{"id":"ne17","title":"Adhiṭṭhānahāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne17","title":"Adhiṭṭhānahāravibhaṅga","units":[{"id":"ne17:0","sourceIds":["ne17:0.1","ne17:0.2","ne17:0.3","ne17:0.4"],"kind":"text","text":{"pi":"Netti\nPaṭiniddesavāra\nVibhaṅga 14\nAdhiṭṭhānahāravibhaṅga"}},{"id":"ne17:1","sourceIds":["ne17:1.1","ne17:1.2"],"kind":"text","text":{"pi":"Tattha katamo adhiṭṭhāno hāro?\n“Ekattatāya dhammā, yepi ca vemattatāya niddiṭṭhā”ti."}},{"id":"ne17:2","sourceIds":["ne17:2.1"],"kind":"text","text":{"pi":"Ye tattha niddiṭṭhā, tathā te dhārayitabbā."}},{"id":"ne17:3","sourceIds":["ne17:3.1","ne17:3.2","ne17:3.3","ne17:3.4"],"kind":"text","text":{"pi":"“Dukkhan”ti ekattatā.\nTattha katamaṁ dukkhaṁ?\nJāti dukkhā, jarā dukkhā, byādhi dukkho, maraṇaṁ dukkhaṁ, appiyehi sampayogo dukkho, piyehi vippayogo dukkho, yampicchaṁ na labhati tampi dukkhaṁ, saṅkhittena pañcupādānakkhandhā dukkhā, rūpā dukkhā, vedanā dukkhā, saññā dukkhā, saṅkhārā dukkhā, viññāṇaṁ dukkhaṁ.\nAyaṁ vemattatā."}},{"id":"ne17:4","sourceIds":["ne17:4.1","ne17:4.2","ne17:4.3","ne17:4.4","ne17:4.5","ne17:4.6"],"kind":"text","text":{"pi":"“Dukkhasamudayo”ti ekattatā.\nTattha katamo dukkhasamudayo?\nYāyaṁ taṇhā ponobhavikā nandīrāgasahagatā tatratatrābhinandinī.\nSeyyathidaṁ—\nkāmataṇhā bhavataṇhā vibhavataṇhā.\nAyaṁ vemattatā."}},{"id":"ne17:5","sourceIds":["ne17:5.1","ne17:5.2","ne17:5.3","ne17:5.4"],"kind":"text","text":{"pi":"“Dukkhanirodho”ti ekattatā.\nTattha katamo dukkhanirodho?\nYo tassāyeva taṇhāya asesavirāganirodho cāgo paṭinissaggo mutti anālayo.\nAyaṁ vemattatā."}},{"id":"ne17:6","sourceIds":["ne17:6.1","ne17:6.2","ne17:6.3","ne17:6.4","ne17:6.5","ne17:6.6"],"kind":"text","text":{"pi":"“Dukkhanirodhagāminī paṭipadā”ti ekattatā.\nTattha katamā dukkhanirodhagāminī paṭipadā?\nAyameva ariyo aṭṭhaṅgiko maggo.\nSeyyathidaṁ—\nsammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi.\nAyaṁ vemattatā."}},{"id":"ne17:7","sourceIds":["ne17:7.1","ne17:7.2","ne17:7.3","ne17:7.4"],"kind":"text","text":{"pi":"“Maggo”ti ekattatā.\nTattha katamo maggo?\nNirayagāmī maggo tiracchānayonigāmī maggo pettivisayagāmī maggo asurayoniyo maggo saggagāmiyo maggo manussagāmī maggo nibbānagāmī maggo.\nAyaṁ vemattatā."}},{"id":"ne17:8","sourceIds":["ne17:8.1","ne17:8.2","ne17:8.3","ne17:8.4"],"kind":"text","text":{"pi":"“Nirodho”ti ekattatā.\nTattha katamo nirodho?\nPaṭisaṅkhānirodho appaṭisaṅkhānirodho anunayanirodho paṭighanirodho mānanirodho makkhanirodho paḷāsanirodho issānirodho macchariyanirodho sabbakilesanirodho.\nAyaṁ vemattatā."