{"id":"ps2.6","title":"2.6. Paṭisambhidākathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ps2.6","title":"2.6. Paṭisambhidākathā","units":[{"id":"ps2.6:0","sourceIds":["ps2.6:0.1","ps2.6:0.2","ps2.6:0.3"],"kind":"text","text":{"pi":"Paṭisambhidāmagga\n2 Yuganaddhavagga\n2.6. Paṭisambhidākathā"}},{"id":"ps2.6:1","sourceIds":["ps2.6:1.0","ps2.6:1.1","ps2.6:1.2","ps2.6:1.3"],"kind":"text","text":{"pi":"2.6.1. Dhammacakkapavattanavāra\nEvaṁ me sutaṁ—\nekaṁ samayaṁ bhagavā bārāṇasiyaṁ viharati isipatane migadāye.\nTatra kho bhagavā pañcavaggiye bhikkhū āmantesi—"}},{"id":"ps2.6:2","sourceIds":["ps2.6:2.1","ps2.6:2.2","ps2.6:2.3","ps2.6:2.4","ps2.6:2.5"],"kind":"text","text":{"pi":"“Dveme, bhikkhave, antā pabbajitena na sevitabbā.\nKatame dve?\nYo cāyaṁ kāmesu kāmasukhallikānuyogo hīno gammo pothujjaniko anariyo anatthasaṁhito;\nyo cāyaṁ attakilamathānuyogo dukkho anariyo anatthasaṁhito.\nEte kho, bhikkhave, ubho ante anupagamma majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati."}},{"id":"ps2.6:3","sourceIds":["ps2.6:3.1","ps2.6:3.2","ps2.6:3.3","ps2.6:3.4"],"kind":"text","text":{"pi":"Katamā ca sā, bhikkhave, majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati?\nAyameva ariyo aṭṭhaṅgiko maggo, seyyathidaṁ—\nsammādiṭṭhi …pe… sammāsamādhi.\nAyaṁ kho sā, bhikkhave, majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṁvattati."}},{"id":"ps2.6:4","sourceIds":["ps2.6:4.1","ps2.6:4.2","ps2.6:4.3","ps2.6:4.4","ps2.6:4.5","ps2.6:4.6","ps2.6:4.7","ps2.6:4.8","ps2.6:4.9","ps2.6:4.10","ps2.6:4.11"],"kind":"text","text":{"pi":"Idaṁ kho pana, bhikkhave, dukkhaṁ ariyasaccaṁ.\nJātipi dukkhā, jarāpi dukkhā, byādhipi dukkho, maraṇampi dukkhaṁ, appiyehi sampayogo dukkho, piyehi vippayogo dukkho, yampicchaṁ na labhati tampi dukkhaṁ;\nsaṅkhittena pañcupādānakkhandhā dukkhā.\nIdaṁ kho pana, bhikkhave, dukkhasamudayaṁ ariyasaccaṁ—\nyāyaṁ taṇhā ponobhavikā nandirāgasahagatā tatratatrābhinandinī, seyyathidaṁ—\nkāmataṇhā, bhavataṇhā, vibhavataṇhā.\nIdaṁ kho pana, bhikkhave, dukkhanirodhaṁ ariyasaccaṁ—\nyo tassāyeva taṇhāya asesavirāganirodho cāgo paṭinissaggo mutti anālayo.\nIdaṁ kho pana, bhikkhave, dukkhanirodhagāminī paṭipadā ariyasaccaṁ—\nayameva ariyo aṭṭhaṅgiko maggo, seyyathidaṁ—\nsammādiṭṭhi …pe… sammāsamādhi."}},{"id":"ps2.6:5","sourceIds":["ps2.6:5.1","ps2.6:5.2","ps2.6:5.3"],"kind":"text","text":{"pi":"‘Idaṁ dukkhaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.\n‘Taṁ kho panidaṁ dukkhaṁ ariyasaccaṁ pariññeyyan’ti me, bhikkhave …pe…\npariññātanti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi."}},{"id":"ps2.6:6","sourceIds":["ps2.6:6.1","ps2.6:6.2","ps2.6:6.3"],"kind":"text","text":{"pi":"‘Idaṁ dukkhasamudayaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.