{"id":"mn2","title":"All the Defilements","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn2","title":"All the Defilements","units":[{"id":"mn2:0","sourceIds":["mn2:0.1","mn2:0.2"],"kind":"text","text":{"pi":"Majjhima Nikāya 2\nSabbāsavasutta","en":"Middle Discourses 2\nAll the Defilements"}},{"id":"mn2:1","sourceIds":["mn2:1.1","mn2:1.2","mn2:1.3","mn2:1.4","mn2:1.5","mn2:1.6"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.\nTatra kho bhagavā bhikkhū āmantesi:\n“bhikkhavo”ti.\n“Bhadante”ti te bhikkhū bhagavato paccassosuṁ.\nBhagavā etadavoca:","en":"So I have heard.\nAt one time the Buddha was staying near Sāvatthī in Jeta’s Grove, Anāthapiṇḍika’s monastery.\nThere the Buddha addressed the mendicants,\n“Mendicants!”\n“Venerable sir,” they replied.\nThe Buddha said this:"}},{"id":"mn2:2","sourceIds":["mn2:2.1","mn2:2.2","mn2:2.3","mn2:2.4"],"kind":"text","text":{"pi":"“sabbāsavasaṁvarapariyāyaṁ vo, bhikkhave, desessāmi.\nTaṁ suṇātha, sādhukaṁ manasi karotha, bhāsissāmī”ti.\n“Evaṁ, bhante”ti kho te bhikkhū bhagavato paccassosuṁ.\nBhagavā etadavoca:","en":"“Mendicants, I will teach you the explanation of the restraint of all defilements.\nListen and apply your mind well, I will speak.”\n“Yes, sir,” they replied.\nThe Buddha said this:"}},{"id":"mn2:3","sourceIds":["mn2:3.1","mn2:3.2","mn2:3.3","mn2:3.4","mn2:3.5"],"kind":"text","text":{"pi":"“Jānato ahaṁ, bhikkhave, passato āsavānaṁ khayaṁ vadāmi, no ajānato no apassato.\nKiñca, bhikkhave, jānato kiñca passato āsavānaṁ khayaṁ vadāmi?\nYoniso ca manasikāraṁ ayoniso ca manasikāraṁ.\nAyoniso, bhikkhave, manasikaroto anuppannā ceva āsavā uppajjanti, uppannā ca āsavā pavaḍḍhanti;\nyoniso ca kho, bhikkhave, manasikaroto anuppannā ceva āsavā na uppajjanti, uppannā ca āsavā pahīyanti.","en":"“Mendicants, I say that the ending of defilements is for one who knows and sees, not for one who does not know or see.\nFor one who knows and sees what?\nRational application of mind and irrational application of mind.\nWhen you apply the mind irrationally, defilements arise, and once arisen they grow.\nWhen you apply the mind rationally, defilements don’t arise, and those that have already arisen are given up."}},{"id":"mn2:4","sourceIds":["mn2:4.1"],"kind":"text","text":{"pi":"Atthi, bhikkhave, āsavā dassanā pahātabbā, atthi āsavā saṁvarā pahātabbā, atthi āsavā paṭisevanā pahātabbā, atthi āsavā adhivāsanā pahātabbā, atthi āsavā parivajjanā pahātabbā, atthi āsavā vinodanā pahātabbā, atthi āsavā bhāvanā pahātabbā.","en":"Some defilements should be given up by seeing, some by restraint, some by using, some by enduring, some by avoiding, some by dispelling, and some by developing."}},{"id":"mn2:5","sourceIds":["mn2:5.0","mn2:5.1","mn2:5.2","mn2:5.3","mn2:5.4"],"kind":"text","text":{"pi":"1. Dassanāpahātabbaāsava\nKatame ca, bhikkhave, āsavā dassanā pahātabbā?\nIdha, bhikkhave, assutavā puthujjano ariyānaṁ adassāvī ariyadhammassa akovido ariyadhamme avinīto, sappurisānaṁ adassāvī sappurisadhammassa akovido sappurisadhamme avinīto—\nmanasikaraṇīye dhamme nappajānāti, amanasikaraṇīye dhamme nappajānāti.