{"id":"ne20","title":"Desanāhārasampāta","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne20","title":"Desanāhārasampāta","units":[{"id":"ne20:0","sourceIds":["ne20:0.1","ne20:0.2","ne20:0.3","ne20:0.4"],"kind":"text","text":{"pi":"Netti\nPaṭiniddesavāra\nSampāta 1\nDesanāhārasampāta"}},{"id":"ne20:1","sourceIds":["ne20:1.1","ne20:1.2","ne20:1.3","ne20:1.4"],"kind":"text","text":{"pi":"“Soḷasa hārā paṭhamaṁ,\nDisalocanato disā viloketvā;\nSaṅkhipiya aṅkusena hi,\nNayehi tīhi niddise suttan”ti."}},{"id":"ne20:2","sourceIds":["ne20:2.1","ne20:2.2","ne20:2.3"],"kind":"text","text":{"pi":"Vuttā, tassā niddeso kuhiṁ daṭṭhabbo?\nHārasampāte.\nTattha katamo desanāhārasampāto?"}},{"id":"ne20:3","sourceIds":["ne20:3.1","ne20:3.2","ne20:3.3","ne20:3.4"],"kind":"text","text":{"pi":"“Arakkhitena cittena,\nmicchādiṭṭhihatena ca;\nThinamiddhābhibhūtena,\nvasaṁ mārassa gacchatī”ti."}},{"id":"ne20:4","sourceIds":["ne20:4.1","ne20:4.2","ne20:4.3","ne20:4.4","ne20:4.5","ne20:4.6","ne20:4.7","ne20:4.8","ne20:4.9","ne20:4.10","ne20:4.11","ne20:4.12"],"kind":"text","text":{"pi":"Arakkhitena cittenāti kiṁ desayati, pamādaṁ taṁ maccuno padaṁ.\nMicchādiṭṭhihatena cāti micchādiṭṭhihataṁ nāma vuccati yadā “anicce niccan”ti passati, so vipallāso.\nSo pana vipallāso kiṁlakkhaṇo?\nViparītaggāhalakkhaṇo vipallāso.\nSo kiṁ vipallāsayati?\nTayo dhamme saññaṁ cittaṁ diṭṭhimiti.\nSo kuhiṁ vipallāsayati?\nCatūsu attabhāvavatthūsu, rūpaṁ attato samanupassati, rūpavantaṁ vā attānaṁ, attani vā rūpaṁ, rūpasmiṁ vā attānaṁ.\nEvaṁ vedanaṁ …pe…\nsaññaṁ …pe…\nsaṅkhāre …pe…\nviññāṇaṁ attato samanupassati, viññāṇavantaṁ vā attānaṁ, attani vā viññāṇaṁ, viññāṇasmiṁ vā attānaṁ."}},{"id":"ne20:5","sourceIds":["ne20:5.1","ne20:5.2","ne20:5.3","ne20:5.4","ne20:5.5","ne20:5.6","ne20:5.7","ne20:5.8"],"kind":"text","text":{"pi":"Tattha rūpaṁ paṭhamaṁ vipallāsavatthu “asubhe subhan”ti.\nVedanā dutiyaṁ vipallāsavatthu “dukkhe sukhan”ti.\nSaññā saṅkhārā ca tatiyaṁ vipallāsavatthu “anattani attā”ti.\nViññāṇaṁ catutthaṁ vipallāsavatthu “anicce niccan”ti.\nDve dhammā cittassa saṅkilesā—\ntaṇhā ca avijjā ca.\nTaṇhānivutaṁ cittaṁ dvīhi vipallāsehi vipallāsīyati “asubhe subhan”ti “dukkhe sukhan”ti.\nDiṭṭhinivutaṁ cittaṁ dvīhi vipallāsehi vipallāsīyati “anicce niccan”ti “anattani attā”ti."}},{"id":"ne20:6","sourceIds":["ne20:6.1","ne20:6.2","ne20:6.3","ne20:6.4","ne20:6.5","ne20:6.6","ne20:6.7","ne20:6.8","ne20:6.9","ne20:6.10","ne20:6.11","ne20:6.12","ne20:6.13","ne20:6.14"],"kind":"text","text":{"pi":"Tattha yo diṭṭhivipallāso, so atītaṁ rūpaṁ attato samanupassati,\natītaṁ vedanaṁ …pe…\natītaṁ saññaṁ,\natīte saṅkhāre …\natītaṁ viññāṇaṁ attato samanupassati.\nTattha yo taṇhāvipallāso, so anāgataṁ rūpaṁ abhinandati,\nanāgataṁ vedanaṁ …pe…\nanāgataṁ saññaṁ,\nanāgate saṅkhāre,\nanāgataṁ viññāṇaṁ abhinandati.\nDve dhammā cittassa upakkilesā—\ntaṇhā ca avijjā ca.\nTāhi visujjhantaṁ cittaṁ visujjhati.\nTesaṁ avijjānīvaraṇānaṁ taṇhāsaṁyojanānaṁ pubbā koṭi na paññāyati sandhāvantānaṁ saṁsarantānaṁ sakiṁ nirayaṁ sakiṁ tiracchānayoniṁ sakiṁ pettivisayaṁ sakiṁ asurakāyaṁ sakiṁ deve sakiṁ manusse."}},{"id":"ne20:7","sourceIds":["ne20:7.1","ne20:7.2","ne20:7.3","ne20:7.4","ne20:7.5","ne20:7.6","ne20:7.7","ne20:7.8","ne20:7.9","ne20:7.10","ne20:7.11","ne20:7.12"],"kind":"text","text":{"pi":"Thinamiddhābhibhūtenāti.\nThinaṁ nāma yā cittassa akallatā akammaniyatā;\nmiddhaṁ nāma yaṁ kāyassa līnattaṁ.\nVasaṁ mārassa gacchatīti kilesamārassa ca sattamārassa ca vasaṁ gacchati, so hi nivuto saṁsārābhimukho hoti.\nImāni bhagavatā dve saccāni desitāni dukkhaṁ samudayo ca.\nTesaṁ bhagavā pariññāya ca pahānāya ca dhammaṁ deseti dukkhassa pariññāya samudayassa pahānāya.\nYena ca parijānāti yena ca pajahati, ayaṁ maggo.\nYaṁ taṇhāya avijjāya ca pahānaṁ, ayaṁ nirodho.\nImāni cattāri saccāni.\nTenāha bhagavā “arakkhitena cittenā”ti.\nTenāhāyasmā mahākaccāyano “assādādīnavatā”ti.\nNiyutto desanāhārasampāto."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne20/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}