\n‘Taṁ kho panidaṁ dukkhasamudayaṁ ariyasaccaṁ pahātabban’ti me, bhikkhave …pe…\npahīnanti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi."}},{"id":"ps2.6:7","sourceIds":["ps2.6:7.1","ps2.6:7.2","ps2.6:7.3"],"kind":"text","text":{"pi":"‘Idaṁ dukkhanirodhaṁ ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.\n‘Taṁ kho panidaṁ dukkhanirodhaṁ ariyasaccaṁ sacchikātabban’ti me, bhikkhave …pe…\nsacchikatanti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi."}},{"id":"ps2.6:8","sourceIds":["ps2.6:8.1","ps2.6:8.2","ps2.6:8.3"],"kind":"text","text":{"pi":"‘Idaṁ dukkhanirodhagāminī paṭipadā ariyasaccan’ti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.\n‘Taṁ kho panidaṁ dukkhanirodhagāminī paṭipadā ariyasaccaṁ bhāvetabban’ti me, bhikkhave …pe…\nbhāvitanti me, bhikkhave, pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi."}},{"id":"ps2.6:9","sourceIds":["ps2.6:9.1"],"kind":"text","text":{"pi":"Yāvakīvañca me, bhikkhave, imesu catūsu ariyasaccesu evaṁ tiparivaṭṭaṁ dvādasākāraṁ yathābhūtaṁ ñāṇadassanaṁ na suvisuddhaṁ ahosi, neva tāvāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ."}},{"id":"ps2.6:10","sourceIds":["ps2.6:10.1","ps2.6:10.2","ps2.6:10.3"],"kind":"text","text":{"pi":"Yato ca kho me, bhikkhave, imesu catūsu ariyasaccesu evaṁ tiparivaṭṭaṁ dvādasākāraṁ yathābhūtaṁ ñāṇadassanaṁ suvisuddhaṁ ahosi, athāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.\nÑāṇañca pana me dassanaṁ udapādi—\n‘akuppā me vimutti, ayamantimā jāti, natthi dāni punabbhavo’”ti."}},{"id":"ps2.6:11","sourceIds":["ps2.6:11.1","ps2.6:11.2"],"kind":"text","text":{"pi":"Idamavoca bhagavā.\nAttamanā pañcavaggiyā bhikkhū bhagavato bhāsitaṁ abhinandunti."}},{"id":"ps2.6:12","sourceIds":["ps2.6:12.1","ps2.6:12.2"],"kind":"text","text":{"pi":"Imasmiñca pana veyyākaraṇasmiṁ bhaññamāne āyasmato koṇḍaññassa virajaṁ vītamalaṁ dhammacakkhuṁ udapādi—\n“yaṁ kiñci samudayadhammaṁ, sabbaṁ taṁ nirodhadhamman”ti."}},{"id":"ps2.6:13","sourceIds":["ps2.6:13.1","ps2.6:13.2","ps2.6:13.3","ps2.6:13.4","ps2.6:13.5","ps2.6:13.6","ps2.6:13.7","ps2.6:13.8","ps2.6:13.9","ps2.6:13.10"],"kind":"text","text":{"pi":"Pavattite ca pana bhagavatā dhammacakke bhummā devā saddamanussāvesuṁ—\n“etaṁ bhagavatā bārāṇasiyaṁ isipatane migadāye anuttaraṁ dhammacakkaṁ pavattitaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.\nBhummānaṁ devānaṁ saddaṁ sutvā cātumahārājikā devā saddamanussāvesuṁ …\ncātumahārājikānaṁ devānaṁ saddaṁ sutvā tāvatiṁsā devā …pe…\nyāmā devā …pe…\ntusitā devā …pe…\nnimmānaratī devā …pe…\nparanimmitavasavattī devā …pe…\nbrahmakāyikā devā saddamanussāvesuṁ—\n“etaṁ bhagavatā bārāṇasiyaṁ isipatane migadāye anuttaraṁ dhammacakkaṁ pavattitaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti."