uppajjanti sabbe te bālato uppajjanti, no paṇḍitato;\nye keci upasaggā uppajjanti sabbe te bālato uppajjanti, no paṇḍitato.\nSeyyathāpi, bhikkhave, naḷāgārā vā tiṇāgārā vā aggi mutto kūṭāgārānipi dahati ullittāvalittāni nivātāni phusitaggaḷāni pihitavātapānāni;\nevameva kho, bhikkhave, yāni kānici bhayāni uppajjanti sabbāni tāni bālato uppajjanti, no paṇḍitato;\nye keci upaddavā uppajjanti sabbe te bālato uppajjanti, no paṇḍitato;\nye keci upasaggā uppajjanti sabbe te bālato uppajjanti, no paṇḍitato.\nIti kho, bhikkhave, sappaṭibhayo bālo, appaṭibhayo paṇḍito;\nsaupaddavo bālo, anupaddavo paṇḍito;\nsaupasaggo bālo, anupasaggo paṇḍito.\nNatthi, bhikkhave, paṇḍitato bhayaṁ, natthi paṇḍitato upaddavo, natthi paṇḍitato upasaggo.\nTasmātiha, bhikkhave, ‘paṇḍitā bhavissāma vīmaṁsakā’ti—\nevañhi vo, bhikkhave, sikkhitabban”ti.","en":"“Whatever dangers there are, all come from the foolish, not from the astute.\nWhatever perils there are, all come from the foolish, not from the astute.\nWhatever hazards there are, all come from the foolish, not from the astute.\nIt’s like a fire that spreads from a hut made of reeds or grass, and burns down even a bungalow, plastered inside and out, draft-free, with doors fastened and windows shuttered.\nIn the same way, whatever dangers there are, all come from the foolish, not from the astute.\nWhatever perils there are, all come from the foolish, not from the astute.\nWhatever hazards there are, all come from the foolish, not from the astute.\nSo, the fool is dangerous, but the astute person is safe.\nThe fool is perilous, but the astute person is not.\nThe fool is hazardous, but the astute person is not.\nThere’s no danger, peril, or hazard that comes from the astute.\nSo you should train like this: ‘We shall be astute, we shall be inquirers.’”"}},{"id":"mn115:3","sourceIds":["mn115:3.1","mn115:3.2","mn115:3.3","mn115:3.4"],"kind":"text","text":{"pi":"Evaṁ vutte, āyasmā ānando bhagavantaṁ etadavoca:\n“kittāvatā nu kho, bhante, paṇḍito bhikkhu ‘vīmaṁsako’ti alaṁvacanāyā”ti?\n“Yato kho, ānanda, bhikkhu dhātukusalo ca hoti, āyatanakusalo ca hoti, paṭiccasamuppādakusalo ca hoti, ṭhānāṭhānakusalo ca hoti—\nettāvatā kho, ānanda, paṇḍito bhikkhu ‘vīmaṁsako’ti alaṁvacanāyā”ti.","en":"When he said this, Venerable Ānanda said to the Buddha,\n“Sir, how is a mendicant qualified to be called ‘astute, an inquirer’?”\n“Ānanda, it’s when a mendicant is skilled in the elements, in the sense fields, in dependent origination, and in the possible and the impossible.\nThat’s how a mendicant is qualified to be called ‘astute, an inquirer’.”"}},{"id":"mn115:4","sourceIds":["mn115:4.1","mn115:4.2","mn115:4.3","mn115:4.4","mn115:4.5","mn115:4.6","mn115:4.7","mn115:4.8","mn115:4.9","mn115:4.10"],"kind":"text","text":{"pi":"“Kittāvatā pana, bhante, ‘dhātukusalo bhikkhū’ti alaṁvacanāyā”ti?\n“Aṭṭhārasa kho imā, ānanda, dhātuyo—\ncakkhudhātu, rūpadhātu, cakkhuviññāṇadhātu;\nsotadhātu, saddadhātu, sotaviññāṇadhātu;\nghānadhātu, gandhadhātu, ghānaviññāṇadhātu;\njivhādhātu, rasadhātu, jivhāviññāṇadhātu;\nkāyadhātu, phoṭṭhabbadhātu, kāyaviññāṇadhātu;\nmanodhātu, dhammadhātu, manoviññāṇadhātu.\nImā kho, ānanda, aṭṭhārasa dhātuyo yato jānāti passati—\nettāvatāpi kho, ānanda, ‘dhātukusalo bhikkhū’ti alaṁvacanāyā”ti.","en":"“But sir, how is a mendicant qualified to be called ‘skilled in the elements’?”\n“There are, Ānanda, these eighteen elements.