{"id":"ne18","title":"Parikkhārahāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne18","title":"Parikkhārahāravibhaṅga","units":[{"id":"ne18:0","sourceIds":["ne18:0.1","ne18:0.2","ne18:0.3","ne18:0.4"],"kind":"text","text":{"pi":"Netti\nPaṭiniddesavāra\nVibhaṅga 15\nParikkhārahāravibhaṅga"}},{"id":"ne18:1","sourceIds":["ne18:1.1","ne18:1.2"],"kind":"text","text":{"pi":"Tattha katamo parikkhāro hāro?\n“Ye dhammā yaṁ dhammaṁ janayantī”ti."}},{"id":"ne18:2","sourceIds":["ne18:2.1","ne18:2.2","ne18:2.3","ne18:2.4","ne18:2.5","ne18:2.6","ne18:2.7","ne18:2.8","ne18:2.9","ne18:2.10","ne18:2.11"],"kind":"text","text":{"pi":"Yo dhammo yaṁ dhammaṁ janayati, tassa so parikkhāro.\nKiṁlakkhaṇo parikkhāro?\nJanakalakkhaṇo parikkhāro.\nDve dhammā janayanti hetu ca paccayo ca.\nTattha kiṁlakkhaṇo hetu, kiṁlakkhaṇo paccayo?\nAsādhāraṇalakkhaṇo hetu, sādhāraṇalakkhaṇo paccayo.\nYathā kiṁ bhave?\nYathā aṅkurassa nibbattiyā bījaṁ asādhāraṇaṁ, pathavī āpo ca sādhāraṇā.\nAṅkurassa hi pathavī āpo ca paccayo sabhāvo hetu.\nYathā vā pana ghaṭe duddhaṁ pakkhittaṁ dadhi bhavati, na catthi ekakālasamavadhānaṁ duddhassa ca dadhissa ca.\nEvamevaṁ natthi ekakālasamavadhānaṁ hetussa ca paccayassa ca."}},{"id":"ne18:3","sourceIds":["ne18:3.1","ne18:3.2","ne18:3.3","ne18:3.4","ne18:3.5","ne18:3.6","ne18:3.7"],"kind":"text","text":{"pi":"Ayañhi saṁsāro sahetu sappaccayo nibbatto.\nVuttaṁ hi avijjāpaccayā saṅkhārā, saṅkhārapaccayā viññāṇaṁ, evaṁ sabbo paṭiccasamuppādo.\nIti avijjā avijjāya hetu ayoniso manasikāro paccayo.\nPurimikā avijjā pacchimikāya avijjāya hetu.\nTattha purimikā avijjā avijjānusayo pacchimikā avijjā avijjāpariyuṭṭhānaṁ, purimiko avijjānusayo pacchimikassa avijjāpariyuṭṭhānassa hetubhūto paribrūhanāya, bījaṅkuro viya samanantarahetutāya.\nYaṁ pana yattha phalaṁ nibbattati, idamassa paramparahetutāya hetubhūtaṁ.\nDuvidho hi hetu samanantarahetu paramparahetu ca, evaṁ avijjāyapi duvidho hetu samanantarahetu paramparahetu ca."}},{"id":"ne18:4","sourceIds":["ne18:4.1","ne18:4.2","ne18:4.3","ne18:4.4","ne18:4.5","ne18:4.6"],"kind":"text","text":{"pi":"Yathā vā pana thālakañca vaṭṭi ca telañca padīpassa paccayabhūtaṁ na sabhāvahetu, na hi sakkā thālakañca vaṭṭiñca telañca anaggikaṁ dīpetuṁ padīpassa paccayabhūtaṁ.\nPadīpo viya sabhāvo hetu hoti.\nIti sabhāvo hetu, parabhāvo paccayo.\nAjjhattiko hetu, bāhiro paccayo.\nJanako hetu, pariggāhako paccayo.\nAsādhāraṇo hetu, sādhāraṇo paccayo."