\nSo manasikaraṇīye dhamme appajānanto amanasikaraṇīye dhamme appajānanto, ye dhammā na manasikaraṇīyā, te dhamme manasi karoti, ye dhammā manasikaraṇīyā te dhamme na manasi karoti.","en":"1. Defilements Given Up by Seeing\nAnd what are the defilements that should be given up by seeing?\nTake an unlearned ordinary person who has not seen the noble ones, and is neither skilled nor trained in the teaching of the noble ones. They’ve not seen true persons, and are neither skilled nor trained in the teaching of the true persons.\nThey don’t understand to which things they should apply the mind and to which things they should not apply the mind.\nSo they apply the mind to things they shouldn’t and don’t apply the mind to things they should."}},{"id":"mn2:6","sourceIds":["mn2:6.1","mn2:6.2","mn2:6.3","mn2:6.4","mn2:6.5","mn2:6.6","mn2:6.7","mn2:6.8","mn2:6.9","mn2:6.10"],"kind":"text","text":{"pi":"Katame ca, bhikkhave, dhammā na manasikaraṇīyā ye dhamme manasi karoti?\nYassa, bhikkhave, dhamme manasikaroto anuppanno vā kāmāsavo uppajjati, uppanno vā kāmāsavo pavaḍḍhati;\nanuppanno vā bhavāsavo uppajjati, uppanno vā bhavāsavo pavaḍḍhati;\nanuppanno vā avijjāsavo uppajjati, uppanno vā avijjāsavo pavaḍḍhati—\nime dhammā na manasikaraṇīyā ye dhamme manasi karoti.\nKatame ca, bhikkhave, dhammā manasikaraṇīyā ye dhamme na manasi karoti?\nYassa, bhikkhave, dhamme manasikaroto anuppanno vā kāmāsavo na uppajjati, uppanno vā kāmāsavo pahīyati;\nanuppanno vā bhavāsavo na uppajjati, uppanno vā bhavāsavo pahīyati;\nanuppanno vā avijjāsavo na uppajjati, uppanno vā avijjāsavo pahīyati—\nime dhammā manasikaraṇīyā ye dhamme na manasi karoti.","en":"And what are the things to which they apply the mind but should not?\nThey are the things that, when the mind is applied to them, give rise to unarisen defilements and make arisen defilements grow: the defilements of sensual desire,\ndesire to be reborn,\nand ignorance.\nThese are the things to which they apply the mind but should not.\nAnd what are the things to which they do not apply the mind but should?\nThey are the things that, when the mind is applied to them, do not give rise to unarisen defilements and give up arisen defilements: the defilements of sensual desire,\ndesire to be reborn,\nand ignorance.\nThese are the things to which they do not apply the mind but should."}},{"id":"mn2:7","sourceIds":["mn2:7.1","mn2:7.2","mn2:7.3","mn2:7.4","mn2:7.5","mn2:7.6"],"kind":"text","text":{"pi":"Tassa amanasikaraṇīyānaṁ dhammānaṁ manasikārā manasikaraṇīyānaṁ dhammānaṁ amanasikārā anuppannā ceva āsavā uppajjanti uppannā ca āsavā pavaḍḍhanti.\nSo evaṁ ayoniso manasi karoti:\n‘ahosiṁ nu kho ahaṁ atītamaddhānaṁ? Na nu kho ahosiṁ atītamaddhānaṁ? Kiṁ nu kho ahosiṁ atītamaddhānaṁ? Kathaṁ nu kho ahosiṁ atītamaddhānaṁ? Kiṁ hutvā kiṁ ahosiṁ nu kho ahaṁ atītamaddhānaṁ?\nBhavissāmi nu kho ahaṁ anāgatamaddhānaṁ? Na nu kho bhavissāmi anāgatamaddhānaṁ? Kiṁ nu kho bhavissāmi anāgatamaddhānaṁ? Kathaṁ nu kho bhavissāmi anāgatamaddhānaṁ? Kiṁ hutvā kiṁ bhavissāmi nu kho ahaṁ anāgatamaddhānan’ti?