}},{"id":"ne17:9","sourceIds":["ne17:9.1","ne17:9.2","ne17:9.3","ne17:9.4","ne17:9.5"],"kind":"text","text":{"pi":"“Rūpan”ti ekattatā.\nTattha katamaṁ rūpaṁ?\nCātumahābhūtikaṁ rūpaṁ catunnaṁ mahābhūtānaṁ upādāya rūpassa paññatti.\nTattha katamāni cattāri mahābhūtāni?\nPathavīdhātu āpodhātu tejodhātu vāyodhātu."}},{"id":"ne17:10","sourceIds":["ne17:10.1","ne17:10.2","ne17:10.3"],"kind":"text","text":{"pi":"Dvīhi ākārehi dhātuyo pariggaṇhāti saṅkhepena ca vitthārena ca.\nKathaṁ vitthārena dhātuyo pariggaṇhāti?\nVīsatiyā ākārehi pathavīdhātuṁ vitthārena pariggaṇhāti, dvādasahi ākārehi āpodhātuṁ vitthārena pariggaṇhāti, catūhi ākārehi tejodhātuṁ vitthārena pariggaṇhāti, chahi ākārehi vāyodhātuṁ vitthārena pariggaṇhāti."}},{"id":"ne17:11","sourceIds":["ne17:11.1","ne17:11.2"],"kind":"text","text":{"pi":"Katamehi vīsatiyā ākārehi pathavīdhātuṁ vitthārena pariggaṇhāti?\nAtthi imasmiṁ kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ matthake matthaluṅganti imehi vīsatiyā ākārehi pathavīdhātuṁ vitthārena pariggaṇhāti."}},{"id":"ne17:12","sourceIds":["ne17:12.1","ne17:12.2"],"kind":"text","text":{"pi":"Katamehi dvādasahi ākārehi āpodhātuṁ vitthārena pariggaṇhāti?\nAtthi imasmiṁ kāye pittaṁ semhaṁ pubbo lohitaṁ sedo medo assu vasā kheḷo siṅghāṇikā lasikā muttanti imehi dvādasahi ākārehi āpodhātuṁ vitthārena pariggaṇhāti."}},{"id":"ne17:13","sourceIds":["ne17:13.1","ne17:13.2"],"kind":"text","text":{"pi":"Katamehi catūhi ākārehi tejodhātuṁ vitthārena pariggaṇhāti?\nYena ca santappati, yena ca jīrīyati, yena ca pariḍayhati, yena ca asitapītakhāyitasāyitaṁ sammā pariṇāmaṁ gacchati, imehi catūhi ākārehi tejodhātuṁ vitthārena pariggaṇhāti."}},{"id":"ne17:14","sourceIds":["ne17:14.1","ne17:14.2"],"kind":"text","text":{"pi":"Katamehi chahi ākārehi vāyodhātuṁ vitthārena pariggaṇhāti?\nUddhaṅgamā vātā, adhogamā vātā, kucchisayā vātā, koṭṭhāsayā vātā, aṅgamaṅgānusārino vātā, assāso passāso iti, imehi chahi ākārehi vāyodhātuṁ vitthārena pariggaṇhāti."}},{"id":"ne17:15","sourceIds":["ne17:15.1","ne17:15.2","ne17:15.3","ne17:15.4","ne17:15.5","ne17:15.6","ne17:15.7","ne17:15.8","ne17:15.9"],"kind":"text","text":{"pi":"Evaṁ imehi dvācattālīsāya ākārehi vitthārena dhātuyo sabhāvato upalakkhayanto tulayanto parivīmaṁsanto pariyogāhanto paccavekkhanto na kiñci gayhūpagaṁ passati kāyaṁ vā kāyapadesaṁ vā, yathā candanikaṁ pavicinanto na kiñci gayhūpagaṁ passeyya, yathā saṅkāraṭṭhānaṁ pavicinanto na kiñci gayhūpagaṁ passeyya, yathā vaccakuṭiṁ pavicinanto na kiñci gayhūpagaṁ passeyya, yathā sivathikaṁ pavicinanto na kiñci gayhūpagaṁ passeyya.