}},{"id":"ps2.6:14","sourceIds":["ps2.6:14.1","ps2.6:14.2"],"kind":"text","text":{"pi":"Itiha tena khaṇena tena layena tena muhuttena yāva brahmalokā saddo abbhuggacchi.\nAyañca dasasahassī lokadhātu saṅkampi sampakampi sampavedhi, appamāṇo ca uḷāro obhāso loke pāturahosi atikkamma devānaṁ devānubhāvanti."}},{"id":"ps2.6:15","sourceIds":["ps2.6:15.1","ps2.6:15.2","ps2.6:15.3","ps2.6:15.4"],"kind":"text","text":{"pi":"Atha kho bhagavā imaṁ udānaṁ udānesi—\n“aññāsi vata bho koṇḍañño;\naññāsi vata bho koṇḍañño”ti.\nIti hidaṁ āyasmato koṇḍaññassa “aññāsikoṇḍañño”tveva nāmaṁ ahosi."}},{"id":"ps2.6:16","sourceIds":["ps2.6:16.1"],"kind":"text","text":{"pi":"“‘Idaṁ dukkhaṁ ariyasaccan’ti pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”."}},{"id":"ps2.6:17","sourceIds":["ps2.6:17.1","ps2.6:17.2","ps2.6:17.3","ps2.6:17.4","ps2.6:17.5","ps2.6:17.6","ps2.6:17.7","ps2.6:17.8","ps2.6:17.9","ps2.6:17.10","ps2.6:17.11","ps2.6:17.12","ps2.6:17.13","ps2.6:17.14","ps2.6:17.15","ps2.6:17.16","ps2.6:17.17","ps2.6:17.18","ps2.6:17.19","ps2.6:17.20"],"kind":"text","text":{"pi":"Cakkhuṁ udapādīti—\nkenaṭṭhena?\nÑāṇaṁ udapādīti—\nkenaṭṭhena?\nPaññā udapādīti—\nkenaṭṭhena?\nVijjā udapādīti—\nkenaṭṭhena?\nĀloko udapādīti—\nkenaṭṭhena?\nCakkhuṁ udapādīti—\ndassanaṭṭhena.\nÑāṇaṁ udapādīti—\nñātaṭṭhena.\nPaññā udapādīti—\npajānanaṭṭhena.\nVijjā udapādīti—\npaṭivedhaṭṭhena.\nĀloko udapādīti—\nobhāsaṭṭhena."}},{"id":"ps2.6:18","sourceIds":["ps2.6:18.1","ps2.6:18.2","ps2.6:18.3","ps2.6:18.4","ps2.6:18.5","ps2.6:18.6"],"kind":"text","text":{"pi":"Cakkhuṁ dhammo, ñāṇaṁ dhammo, paññā dhammo, vijjā dhammo, āloko dhammo.\nIme pañca dhammā dhammapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“dhammesu ñāṇaṁ dhammapaṭisambhidā”."}},{"id":"ps2.6:19","sourceIds":["ps2.6:19.1","ps2.6:19.2","ps2.6:19.3","ps2.6:19.4","ps2.6:19.5","ps2.6:19.6"],"kind":"text","text":{"pi":"Dassanaṭṭho attho, ñātaṭṭho attho, pajānanaṭṭho attho, paṭivedhaṭṭho attho, obhāsaṭṭho attho.\nIme pañca atthā atthapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“atthesu ñāṇaṁ atthapaṭisambhidā”."}},{"id":"ps2.6:20","sourceIds":["ps2.6:20.1","ps2.6:20.2","ps2.6:20.3","ps2.6:20.4","ps2.6:20.5","ps2.6:20.6"],"kind":"text","text":{"pi":"Pañca dhamme sandassetuṁ byañjananiruttābhilāpā, pañca atthe sandassetuṁ byañjananiruttābhilāpā.\nImā dasa niruttiyo niruttipaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“niruttīsu ñāṇaṁ niruttipaṭisambhidā”."}},{"id":"ps2.6:21","sourceIds":["ps2.6:21.1","ps2.6:21.2","ps2.6:21.3","ps2.6:21.4","ps2.6:21.5","ps2.6:21.6"],"kind":"text","text":{"pi":"Pañcasu dhammesu ñāṇāni, pañcasu atthesu ñāṇāni, dasasu niruttīsu ñāṇāni.