\nEtarahi vā paccuppannamaddhānaṁ ajjhattaṁ kathaṅkathī hoti:\n‘ahaṁ nu khosmi? No nu khosmi? Kiṁ nu khosmi? Kathaṁ nu khosmi? Ayaṁ nu kho satto kuto āgato? So kuhiṁ gāmī bhavissatī’ti?","en":"Because of applying the mind to what they should not and not applying the mind to what they should, unarisen defilements arise and arisen defilements grow.\nThis is how they apply the mind irrationally:\n‘Did I exist in the past? Did I not exist in the past? What was I in the past? How was I in the past? After being what, what did I become in the past?\nWill I exist in the future? Will I not exist in the future? What will I be in the future? How will I be in the future? After being what, what will I become in the future?’\nOr they are undecided about the present thus:\n‘Am I? Am I not? What am I? How am I? This sentient being—where did it come from? And where will it go?’"}},{"id":"mn2:8","sourceIds":["mn2:8.1","mn2:8.2","mn2:8.3","mn2:8.4","mn2:8.5","mn2:8.6","mn2:8.7","mn2:8.8","mn2:8.9","mn2:8.10","mn2:8.11"],"kind":"text","text":{"pi":"Tassa evaṁ ayoniso manasikaroto channaṁ diṭṭhīnaṁ aññatarā diṭṭhi uppajjati.\n‘Atthi me attā’ti vā assa saccato thetato diṭṭhi uppajjati;\n‘natthi me attā’ti vā assa saccato thetato diṭṭhi uppajjati;\n‘attanāva attānaṁ sañjānāmī’ti vā assa saccato thetato diṭṭhi uppajjati;\n‘attanāva anattānaṁ sañjānāmī’ti vā assa saccato thetato diṭṭhi uppajjati;\n‘anattanāva attānaṁ sañjānāmī’ti vā assa saccato thetato diṭṭhi uppajjati;\natha vā panassa evaṁ diṭṭhi hoti:\n‘yo me ayaṁ attā vado vedeyyo tatra tatra kalyāṇapāpakānaṁ kammānaṁ vipākaṁ paṭisaṁvedeti so kho pana me ayaṁ attā nicco dhuvo sassato avipariṇāmadhammo sassatisamaṁ tatheva ṭhassatī’ti.\nIdaṁ vuccati, bhikkhave, diṭṭhigataṁ diṭṭhigahanaṁ diṭṭhikantāraṁ diṭṭhivisūkaṁ diṭṭhivipphanditaṁ diṭṭhisaṁyojanaṁ.\nDiṭṭhisaṁyojanasaṁyutto, bhikkhave, assutavā puthujjano na parimuccati jātiyā jarāya maraṇena sokehi paridevehi dukkhehi domanassehi upāyāsehi;\n‘na parimuccati dukkhasmā’ti vadāmi.","en":"When they apply the mind irrationally in this way, one of the following six views arises in them and is taken as a genuine fact.\nThe view: ‘My self survives.’\nThe view: ‘My self does not survive.’\nThe view: ‘I perceive the self with the self.’\nThe view: ‘I perceive what is not-self with the self.’\nThe view: ‘I perceive the self with what is not-self.’\nOr they have such a view:\n‘This self of mine is he, the one who speaks, the one who knows, who experiences the results of good and bad deeds in all the different realms. This self is permanent, everlasting, eternal, and imperishable, and will last forever and ever.’\nThis is called a misconception, the thicket of views, the desert of views, the twist of views, the dodge of views, the fetter of views.\nAn unlearned ordinary person who is fettered by views is not freed from rebirth, old age, and death, from sorrow, lamentation, pain, sadness, and distress.\nThey’re not freed from suffering, I say."}},{"id":"mn2:9","sourceIds":["mn2:9.1","mn2:9.2","mn2:9.3","mn2:9.4"],"kind":"text","text":{"pi":"Sutavā ca kho, bhikkhave, ariyasāvako—\nariyānaṁ dassāvī ariyadhammassa kovido ariyadhamme suvinīto, sappurisānaṁ dassāvī sappurisadhammassa kovido sappurisadhamme suvinīto—\nmanasikaraṇīye dhamme pajānāti amanasikaraṇīye dhamme pajānāti.