\nThe eye element, sight element, and eye consciousness element.\nThe ear element, sound element, and ear consciousness element.\nThe nose element, smell element, and nose consciousness element.\nThe tongue element, taste element, and tongue consciousness element.\nThe body element, touch element, and body consciousness element.\nThe mind element, ideas element, and mind consciousness element.\nWhen a mendicant knows and sees these eighteen elements,\nthey’re qualified to be called ‘skilled in the elements’.”"}},{"id":"mn115:5","sourceIds":["mn115:5.1","mn115:5.2","mn115:5.3","mn115:5.4","mn115:5.5","mn115:5.6"],"kind":"text","text":{"pi":"“Siyā pana, bhante, aññopi pariyāyo, yathā ‘dhātukusalo bhikkhū’ti alaṁvacanāyā”ti?\n“Siyā, ānanda.\nChayimā, ānanda, dhātuyo—\npathavīdhātu, āpodhātu, tejodhātu, vāyodhātu, ākāsadhātu, viññāṇadhātu.\nImā kho, ānanda, cha dhātuyo yato jānāti passati—\nettāvatāpi kho, ānanda, ‘dhātukusalo bhikkhū’ti alaṁvacanāyā”ti.","en":"“But sir, could there be another way in which a mendicant is qualified to be called ‘skilled in the elements’?”\n“There could, Ānanda.\nThere are these six elements:\nthe elements of earth, water, fire, air, space, and consciousness.\nWhen a mendicant knows and sees these six elements,\nthey’re qualified to be called ‘skilled in the elements’.”"}},{"id":"mn115:6","sourceIds":["mn115:6.1","mn115:6.2","mn115:6.3","mn115:6.4","mn115:6.5","mn115:6.6"],"kind":"text","text":{"pi":"“Siyā pana, bhante, aññopi pariyāyo, yathā ‘dhātukusalo bhikkhū’ti alaṁvacanāyā”ti?\n“Siyā, ānanda.\nChayimā, ānanda, dhātuyo—\nsukhadhātu, dukkhadhātu, somanassadhātu, domanassadhātu, upekkhādhātu, avijjādhātu.\nImā kho, ānanda, cha dhātuyo yato jānāti passati—\nettāvatāpi kho, ānanda, ‘dhātukusalo bhikkhū’ti alaṁvacanāyā”ti.","en":"“But sir, could there be another way in which a mendicant is qualified to be called ‘skilled in the elements’?”\n“There could, Ānanda.\nThere are these six elements:\nthe elements of pleasure, pain, happiness, sadness, equanimity, and ignorance.\nWhen a mendicant knows and sees these six elements,\nthey’re qualified to be called ‘skilled in the elements’.”"}},{"id":"mn115:7","sourceIds":["mn115:7.1","mn115:7.2","mn115:7.3","mn115:7.4","mn115:7.5","mn115:7.6"],"kind":"text","text":{"pi":"“Siyā pana, bhante, aññopi pariyāyo, yathā ‘dhātukusalo bhikkhū’ti alaṁvacanāyā”ti?\n“Siyā, ānanda.\nChayimā, ānanda, dhātuyo—\nkāmadhātu, nekkhammadhātu, byāpādadhātu, abyāpādadhātu, vihiṁsādhātu, avihiṁsādhātu.\nImā kho, ānanda, cha dhātuyo yato jānāti passati—\nettāvatāpi kho, ānanda, ‘dhātukusalo bhikkhū’ti alaṁvacanāyā”ti.","en":"“But sir, could there be another way in which a mendicant is qualified to be called ‘skilled in the elements’?”\n“There could, Ānanda.\nThere are these six elements:\nthe elements of sensuality and renunciation, malice and good will, and cruelty and harmlessness.\nWhen a mendicant knows and sees these six elements,\nthey’re qualified to be called ‘skilled in the elements’.”"}},{"id":"mn115:8","sourceIds":["mn115:8.1","mn115:8.2","mn115:8.3","mn115:8.4","mn115:8.5","mn115:8.6"],"kind":"text","text":{"pi":"“Siyā pana, bhante, aññopi pariyāyo, yathā ‘dhātukusalo bhikkhū’ti alaṁvacanāyā”ti?\n“Siyā, ānanda.\nTisso imā, ānanda, dhātuyo—\nkāmadhātu, rūpadhātu, arūpadhātu.