\nImāni vīsati ñāṇāni paṭibhānapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“paṭibhānesu ñāṇaṁ paṭibhānapaṭisambhidā”."}},{"id":"ps2.6:22","sourceIds":["ps2.6:22.1","ps2.6:22.2"],"kind":"text","text":{"pi":"“‘Taṁ kho panidaṁ dukkhaṁ ariyasaccaṁ pariññeyyan’ti …pe…\npariññātanti pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”."}},{"id":"ps2.6:23","sourceIds":["ps2.6:23.1","ps2.6:23.2","ps2.6:23.3","ps2.6:23.4","ps2.6:23.5","ps2.6:23.6","ps2.6:23.7","ps2.6:23.8","ps2.6:23.9","ps2.6:23.10","ps2.6:23.11","ps2.6:23.12","ps2.6:23.13","ps2.6:23.14","ps2.6:23.15","ps2.6:23.16","ps2.6:23.17","ps2.6:23.18","ps2.6:23.19","ps2.6:23.20"],"kind":"text","text":{"pi":"Cakkhuṁ udapādīti—\nkenaṭṭhena?\nÑāṇaṁ udapādīti—\nkenaṭṭhena?\nPaññā udapādīti—\nkenaṭṭhena?\nVijjā udapādīti—\nkenaṭṭhena?\nĀloko udapādīti—\nkenaṭṭhena?\nCakkhuṁ udapādīti—\ndassanaṭṭhena.\nÑāṇaṁ udapādīti—\nñātaṭṭhena.\nPaññā udapādīti—\npajānanaṭṭhena.\nVijjā udapādīti—\npaṭivedhaṭṭhena.\nĀloko udapādīti—\nobhāsaṭṭhena."}},{"id":"ps2.6:24","sourceIds":["ps2.6:24.1","ps2.6:24.2","ps2.6:24.3","ps2.6:24.4","ps2.6:24.5","ps2.6:24.6"],"kind":"text","text":{"pi":"Cakkhuṁ dhammo, ñāṇaṁ dhammo, paññā dhammo, vijjā dhammo, āloko dhammo.\nIme pañca dhammā dhammapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“dhammesu ñāṇaṁ dhammapaṭisambhidā”."}},{"id":"ps2.6:25","sourceIds":["ps2.6:25.1","ps2.6:25.2","ps2.6:25.3","ps2.6:25.4","ps2.6:25.5","ps2.6:25.6"],"kind":"text","text":{"pi":"Dassanaṭṭho attho, ñātaṭṭho attho, pajānanaṭṭho attho, paṭivedhaṭṭho attho, obhāsaṭṭho attho.\nIme pañca atthā atthapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“atthesu ñāṇaṁ atthapaṭisambhidā”."}},{"id":"ps2.6:26","sourceIds":["ps2.6:26.1","ps2.6:26.2","ps2.6:26.3","ps2.6:26.4","ps2.6:26.5","ps2.6:26.6"],"kind":"text","text":{"pi":"Pañca dhamme sandassetuṁ byañjananiruttābhilāpā, pañca atthe sandassetuṁ byañjananiruttābhilāpā.\nImā dasa niruttiyo niruttipaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“niruttīsu ñāṇaṁ niruttipaṭisambhidā”."}},{"id":"ps2.6:27","sourceIds":["ps2.6:27.1","ps2.6:27.2","ps2.6:27.3","ps2.6:27.4","ps2.6:27.5","ps2.6:27.6"],"kind":"text","text":{"pi":"Pañcasu dhammesu ñāṇāni, pañcasu atthesu ñāṇāni, dasasu niruttīsu ñāṇāni.\nImāni vīsati ñāṇāni paṭibhānapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“paṭibhānesu ñāṇaṁ paṭibhānapaṭisambhidā”."}},{"id":"ps2.6:28","sourceIds":["ps2.6:28.1"],"kind":"text","text":{"pi":"Dukkhe ariyasacce pannarasa dhammā, pannarasa atthā, tiṁsa niruttiyo, saṭṭhi ñāṇāni."