\nSo manasikaraṇīye dhamme pajānanto amanasikaraṇīye dhamme pajānanto ye dhammā na manasikaraṇīyā te dhamme na manasi karoti, ye dhammā manasikaraṇīyā te dhamme manasi karoti.","en":"But take a learned noble disciple who has seen the noble ones, and is skilled and trained in the teaching of the noble ones. They’ve seen true persons, and are skilled and trained in the teaching of the true persons.\nThey understand to which things they should apply the mind and to which things they should not apply the mind.\nSo they apply the mind to things they should and don’t apply the mind to things they shouldn’t."}},{"id":"mn2:10","sourceIds":["mn2:10.1","mn2:10.2","mn2:10.3","mn2:10.4","mn2:10.5","mn2:10.6","mn2:10.7","mn2:10.8","mn2:10.9","mn2:10.10","mn2:10.11"],"kind":"text","text":{"pi":"Katame ca, bhikkhave, dhammā na manasikaraṇīyā ye dhamme na manasi karoti?\nYassa, bhikkhave, dhamme manasikaroto anuppanno vā kāmāsavo uppajjati, uppanno vā kāmāsavo pavaḍḍhati;\nanuppanno vā bhavāsavo uppajjati, uppanno vā bhavāsavo pavaḍḍhati;\nanuppanno vā avijjāsavo uppajjati, uppanno vā avijjāsavo pavaḍḍhati—\nime dhammā na manasikaraṇīyā, ye dhamme na manasi karoti.\nKatame ca, bhikkhave, dhammā manasikaraṇīyā ye dhamme manasi karoti?\nYassa, bhikkhave, dhamme manasikaroto anuppanno vā kāmāsavo na uppajjati, uppanno vā kāmāsavo pahīyati;\nanuppanno vā bhavāsavo na uppajjati, uppanno vā bhavāsavo pahīyati;\nanuppanno vā avijjāsavo na uppajjati, uppanno vā avijjāsavo pahīyati—\nime dhammā manasikaraṇīyā ye dhamme manasi karoti.\nTassa amanasikaraṇīyānaṁ dhammānaṁ amanasikārā manasikaraṇīyānaṁ dhammānaṁ manasikārā anuppannā ceva āsavā na uppajjanti, uppannā ca āsavā pahīyanti.","en":"And what are the things to which they don’t apply the mind and should not?\nThey are the things that, when the mind is applied to them, give rise to unarisen defilements and make arisen defilements grow: the defilements of sensual desire,\ndesire to be reborn,\nand ignorance.\nThese are the things to which they don’t apply the mind and should not.\nAnd what are the things to which they do apply the mind and should?\nThey are the things that, when the mind is applied to them, do not give rise to unarisen defilements and give up arisen defilements: the defilements of sensual desire,\ndesire to be reborn,\nand ignorance.\nThese are the things to which they do apply the mind and should.\nBecause of not applying the mind to what they should not and applying the mind to what they should, unarisen defilements don’t arise and arisen defilements are given up."}},{"id":"mn2:11","sourceIds":["mn2:11.1","mn2:11.2","mn2:11.3","mn2:11.4"],"kind":"text","text":{"pi":"So ‘idaṁ dukkhan’ti yoniso manasi karoti, ‘ayaṁ dukkhasamudayo’ti yoniso manasi karoti, ‘ayaṁ dukkhanirodho’ti yoniso manasi karoti, ‘ayaṁ dukkhanirodhagāminī paṭipadā’ti yoniso manasi karoti.\nTassa evaṁ yoniso manasikaroto tīṇi saṁyojanāni pahīyanti—\nsakkāyadiṭṭhi, vicikicchā, sīlabbataparāmāso.