\nImā kho, ānanda, tisso dhātuyo yato jānāti passati—\nettāvatāpi kho, ānanda, ‘dhātukusalo bhikkhū’ti alaṁvacanāyā”ti.","en":"“But sir, could there be another way in which a mendicant is qualified to be called ‘skilled in the elements’?”\n“There could, Ānanda.\nThere are these three elements:\nthe sensual realm, the realm of luminous form, and the formless realm.\nWhen a mendicant knows and sees these three elements,\nthey’re qualified to be called ‘skilled in the elements’.”"}},{"id":"mn115:9","sourceIds":["mn115:9.1","mn115:9.2","mn115:9.3","mn115:9.4","mn115:9.5","mn115:9.6"],"kind":"text","text":{"pi":"“Siyā pana, bhante, aññopi pariyāyo, yathā ‘dhātukusalo bhikkhū’ti alaṁvacanāyā”ti?\n“Siyā, ānanda.\nDve imā, ānanda, dhātuyo—\nsaṅkhatādhātu, asaṅkhatādhātu.\nImā kho, ānanda, dve dhātuyo yato jānāti passati—\nettāvatāpi kho, ānanda, ‘dhātukusalo bhikkhū’ti alaṁvacanāyā”ti.","en":"“But sir, could there be another way in which a mendicant is qualified to be called ‘skilled in the elements’?”\n“There could, Ānanda.\nThere are these two elements:\nthe conditioned element and the unconditioned element.\nWhen a mendicant knows and sees these two elements,\nthey’re qualified to be called ‘skilled in the elements’.”"}},{"id":"mn115:10","sourceIds":["mn115:10.1","mn115:10.2","mn115:10.3","mn115:10.4","mn115:10.5"],"kind":"text","text":{"pi":"“Kittāvatā pana, bhante, ‘āyatanakusalo bhikkhū’ti alaṁvacanāyā”ti?\n“Cha kho panimāni, ānanda, ajjhattikabāhirāni āyatanāni—\ncakkhu ceva rūpā ca sotañca saddā ca ghānañca gandhā ca jivhā ca rasā ca kāyo ca phoṭṭhabbā ca mano ca dhammā ca.\nImāni kho, ānanda, cha ajjhattikabāhirāni āyatanāni yato jānāti passati—\nettāvatā kho, ānanda, ‘āyatanakusalo bhikkhū’ti alaṁvacanāyā”ti.","en":"“But sir, how is a mendicant qualified to be called ‘skilled in the sense fields’?”\n“There are these six interior and exterior sense fields:\nthe eye and sights, the ear and sounds, the nose and smells, the tongue and tastes, the body and touches, and the mind and ideas.\nWhen a mendicant knows and sees these six interior and exterior sense fields,\nthey’re qualified to be called ‘skilled in the sense fields’.”"}},{"id":"mn115:11","sourceIds":["mn115:11.1","mn115:11.2","mn115:11.3","mn115:11.4","mn115:11.5","mn115:11.6","mn115:11.7","mn115:11.8","mn115:11.9","mn115:11.10","mn115:11.11","mn115:11.12","mn115:11.13","mn115:11.14","mn115:11.15","mn115:11.16","mn115:11.17","mn115:11.18","mn115:11.19","mn115:11.20","mn115:11.21","mn115:11.22","mn115:11.23","mn115:11.24","mn115:11.25","mn115:11.26","mn115:11.27","mn115:11.28","mn115:11.29"],"kind":"text","text":{"pi":"“Kittāvatā pana, bhante, ‘paṭiccasamuppādakusalo bhikkhū’ti alaṁvacanāyā”ti?\n“Idhānanda, bhikkhu evaṁ pajānāti:\n‘imasmiṁ sati idaṁ hoti, imassuppādā idaṁ uppajjati,\nimasmiṁ asati idaṁ na hoti, imassa nirodhā idaṁ nirujjhati, yadidaṁ—\navijjāpaccayā saṅkhārā,\nsaṅkhārapaccayā viññāṇaṁ,\nviññāṇapaccayā nāmarūpaṁ,\nnāmarūpapaccayā saḷāyatanaṁ,\nsaḷāyatanapaccayā phasso,\nphassapaccayā vedanā,\nvedanāpaccayā taṇhā,\ntaṇhāpaccayā upādānaṁ,\nupādānapaccayā bhavo,\nbhavapaccayā jāti,\njātipaccayā jarāmaraṇaṁ sokaparidevadukkhadomanassūpāyāsā sambhavanti.\nEvametassa kevalassa dukkhakkhandhassa samudayo hoti.\nAvijjāya tveva asesavirāganirodhā saṅkhāranirodho,\nsaṅkhāranirodhā viññāṇanirodho,\nviññāṇanirodhā nāmarūpanirodho,\nnāmarūpanirodhā saḷāyatananirodho,\nsaḷāyatananirodhā phassanirodho,\nphassanirodhā vedanānirodho,\nvedanānirodhā taṇhānirodho,\ntaṇhānirodhā upādānanirodho,\nupādānanirodhā bhavanirodho,\nbhavanirodhā jātinirodho,\njātinirodhā jarāmaraṇaṁ sokaparidevadukkhadomanassūpāyāsā nirujjhanti.