}},{"id":"ps2.6:29","sourceIds":["ps2.6:29.1","ps2.6:29.2","ps2.6:29.3","ps2.6:29.4","ps2.6:29.5"],"kind":"text","text":{"pi":"“‘Idaṁ dukkhasamudayaṁ ariyasaccan’ti pubbe ananussutesu dhammesu cakkhuṁ udapādi …pe…\nāloko udapādi.\n‘Taṁ kho panidaṁ dukkhasamudayaṁ ariyasaccaṁ pahātabban’ti …pe…\npahīnanti pubbe ananussutesu dhammesu cakkhuṁ udapādi …pe…\nāloko udapādi …pe… ”."}},{"id":"ps2.6:30","sourceIds":["ps2.6:30.1"],"kind":"text","text":{"pi":"Dukkhasamudaye ariyasacce pannarasa dhammā, pannarasa atthā, tiṁsa niruttiyo, saṭṭhi ñāṇāni."}},{"id":"ps2.6:31","sourceIds":["ps2.6:31.1","ps2.6:31.2","ps2.6:31.3","ps2.6:31.4","ps2.6:31.5"],"kind":"text","text":{"pi":"“‘Idaṁ dukkhanirodhaṁ ariyasaccan’ti pubbe ananussutesu dhammesu cakkhuṁ udapādi …pe…\nāloko udapādi.\n‘Taṁ kho panidaṁ dukkhanirodhaṁ ariyasaccaṁ sacchikātabban’ti …pe…\nsacchikatanti pubbe ananussutesu dhammesu cakkhuṁ udapādi …pe…\nāloko udapādi …pe… ”."}},{"id":"ps2.6:32","sourceIds":["ps2.6:32.1"],"kind":"text","text":{"pi":"Dukkhanirodhe ariyasacce pannarasa dhammā, pannarasa atthā, tiṁsa niruttiyo, saṭṭhi ñāṇāni."}},{"id":"ps2.6:33","sourceIds":["ps2.6:33.1","ps2.6:33.2","ps2.6:33.3","ps2.6:33.4","ps2.6:33.5"],"kind":"text","text":{"pi":"“‘Idaṁ dukkhanirodhagāminī paṭipadā ariyasaccan’ti pubbe ananussutesu dhammesu cakkhuṁ udapādi …pe…\nāloko udapādi.\n‘Taṁ kho panidaṁ dukkhanirodhagāminī paṭipadā ariyasaccaṁ bhāvetabban’ti …pe…\nbhāvitanti pubbe ananussutesu dhammesu cakkhuṁ udapādi …pe…\nāloko udapādi …pe… ”."}},{"id":"ps2.6:34","sourceIds":["ps2.6:34.1"],"kind":"text","text":{"pi":"Dukkhanirodhagāminiyā paṭipadāya ariyasacce pannarasa dhammā, pannarasa atthā, tiṁsa niruttiyo, saṭṭhi ñāṇāni."}},{"id":"ps2.6:35","sourceIds":["ps2.6:35.1"],"kind":"text","text":{"pi":"Catūsu ariyasaccesu saṭṭhi dhammā, saṭṭhi atthā, vīsatisataniruttiyo, cattālīsañca dve ca ñāṇasatāni."}},{"id":"ps2.6:36","sourceIds":["ps2.6:36.0","ps2.6:36.1","ps2.6:36.2","ps2.6:36.3","ps2.6:36.4","ps2.6:36.5"],"kind":"text","text":{"pi":"2.6.2. Satipaṭṭhānavāra\n“‘Ayaṁ kāye kāyānupassanā’ti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi.\nSā kho panāyaṁ kāye kāyānupassanā bhāvetabbāti me, bhikkhave …pe…\nbhāvitāti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi”."}},{"id":"ps2.6:37","sourceIds":["ps2.6:37.1","ps2.6:37.2","ps2.6:37.3","ps2.6:37.4","ps2.6:37.5","ps2.6:37.6","ps2.6:37.7"],"kind":"text","text":{"pi":"“Ayaṁ vedanāsu …pe…\nayaṁ citte …pe…\nayaṁ dhammesu dhammānupassanāti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi.\nSā kho panāyaṁ dhammesu dhammānupassanā bhāvetabbāti …pe…\nbhāvitāti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi”."