}},{"id":"ne18:5","sourceIds":["ne18:5.1","ne18:5.2","ne18:5.3"],"kind":"text","text":{"pi":"Avupacchedattho santati attho, nibbatti attho phalattho, paṭisandhi attho punabbhavattho, palibodhattho pariyuṭṭhānattho, asamugghātattho anusayattho, asampaṭivedhattho avijjattho, apariññātattho viññāṇassa bījattho.\nYattha avupacchedo tattha santati, yattha santati tattha nibbatti, yattha nibbatti tattha phalaṁ, yattha phalaṁ tattha paṭisandhi, yattha paṭisandhi tattha punabbhavo, yattha punabbhavo tattha palibodho, yattha palibodho tattha pariyuṭṭhānaṁ, yattha pariyuṭṭhānaṁ tattha asamugghāto.\nYattha asamugghāto tattha anusayo, yattha anusayo tattha asampaṭivedho, yattha asampaṭivedho tattha avijjā, yattha avijjā tattha sāsavaṁ viññāṇaṁ apariññātaṁ, yattha sāsavaṁ viññāṇaṁ apariññātaṁ tattha bījattho."}},{"id":"ne18:6","sourceIds":["ne18:6.1","ne18:6.2"],"kind":"text","text":{"pi":"Sīlakkhandho samādhikkhandhassa paccayo, samādhikkhandho paññākkhandhassa paccayo, paññākkhandho vimuttikkhandhassa paccayo, vimuttikkhandho vimuttiñāṇadassanakkhandhassa paccayo.\nTitthaññutā pītaññutāya paccayo, pītaññutā pattaññutāya paccayo, pattaññutā attaññutāya paccayo."}},{"id":"ne18:7","sourceIds":["ne18:7.1","ne18:7.2","ne18:7.3","ne18:7.4","ne18:7.5","ne18:7.6","ne18:7.7","ne18:7.8","ne18:7.9","ne18:7.10","ne18:7.11","ne18:7.12","ne18:7.13","ne18:7.14","ne18:7.15","ne18:7.16","ne18:7.17","ne18:7.18","ne18:7.19","ne18:7.20","ne18:7.21"],"kind":"text","text":{"pi":"Yathā vā pana cakkhuñca paṭicca rūpe ca uppajjati cakkhuviññāṇaṁ.\nTattha cakkhu ādhipateyyapaccayatāya paccayo, rūpā ārammaṇapaccayatāya paccayo.\nĀloko sannissayatāya paccayo, manasikāro sabhāvo hetu.\nSaṅkhārā viññāṇassa paccayo, sabhāvo hetu.\nViññāṇaṁ nāmarūpassa paccayo, sabhāvo hetu.\nNāmarūpaṁ saḷāyatanassa paccayo, sabhāvo hetu.\nSaḷāyatanaṁ phassassa paccayo, sabhāvo hetu.\nPhasso vedanāya paccayo, sabhāvo hetu.\nVedanā taṇhāya paccayo, sabhāvo hetu.\nTaṇhā upādānassa paccayo, sabhāvo hetu.\nUpādānaṁ bhavassa paccayo, sabhāvo hetu.\nBhavo jātiyā paccayo, sabhāvo hetu.\nJāti jarāmaraṇassa paccayo, sabhāvo hetu.\nJarāmaraṇaṁ sokassa paccayo, sabhāvo hetu.\nSoko paridevassa paccayo, sabhāvo hetu.\nParidevo dukkhassa paccayo, sabhāvo hetu.\nDukkhaṁ domanassassa paccayo, sabhāvo hetu.\nDomanassaṁ upāyāsassa paccayo, sabhāvo hetu.\nEvaṁ yo koci upanissayo sabbo so parikkhāro.\nTenāha āyasmā mahākaccāyano “ye dhammā yaṁ dhammaṁ janayantī”ti.\nNiyutto parikkhāro hāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne18/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}