\nEvametassa kevalassa dukkhakkhandhassa nirodho hoti’.\nEttāvatā kho, ānanda, ‘paṭiccasamuppādakusalo bhikkhū’ti alaṁvacanāyā”ti.","en":"“But sir, how is a mendicant qualified to be called ‘skilled in dependent origination’?”\n“It’s when a mendicant understands:\n‘When this exists, this comes to be; due to the arising of this, this arises.\nWhen this doesn’t exist, this doesn’t come to be; due to the cessation of this, this ceases. That is:\nignorance is a requirement for choices.\nChoices are a condition for consciousness.\nConsciousness is a requirement for name and form.\nName and form are requirements for the six sense fields.\nThe six sense fields are requirements for contact.\nContact is a requirement for feeling.\nFeeling is a requirement for craving.\nCraving is a requirement for grasping.\nGrasping is a requirement for continued existence.\nContinued existence is a requirement for rebirth.\nRebirth is a requirement for old age and death, sorrow, lamentation, pain, sadness, and distress to come to be.\nThat is how this entire mass of suffering originates.\nWhen ignorance fades away and ceases no residue left behind, choices cease.\nWhen choices cease, consciousness ceases.\nWhen consciousness ceases, name and form cease.\nWhen name and form cease, the six sense fields cease.\nWhen the six sense fields cease, contact ceases.\nWhen contact ceases, feeling ceases.\nWhen feeling ceases, craving ceases.\nWhen craving ceases, grasping ceases.\nWhen grasping ceases, continued existence ceases.\nWhen continued existence ceases, rebirth ceases.\nWhen rebirth ceases, old age and death, sorrow, lamentation, pain, sadness, and distress cease.\nThat is how this entire mass of suffering ceases.’\nThat’s how a mendicant is qualified to be called ‘skilled in dependent origination’.”"}},{"id":"mn115:12","sourceIds":["mn115:12.1","mn115:12.2","mn115:12.3","mn115:12.4","mn115:12.5","mn115:12.6","mn115:12.7"],"kind":"text","text":{"pi":"“Kittāvatā pana, bhante, ‘ṭhānāṭhānakusalo bhikkhū’ti alaṁvacanāyā”ti?\n“Idhānanda, bhikkhu ‘aṭṭhānametaṁ anavakāso yaṁ diṭṭhisampanno puggalo kañci saṅkhāraṁ niccato upagaccheyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puthujjano kañci saṅkhāraṁ niccato upagaccheyya, ṭhānametaṁ vijjatī’ti pajānāti;\n‘aṭṭhānametaṁ anavakāso yaṁ diṭṭhisampanno puggalo kañci saṅkhāraṁ sukhato upagaccheyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puthujjano kañci saṅkhāraṁ sukhato upagaccheyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ diṭṭhisampanno puggalo kañci dhammaṁ attato upagaccheyya, netaṁ ṭhānaṁ vijjatī’ti pajānāti,\n‘ṭhānañca kho etaṁ vijjati yaṁ puthujjano kañci dhammaṁ attato upagaccheyya, ṭhānametaṁ vijjatī’ti pajānāti.","en":"“But sir, how is a mendicant qualified to be called ‘skilled in the possible and impossible’?”\n“It’s when a mendicant understands: ‘It’s impossible for an individual accomplished in view to take any condition as permanent. That is not possible.\nBut it’s possible for an ordinary person to take some condition as permanent. That is possible.’\nThey understand: ‘It’s impossible for an individual accomplished in view to take any condition as pleasant.