\nIme vuccanti, bhikkhave, āsavā dassanā pahātabbā.","en":"They rationally apply the mind: ‘This is suffering’ … ‘This is the origin of suffering’ … ‘This is the cessation of suffering’ … ‘This is the practice that leads to the cessation of suffering’.\nAnd as they do so, they give up three fetters:\nsubstantialist view, doubt, and misapprehension of precepts and observances.\nThese are called the defilements that should be given up by seeing."}},{"id":"mn2:12","sourceIds":["mn2:12.0","mn2:12.1","mn2:12.2","mn2:12.3","mn2:12.4","mn2:12.5","mn2:12.6","mn2:12.7","mn2:12.8","mn2:12.9","mn2:12.10","mn2:12.11"],"kind":"text","text":{"pi":"2. Saṁvarāpahātabbaāsava\nKatame ca, bhikkhave, āsavā saṁvarā pahātabbā?\nIdha, bhikkhave, bhikkhu paṭisaṅkhā yoniso cakkhundriyasaṁvarasaṁvuto viharati.\nYañhissa, bhikkhave, cakkhundriyasaṁvaraṁ asaṁvutassa viharato uppajjeyyuṁ āsavā vighātapariḷāhā, cakkhundriyasaṁvaraṁ saṁvutassa viharato evaṁsa te āsavā vighātapariḷāhā na honti.\nPaṭisaṅkhā yoniso sotindriyasaṁvarasaṁvuto viharati …pe…\nghānindriyasaṁvarasaṁvuto viharati …pe…\njivhindriyasaṁvarasaṁvuto viharati …pe…\nkāyindriyasaṁvarasaṁvuto viharati …pe…\nmanindriyasaṁvarasaṁvuto viharati.\nYañhissa, bhikkhave, manindriyasaṁvaraṁ asaṁvutassa viharato uppajjeyyuṁ āsavā vighātapariḷāhā, manindriyasaṁvaraṁ saṁvutassa viharato evaṁsa te āsavā vighātapariḷāhā na honti.\nYañhissa, bhikkhave, saṁvaraṁ asaṁvutassa viharato uppajjeyyuṁ āsavā vighātapariḷāhā, saṁvaraṁ saṁvutassa viharato evaṁsa te āsavā vighātapariḷāhā na honti.\nIme vuccanti, bhikkhave, āsavā saṁvarā pahātabbā.","en":"2. Defilements Given Up by Restraint\nAnd what are the defilements that should be given up by restraint?\nTake a mendicant who, reflecting rationally, lives restraining the eye faculty.\nFor the distressing and feverish defilements that might arise in someone who lives without restraint of the eye faculty do not arise when there is such restraint.\nReflecting rationally, they live restraining the ear faculty …\nthe nose faculty …\nthe tongue faculty …\nthe body faculty …\nthe mind faculty.\nFor the distressing and feverish defilements that might arise in someone who lives without restraint of the mind faculty do not arise when there is such restraint.\nFor the distressing and feverish defilements that might arise in someone who lives without restraint do not arise when there is such restraint.\nThese are called the defilements that should be given up by restraint."}},{"id":"mn2:13","sourceIds":["mn2:13.0","mn2:13.1","mn2:13.2","mn2:13.3"],"kind":"text","text":{"pi":"3. Paṭisevanāpahātabbaāsava\nKatame ca, bhikkhave, āsavā paṭisevanā pahātabbā?\nIdha, bhikkhave, bhikkhu paṭisaṅkhā yoniso cīvaraṁ paṭisevati:\n‘yāvadeva sītassa paṭighātāya, uṇhassa paṭighātāya, ḍaṁsamakasavātātapasarīsapasamphassānaṁ paṭighātāya, yāvadeva hirikopīnappaṭicchādanatthaṁ’.","en":"3. Defilements Given Up by Using\nAnd what are the defilements that should be given up by using?\nTake a mendicant who, reflecting rationally, makes use of robes:\n‘Only for the sake of warding off cold and heat; for warding off the touch of flies, mosquitoes, wind, sun, and reptiles; and for covering up the private parts.’"