\nEvameva imehi dvācattālīsāya ākārehi evaṁ vitthārena dhātuyo sabhāvato upalakkhayanto tulayanto parivīmaṁsanto pariyogāhanto paccavekkhanto na kiñci gayhūpagaṁ passati kāyaṁ vā kāyapadesaṁ vā.\nTenāha bhagavā yā ceva kho pana ajjhattikā pathavīdhātu, yā ca bāhirā pathavīdhātu, pathavīdhāturevesā.\nTaṁ “netaṁ mama, nesohamasmi, na meso attā”ti evametaṁ yathābhūtaṁ sammappaññāya daṭṭhabbaṁ, evametaṁ yathābhūtaṁ sammappaññāya disvā pathavīdhātuyā nibbindati, pathavīdhātuyā cittaṁ virājeti.\nYā ceva kho pana ajjhattikā āpodhātu, yā ca bāhirā āpodhātu …pe…\nyā ceva kho pana ajjhattikā tejodhātu, yā ca bāhirā tejodhātu …pe…\nyā ceva kho pana ajjhattikā vāyodhātu, yā ca bāhirā vāyodhātu, vāyodhāturevesā.\nTaṁ “netaṁ mama, nesohamasmi, na meso attā”ti evametaṁ yathābhūtaṁ sammappaññāya daṭṭhabbaṁ, evametaṁ yathābhūtaṁ sammappaññāya disvā vāyodhātuyā nibbindati, vāyodhātuyā cittaṁ virājeti.\nAyaṁ vemattatā."}},{"id":"ne17:16","sourceIds":["ne17:16.1","ne17:16.2","ne17:16.3","ne17:16.4"],"kind":"text","text":{"pi":"“Avijjā”ti ekattatā.\nTattha katamā avijjā?\nDukkhe aññāṇaṁ, dukkhasamudaye aññāṇaṁ, dukkhanirodhe aññāṇaṁ, dukkhanirodhagāminiyā paṭipadāya aññāṇaṁ, pubbante aññāṇaṁ, aparante aññāṇaṁ, pubbantāparante aññāṇaṁ, idappaccayatāpaṭiccasamuppannesu dhammesu aññāṇaṁ, yaṁ evarūpaṁ aññāṇaṁ adassanaṁ anabhisamayo ananubodho asambodho appaṭivedho asallakkhaṇā anupalakkhaṇā apaccupalakkhaṇā asamavekkhaṇā apaccakkhakammaṁ dummejjhaṁ bālyaṁ asampajaññaṁ moho pamoho sammoho avijjā avijjogho avijjāyogo avijjānusayo avijjāpariyuṭṭhānaṁ avijjālaṅgī moho akusalamūlaṁ.\nAyaṁ vemattatā."}},{"id":"ne17:17","sourceIds":["ne17:17.1","ne17:17.2","ne17:17.3","ne17:17.4"],"kind":"text","text":{"pi":"“Vijjā”ti ekattatā.\nTattha katamā vijjā?\nDukkhe ñāṇaṁ, dukkhasamudaye ñāṇaṁ, dukkhanirodhe ñāṇaṁ, dukkhanirodhagāminiyā paṭipadāya ñāṇaṁ, pubbante ñāṇaṁ, aparante ñāṇaṁ, pubbantāparante ñāṇaṁ, idappaccayatāpaṭiccasamuppannesu dhammesu ñāṇaṁ, yā evarūpā paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ.\nAyaṁ vemattatā."}},{"id":"ne17:18","sourceIds":["ne17:18.1","ne17:18.2","ne17:18.3","ne17:18.4","ne17:18.5"],"kind":"text","text":{"pi":"“Samāpattī”ti ekattatā.\nTattha katamā samāpatti?\nSaññāsamāpatti asaññāsamāpatti, nevasaññānāsaññāsamāpatti.\nVibhūtasaññāsamāpatti nirodhasamāpattīti.\nAyaṁ vemattatā."}},{"id":"ne17:19","sourceIds":["ne17:19.1","ne17:19.2","ne17:19.3","ne17:19.4"],"kind":"text","text":{"pi":"“Jhāyī”ti ekattatā.\nTattha katamo jhāyī?\nAtthi sekkho jhāyī, atthi asekkho jhāyī, nevasekkhanāsekkho jhāyī, ājāniyo jhāyī, assakhaluṅko jhāyī, diṭṭhuttaro jhāyī, taṇhuttaro jhāyī, paññuttaro jhāyī.\nAyaṁ vemattatā."