\nBut it’s possible for an ordinary person to take some condition as pleasant.’\nThey understand: ‘It’s impossible for an individual accomplished in view to take anything as self.\nBut it’s possible for an ordinary person to take something as self.’"}},{"id":"mn115:13","sourceIds":["mn115:13.1","mn115:13.2","mn115:13.3","mn115:13.4","mn115:13.5","mn115:13.6","mn115:13.7","mn115:13.8","mn115:13.9","mn115:13.10"],"kind":"text","text":{"pi":"‘Aṭṭhānametaṁ anavakāso yaṁ diṭṭhisampanno puggalo mātaraṁ jīvitā voropeyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puthujjano mātaraṁ jīvitā voropeyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ diṭṭhisampanno puggalo pitaraṁ jīvitā voropeyya …pe…\narahantaṁ jīvitā voropeyya, ṭhānametaṁ vijjatī’ti pajānāti;\n‘aṭṭhānametaṁ anavakāso yaṁ diṭṭhisampanno puggalo duṭṭhacitto tathāgatassa lohitaṁ uppādeyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puthujjano duṭṭhacitto tathāgatassa lohitaṁ uppādeyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ diṭṭhisampanno puggalo saṅghaṁ bhindeyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puthujjano saṅghaṁ bhindeyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ diṭṭhisampanno puggalo aññaṁ satthāraṁ uddiseyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puthujjano aññaṁ satthāraṁ uddiseyya, ṭhānametaṁ vijjatī’ti pajānāti.","en":"They understand: ‘It’s impossible for an individual accomplished in view to murder their mother.\nBut it’s possible for an ordinary person to murder their mother.’\nThey understand: ‘It’s impossible for an individual accomplished in view to murder their father … or murder a perfected one.\nBut it’s possible for an ordinary person to murder their father … or murder a perfected one.’\nThey understand: ‘It’s impossible for an individual accomplished in view to injure a Realized One with malicious intent.\nBut it’s possible for an ordinary person to injure a Realized One with malicious intent.’\nThey understand: ‘It’s impossible for an individual accomplished in view to cause a schism in the Saṅgha.\nBut it’s possible for an ordinary person to cause a schism in the Saṅgha.’\nThey understand: ‘It’s impossible for an individual accomplished in view to dedicate themselves to another teacher.\nBut it’s possible for an ordinary person to dedicate themselves to another teacher.’"}},{"id":"mn115:14","sourceIds":["mn115:14.1","mn115:14.2","mn115:14.3","mn115:14.4"],"kind":"text","text":{"pi":"‘Aṭṭhānametaṁ anavakāso yaṁ ekissā lokadhātuyā dve arahanto sammāsambuddhā apubbaṁ acarimaṁ uppajjeyyuṁ, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ ekissā lokadhātuyā eko arahaṁ sammāsambuddho uppajjeyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ ekissā lokadhātuyā dve rājāno cakkavattino apubbaṁ acarimaṁ uppajjeyyuṁ, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ ekissā lokadhātuyā eko rājā cakkavattī uppajjeyya, ṭhānametaṁ vijjatī’ti pajānāti.","en":"They understand: ‘It’s impossible for two perfected ones, fully awakened Buddhas to arise in the same solar system at the same time.\nBut it is possible for just one perfected one, a fully awakened Buddha, to arise in one solar system.’\nThey understand: ‘It’s impossible for two wheel-turning monarchs to arise in the same solar system at the same time.\nBut it is possible for just one wheel-turning monarch to arise in one solar system.’"