}},{"id":"mn2:14","sourceIds":["mn2:14.1","mn2:14.2"],"kind":"text","text":{"pi":"Paṭisaṅkhā yoniso piṇḍapātaṁ paṭisevati:\n‘neva davāya, na madāya, na maṇḍanāya, na vibhūsanāya, yāvadeva imassa kāyassa ṭhitiyā yāpanāya, vihiṁsūparatiyā, brahmacariyānuggahāya, iti purāṇañca vedanaṁ paṭihaṅkhāmi navañca vedanaṁ na uppādessāmi, yātrā ca me bhavissati anavajjatā ca phāsuvihāro ca’.","en":"Reflecting rationally, they make use of almsfood:\n‘Not for fun, indulgence, adornment, or decoration, but only to sustain this body, to avoid harm, and to support spiritual practice. In this way, I shall put an end to old discomfort and not give rise to new discomfort, and I will have the means to keep going, blamelessness, and a comfortable abiding.’"}},{"id":"mn2:15","sourceIds":["mn2:15.1","mn2:15.2"],"kind":"text","text":{"pi":"Paṭisaṅkhā yoniso senāsanaṁ paṭisevati:\n‘yāvadeva sītassa paṭighātāya, uṇhassa paṭighātāya, ḍaṁsamakasavātātapasarīsapasamphassānaṁ paṭighātāya, yāvadeva utuparissayavinodanapaṭisallānārāmatthaṁ’.","en":"Reflecting rationally, they make use of lodgings:\n‘Only for the sake of warding off cold and heat; for warding off the touch of flies, mosquitoes, wind, sun, and reptiles; to shelter from harsh weather and to enjoy retreat.’"}},{"id":"mn2:16","sourceIds":["mn2:16.1","mn2:16.2"],"kind":"text","text":{"pi":"Paṭisaṅkhā yoniso gilānappaccayabhesajjaparikkhāraṁ paṭisevati:\n‘yāvadeva uppannānaṁ veyyābādhikānaṁ vedanānaṁ paṭighātāya, abyābajjhaparamatāya’.","en":"Reflecting rationally, they make use of medicines and supplies for the sick:\n‘Only for the sake of warding off the pains of illness and to promote good health.’"}},{"id":"mn2:17","sourceIds":["mn2:17.1","mn2:17.2"],"kind":"text","text":{"pi":"Yañhissa, bhikkhave, appaṭisevato uppajjeyyuṁ āsavā vighātapariḷāhā, paṭisevato evaṁsa te āsavā vighātapariḷāhā na honti.\nIme vuccanti, bhikkhave, āsavā paṭisevanā pahātabbā.","en":"For the distressing and feverish defilements that might arise in someone who lives without using these things do not arise when they are used.\nThese are called the defilements that should be given up by using."}},{"id":"mn2:18","sourceIds":["mn2:18.0","mn2:18.1","mn2:18.2","mn2:18.3","mn2:18.4"],"kind":"text","text":{"pi":"4. Adhivāsanāpahātabbaāsava\nKatame ca, bhikkhave, āsavā adhivāsanā pahātabbā?\nIdha, bhikkhave, bhikkhu paṭisaṅkhā yoniso khamo hoti sītassa uṇhassa, jighacchāya pipāsāya. Ḍaṁsamakasavātātapasarīsapasamphassānaṁ, duruttānaṁ durāgatānaṁ vacanapathānaṁ, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko hoti.\nYañhissa, bhikkhave, anadhivāsayato uppajjeyyuṁ āsavā vighātapariḷāhā, adhivāsayato evaṁsa te āsavā vighātapariḷāhā na honti.\nIme vuccanti, bhikkhave, āsavā adhivāsanā pahātabbā.","en":"4. Defilements Given Up by Enduring\nAnd what are the defilements that should be given up by enduring?\nTake a mendicant who, reflecting rationally, endures cold, heat, hunger, and thirst. They endure the touch of flies, mosquitoes, wind, sun, and reptiles. They endure rude and unwelcome criticism. And they put up with physical pain—sharp, severe, acute, unpleasant, disagreeable, and life-threatening.