}},{"id":"ne17:20","sourceIds":["ne17:20.1","ne17:20.2","ne17:20.3","ne17:20.4"],"kind":"text","text":{"pi":"“Samādhī”ti ekattatā.\nTattha katamo samādhi?\nSaraṇo samādhi, araṇo samādhi, savero samādhi, avero samādhi, sabyāpajjo samādhi, abyāpajjo samādhi, sappītiko samādhi, nippītiko samādhi, sāmiso samādhi, nirāmiso samādhi, sasaṅkhāro samādhi, asaṅkhāro samādhi, ekaṁsabhāvito samādhi, ubhayaṁsabhāvito samādhi, ubhayato bhāvitabhāvano samādhi, savitakkasavicāro samādhi, avitakkavicāramatto samādhi, avitakkaavicāro samādhi, hānabhāgiyo samādhi, ṭhitibhāgiyo samādhi, visesabhāgiyo samādhi, nibbedhabhāgiyo samādhi, lokiyo samādhi, lokuttaro samādhi, micchāsamādhi, sammāsamādhi.\nAyaṁ vemattatā."}},{"id":"ne17:21","sourceIds":["ne17:21.1","ne17:21.2","ne17:21.3","ne17:21.4"],"kind":"text","text":{"pi":"“Paṭipadā”ti ekattatā.\nTattha katamā paṭipadā?\nĀgāḷhapaṭipadā, nijjhāmapaṭipadā, majjhimapaṭipadā, akkhamā paṭipadā, khamā paṭipadā, samā paṭipadā, damā paṭipadā, dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññāti.\nAyaṁ vemattatā."}},{"id":"ne17:22","sourceIds":["ne17:22.1","ne17:22.2","ne17:22.3","ne17:22.4","ne17:22.5","ne17:22.6","ne17:22.7","ne17:22.8","ne17:22.9"],"kind":"text","text":{"pi":"“Kāyo”ti ekattatā.\nTattha katamo kāyo?\nNāmakāyo rūpakāyo ca.\nTattha katamo rūpakāyo?\nKesā lomā nakhā dantā taco maṁsaṁ nhāru aṭṭhi aṭṭhimiñjaṁ vakkaṁ hadayaṁ yakanaṁ kilomakaṁ pihakaṁ papphāsaṁ antaṁ antaguṇaṁ udariyaṁ karīsaṁ pittaṁ semhaṁ pubbo lohitaṁ sedo medo assu vasā kheḷo siṅghāṇikā lasikā muttaṁ matthaluṅganti—\nayaṁ rūpakāyo.\nNāmakāyo nāma vedanā saññā cetanā cittaṁ phasso manasikāroti—\nayaṁ nāmakāyoti.\nAyaṁ vemattatā."}},{"id":"ne17:23","sourceIds":["ne17:23.1","ne17:23.2","ne17:23.3","ne17:23.4","ne17:23.5","ne17:23.6","ne17:23.7","ne17:23.8","ne17:23.9","ne17:23.10"],"kind":"text","text":{"pi":"Evaṁ yo dhammo yassa dhammassa samānabhāvo, so dhammo tassa dhammassa ekattatāya ekī bhavati.\nYena yena vā pana vilakkhaṇo, tena tena vemattaṁ gacchati.\nEvaṁ sutte vā veyyākaraṇe vā gāthāyaṁ vā pucchitena vīmaṁsayitabbaṁ, kiṁ ekattatāya pucchati, udāhu vemattatāyāti.\nYadi ekattatāya pucchitaṁ, ekattatāya visajjayitabbaṁ.\nYadi vemattatāya pucchitaṁ, vemattatāya visajjayitabbaṁ.\nYadi sattādhiṭṭhānena pucchitaṁ, sattādhiṭṭhānena visajjayitabbaṁ.\nYadi dhammādhiṭṭhānena pucchitaṁ, dhammādhiṭṭhānena visajjayitabbaṁ.\nYathā yathā vā pana pucchitaṁ tathā tathā visajjayitabbaṁ.\nTenāha āyasmā mahākaccāyano “ekattatāya dhammā”ti.\nNiyutto adhiṭṭhāno hāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne17/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}