}},{"id":"mn115:15","sourceIds":["mn115:15.1","mn115:15.2","mn115:15.3","mn115:15.4","mn115:15.5","mn115:15.6"],"kind":"text","text":{"pi":"‘Aṭṭhānametaṁ anavakāso yaṁ itthī arahaṁ assa sammāsambuddho, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puriso arahaṁ assa sammāsambuddho, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ itthī rājā assa cakkavattī, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puriso rājā assa cakkavattī, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ itthī sakkattaṁ kareyya … mārattaṁ kareyya … brahmattaṁ kareyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ puriso sakkattaṁ kareyya … mārattaṁ kareyya … brahmattaṁ kareyya, ṭhānametaṁ vijjatī’ti pajānāti.","en":"They understand: ‘It’s impossible for a woman to be a perfected one, a fully awakened Buddha.\nBut it is possible for a man to be a perfected one, a fully awakened Buddha.’\nThey understand: ‘It’s impossible for a woman to be a wheel-turning monarch.\nBut it is possible for a man to be a wheel-turning monarch.’\nThey understand: ‘It’s impossible for a woman to perform the role of Sakka, Māra, or the Divinity.\nBut it is possible for a man to perform the role of Sakka, Māra, or the Divinity.’"}},{"id":"mn115:16","sourceIds":["mn115:16.1","mn115:16.2","mn115:16.3","mn115:16.4","mn115:16.5","mn115:16.6"],"kind":"text","text":{"pi":"‘Aṭṭhānametaṁ anavakāso yaṁ kāyaduccaritassa iṭṭho kanto manāpo vipāko nibbatteyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ kāyaduccaritassa aniṭṭho akanto amanāpo vipāko nibbatteyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ vacīduccaritassa …pe…\nyaṁ manoduccaritassa iṭṭho kanto manāpo vipāko nibbatteyya, netaṁ ṭhānaṁ vijjatī’ti pajānāti;\nṭhānañca kho etaṁ vijjati yaṁ vacīduccaritassa …pe…\nyaṁ manoduccaritassa aniṭṭho akanto amanāpo vipāko nibbatteyya, ṭhānametaṁ vijjatīti pajānāti.","en":"They understand: ‘It’s impossible for a likable, desirable, agreeable result to come from bad conduct of body, speech, and mind.\nBut it is possible for an unlikable, undesirable, disagreeable result to come from bad conduct of body, speech, and mind.’"}},{"id":"mn115:17","sourceIds":["mn115:17.1","mn115:17.2","mn115:17.3","mn115:17.4","mn115:17.5","mn115:17.6"],"kind":"text","text":{"pi":"‘Aṭṭhānametaṁ anavakāso yaṁ kāyasucaritassa aniṭṭho akanto amanāpo vipāko nibbatteyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ kāyasucaritassa iṭṭho kanto manāpo vipāko nibbatteyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ vacīsucaritassa …pe…\nyaṁ manosucaritassa aniṭṭho akanto amanāpo vipāko nibbatteyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ vacīsucaritassa …pe…\nyaṁ manosucaritassa iṭṭho kanto manāpo vipāko nibbatteyya, ṭhānametaṁ vijjatī’ti pajānāti.","en":"They understand: ‘It’s impossible for an unlikable, undesirable, disagreeable result to come from good conduct of body, speech, and mind.\nBut it is possible for a likable, desirable, agreeable result to come from good conduct of body, speech, and mind.’"}},{"id":"mn115:18","sourceIds":["mn115:18.1","mn115:18.2"],"kind":"text","text":{"pi":"‘Aṭṭhānametaṁ anavakāso yaṁ kāyaduccaritasamaṅgī taṁnidānā tappaccayā kāyassa bhedā paraṁ maraṇā sugatiṁ saggaṁ lokaṁ upapajjeyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ kāyaduccaritasamaṅgī taṁnidānā tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya, ṭhānametaṁ vijjatī’ti pajānāti.","en":"They understand: ‘It’s impossible that someone who has engaged in bad conduct of body, speech, and mind, could for that reason alone, when their body breaks up, after death, be reborn in a good place, a heavenly realm.