\nFor the distressing and feverish defilements that might arise in someone who lives without enduring these things do not arise when they are endured.\nThese are called the defilements that should be given up by enduring."}},{"id":"mn2:19","sourceIds":["mn2:19.0","mn2:19.1","mn2:19.2","mn2:19.3","mn2:19.4","mn2:19.5"],"kind":"text","text":{"pi":"5. Parivajjanāpahātabbaāsava\nKatame ca, bhikkhave, āsavā parivajjanā pahātabbā?\nIdha, bhikkhave, bhikkhu paṭisaṅkhā yoniso caṇḍaṁ hatthiṁ parivajjeti, caṇḍaṁ assaṁ parivajjeti, caṇḍaṁ goṇaṁ parivajjeti, caṇḍaṁ kukkuraṁ parivajjeti, ahiṁ khāṇuṁ kaṇṭakaṭṭhānaṁ sobbhaṁ papātaṁ candanikaṁ oḷigallaṁ.\nYathārūpe anāsane nisinnaṁ yathārūpe agocare carantaṁ yathārūpe pāpake mitte bhajantaṁ viññū sabrahmacārī pāpakesu ṭhānesu okappeyyuṁ, so tañca anāsanaṁ tañca agocaraṁ te ca pāpake mitte paṭisaṅkhā yoniso parivajjeti.\nYañhissa, bhikkhave, aparivajjayato uppajjeyyuṁ āsavā vighātapariḷāhā, parivajjayato evaṁsa te āsavā vighātapariḷāhā na honti.\nIme vuccanti, bhikkhave, āsavā parivajjanā pahātabbā.","en":"5. Defilements Given Up by Avoiding\nAnd what are the defilements that should be given up by avoiding?\nTake a mendicant who, reflecting rationally, avoids a wild elephant, a wild horse, a wild ox, a wild dog, a snake, a stump, thorny ground, a pit, a cliff, a swamp, and a sewer.\nReflecting rationally, they avoid sitting on inappropriate seats, walking in inappropriate neighborhoods, and mixing with bad friends—whatever sensible spiritual companions would believe to be a bad setting.\nFor the distressing and feverish defilements that might arise in someone who lives without avoiding these things do not arise when they are avoided.\nThese are called the defilements that should be given up by avoiding."}},{"id":"mn2:20","sourceIds":["mn2:20.0","mn2:20.1","mn2:20.2","mn2:20.3","mn2:20.4"],"kind":"text","text":{"pi":"6. Vinodanāpahātabbaāsava\nKatame ca, bhikkhave, āsavā vinodanā pahātabbā?\nIdha, bhikkhave, bhikkhu paṭisaṅkhā yoniso uppannaṁ kāmavitakkaṁ nādhivāseti pajahati vinodeti byantīkaroti anabhāvaṁ gameti, uppannaṁ byāpādavitakkaṁ …pe… uppannaṁ vihiṁsāvitakkaṁ …pe… uppannuppanne pāpake akusale dhamme nādhivāseti pajahati vinodeti byantīkaroti anabhāvaṁ gameti.\nYañhissa, bhikkhave, avinodayato uppajjeyyuṁ āsavā vighātapariḷāhā, vinodayato evaṁsa te āsavā vighātapariḷāhā na honti.\nIme vuccanti, bhikkhave, āsavā vinodanā pahātabbā.","en":"6. Defilements Given Up by Dispelling\nAnd what are the defilements that should be given up by dispelling?\nTake a mendicant who, reflecting rationally, doesn’t tolerate a sensual, malicious, or cruel thought that has arisen, but gives it up, dispels it, eliminates it, and obliterates it. They don’t tolerate any bad, unskillful qualities that have arisen, but give them up, dispel them, eliminate them, and obliterate them.\nFor the distressing and feverish defilements that might arise in someone who lives without dispelling these things do not arise when they are dispelled.\nThese are called the defilements that should be given up by dispelling."}},{"id":"mn2:21","sourceIds":["mn2:21.0","mn2:21.1","mn2:21.2","mn2:21.3","mn2:21.4","mn2:21.5","mn2:21.6","mn2:21.7","mn2:21.8","mn2:21.9","mn2:21.10"],"kind":"text","text":{"pi":"7. Bhāvanāpahātabbaāsava\nKatame ca, bhikkhave, āsavā bhāvanā pahātabbā?\nIdha, bhikkhave, bhikkhu paṭisaṅkhā yoniso satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ;\npaṭisaṅkhā yoniso dhammavicayasambojjhaṅgaṁ bhāveti …pe…\nvīriyasambojjhaṅgaṁ bhāveti …\npītisambojjhaṅgaṁ bhāveti …\npassaddhisambojjhaṅgaṁ bhāveti …\nsamādhisambojjhaṅgaṁ bhāveti …\nupekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.\nYañhissa, bhikkhave, abhāvayato uppajjeyyuṁ āsavā vighātapariḷāhā, bhāvayato evaṁsa te āsavā vighātapariḷāhā na honti.\nIme vuccanti, bhikkhave, āsavā bhāvanā pahātabbā.","en":"7. Defilements Given Up by Developing\nAnd what are the defilements that should be given up by developing?\nTake a mendicant who, reflecting rationally, develops the awakening factors of mindfulness,\ninvestigation of principles,\nenergy,\nrapture,\ntranquility,\nimmersion,\nand equanimity, which rely on seclusion, fading away, and cessation, and ripen as letting go.\nFor the distressing and feverish defilements that might arise in someone who lives without developing these things do not arise when they are developed.\nThese are called the defilements that should be given up by developing."}},{"id":"mn2:22","sourceIds":["mn2:22.1","mn2:22.2","mn2:22.3","mn2:22.4","mn2:22.5"],"kind":"text","text":{"pi":"Yato kho, bhikkhave, bhikkhuno ye āsavā dassanā pahātabbā te dassanā pahīnā honti, ye āsavā saṁvarā pahātabbā te saṁvarā pahīnā honti, ye āsavā paṭisevanā pahātabbā te paṭisevanā pahīnā honti, ye āsavā adhivāsanā pahātabbā te adhivāsanā pahīnā honti, ye āsavā parivajjanā pahātabbā te parivajjanā pahīnā honti, ye āsavā vinodanā pahātabbā te vinodanā pahīnā honti, ye āsavā bhāvanā pahātabbā te bhāvanā pahīnā honti;\nayaṁ vuccati, bhikkhave: ‘bhikkhu sabbāsavasaṁvarasaṁvuto viharati, acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā’”ti.\nIdamavoca bhagavā.\nAttamanā te bhikkhū bhagavato bhāsitaṁ abhinandunti.\nSabbāsavasuttaṁ niṭṭhitaṁ dutiyaṁ.","en":"Now, take a mendicant who, by seeing, has given up the defilements that should be given up by seeing. By restraint, they’ve given up the defilements that should be given up by restraint. By using, they’ve given up the defilements that should be given up by using. By enduring, they’ve given up the defilements that should be given up by enduring. By avoiding, they’ve given up the defilements that should be given up by avoiding. By dispelling, they’ve given up the defilements that should be given up by dispelling. By developing, they’ve given up the defilements that should be given up by developing.\nThey’re called a mendicant who lives having restrained all defilements, who has cut off craving, cast off the fetters, and by rightly comprehending conceit has made an end of suffering.”\nThat is what the Buddha said.\nSatisfied, the mendicants approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn2/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}