\nBut it is possible that someone who has engaged in bad conduct of body, speech, and mind could, for that reason alone, when their body breaks up, after death, be reborn in a place of loss, a bad place, the underworld, hell.’"}},{"id":"mn115:19","sourceIds":["mn115:19.1","mn115:19.2","mn115:19.3","mn115:19.4","mn115:19.5","mn115:19.6","mn115:19.7","mn115:19.8","mn115:19.9","mn115:19.10","mn115:19.11"],"kind":"text","text":{"pi":"‘Aṭṭhānametaṁ anavakāso yaṁ vacīduccaritasamaṅgī …pe…\nyaṁ manoduccaritasamaṅgī taṁnidānā tappaccayā kāyassa bhedā paraṁ maraṇā sugatiṁ saggaṁ lokaṁ upapajjeyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ vacīduccaritasamaṅgī …pe…\nyaṁ manoduccaritasamaṅgī taṁnidānā tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ kāyasucaritasamaṅgī taṁnidānā tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ kāyasucaritasamaṅgī taṁnidānā tappaccayā kāyassa bhedā paraṁ maraṇā sugatiṁ saggaṁ lokaṁ upapajjeyya, ṭhānametaṁ vijjatī’ti pajānāti.\n‘Aṭṭhānametaṁ anavakāso yaṁ vacīsucaritasamaṅgī …pe…\nyaṁ manosucaritasamaṅgī taṁnidānā tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya, netaṁ ṭhānaṁ vijjatī’ti pajānāti;\n‘ṭhānañca kho etaṁ vijjati yaṁ vacīsucaritasamaṅgī …pe…\nyaṁ manosucaritasamaṅgī taṁnidānā tappaccayā kāyassa bhedā paraṁ maraṇā sugatiṁ saggaṁ lokaṁ upapajjeyya, ṭhānametaṁ vijjatī’ti pajānāti.\nEttāvatā kho, ānanda, ‘ṭhānāṭhānakusalo bhikkhū’ti alaṁvacanāyā”ti.","en":"They understand: ‘It’s impossible that someone who has engaged in good conduct of body, speech, and mind could, for that reason alone, when their body breaks up, after death, be reborn in a place of loss, a bad place, the underworld, hell.\nBut it is possible that someone who has engaged in good conduct of body, speech, and mind could, for that reason alone, when their body breaks up, after death, be reborn in a good place, a heavenly realm.’\nThat’s how a mendicant is qualified to be called ‘skilled in the possible and impossible’.”"}},{"id":"mn115:20","sourceIds":["mn115:20.1","mn115:20.2","mn115:20.3","mn115:20.4","mn115:20.5","mn115:20.6","mn115:20.7"],"kind":"text","text":{"pi":"Evaṁ vutte, āyasmā ānando bhagavantaṁ etadavoca:\n“acchariyaṁ, bhante, abbhutaṁ, bhante.\nKonāmo ayaṁ, bhante, dhammapariyāyo”ti?\n“Tasmātiha tvaṁ, ānanda, imaṁ dhammapariyāyaṁ ‘bahudhātuko’tipi naṁ dhārehi, ‘catuparivaṭṭo’tipi naṁ dhārehi, ‘dhammādāso’tipi naṁ dhārehi, ‘amatadundubhī’tipi naṁ dhārehi, ‘anuttaro saṅgāmavijayo’tipi naṁ dhārehī”ti.\nIdamavoca bhagavā.\nAttamano āyasmā ānando bhagavato bhāsitaṁ abhinandīti.\nBahudhātukasuttaṁ niṭṭhitaṁ pañcamaṁ.","en":"When he said this, Venerable Ānanda said to the Buddha,\n“It’s incredible, sir, it’s amazing!\nWhat is the name of this exposition of the teaching?”\n“Well then, Ānanda, you may remember this exposition of the teaching as ‘The Many Elements’, or else ‘The Four Rounds’, or else ‘The Mirror of the Teaching’, or else ‘The Drum of Freedom From Death’, or else ‘The Supreme Victory in Battle’.”\nThat is what the Buddha said.\nSatisfied, Venerable Ānanda approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn115/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}