}},{"id":"ps2.6:38","sourceIds":["ps2.6:38.1","ps2.6:38.2","ps2.6:38.3","ps2.6:38.4"],"kind":"text","text":{"pi":"“‘Ayaṁ kāye kāyānupassanā’ti pubbe ananussutesu dhammesu cakkhuṁ udapādi …pe…\nāloko udapādi …pe…\nsā kho panāyaṁ kāye kāyānupassanā bhāvetabbāti …pe…\nbhāvitāti pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”."}},{"id":"ps2.6:39","sourceIds":["ps2.6:39.1","ps2.6:39.2","ps2.6:39.3","ps2.6:39.4","ps2.6:39.5","ps2.6:39.6","ps2.6:39.7","ps2.6:39.8","ps2.6:39.9","ps2.6:39.10","ps2.6:39.11","ps2.6:39.12","ps2.6:39.13","ps2.6:39.14","ps2.6:39.15","ps2.6:39.16","ps2.6:39.17","ps2.6:39.18","ps2.6:39.19","ps2.6:39.20"],"kind":"text","text":{"pi":"Cakkhuṁ udapādīti—\nkenaṭṭhena?\nÑāṇaṁ udapādīti—\nkenaṭṭhena?\nPaññā udapādīti—\nkenaṭṭhena?\nVijjā udapādīti—\nkenaṭṭhena?\nĀloko udapādīti—\nkenaṭṭhena?\nCakkhuṁ udapādīti—\ndassanaṭṭhena.\nÑāṇaṁ udapādīti—\nñātaṭṭhena.\nPaññā udapādīti—\npajānanaṭṭhena.\nVijjā udapādīti—\npaṭivedhaṭṭhena.\nĀloko udapādīti—\nobhāsaṭṭhena."}},{"id":"ps2.6:40","sourceIds":["ps2.6:40.1","ps2.6:40.2","ps2.6:40.3","ps2.6:40.4","ps2.6:40.5","ps2.6:40.6"],"kind":"text","text":{"pi":"Cakkhuṁ dhammo, ñāṇaṁ dhammo, paññā dhammo, vijjā dhammo, āloko dhammo.\nIme pañca dhammā dhammapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“dhammesu ñāṇaṁ dhammapaṭisambhidā”."}},{"id":"ps2.6:41","sourceIds":["ps2.6:41.1","ps2.6:41.2","ps2.6:41.3","ps2.6:41.4","ps2.6:41.5","ps2.6:41.6"],"kind":"text","text":{"pi":"Dassanaṭṭho attho, ñātaṭṭho attho, pajānanaṭṭho attho, paṭivedhaṭṭho attho, obhāsaṭṭho attho.\nIme pañca atthā atthapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“atthesu ñāṇaṁ atthapaṭisambhidā”."}},{"id":"ps2.6:42","sourceIds":["ps2.6:42.1","ps2.6:42.2","ps2.6:42.3","ps2.6:42.4","ps2.6:42.5","ps2.6:42.6"],"kind":"text","text":{"pi":"Pañca dhamme sandassetuṁ byañjananiruttābhilāpā, pañca atthe sandassetuṁ byañjananiruttābhilāpā.\nImā dasa niruttiyo niruttipaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“niruttīsu ñāṇaṁ niruttipaṭisambhidā”."}},{"id":"ps2.6:43","sourceIds":["ps2.6:43.1","ps2.6:43.2","ps2.6:43.3","ps2.6:43.4","ps2.6:43.5","ps2.6:43.6"],"kind":"text","text":{"pi":"Pañcasu dhammesu ñāṇāni, pañcasu atthesu ñāṇāni, dasasu niruttīsu ñāṇāni.\nImāni vīsati ñāṇāni paṭibhānapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“paṭibhānesu ñāṇaṁ paṭibhānapaṭisambhidā”."}},{"id":"ps2.6:44","sourceIds":["ps2.6:44.1"],"kind":"text","text":{"pi":"Kāye kāyānupassanāsatipaṭṭhāne pannarasa dhammā, pannarasa atthā, tiṁsa niruttiyo, saṭṭhi ñāṇāni."}},{"id":"ps2.6:45","sourceIds":["ps2.6:45.1","ps2.6:45.2","ps2.6:45.3","ps2.6:45.4","ps2.6:45.5","ps2.6:45.6","ps2.6:45.7"],"kind":"text","text":{"pi":"“Ayaṁ vedanāsu …pe…\nayaṁ citte …pe…\nayaṁ dhammesu dhammānupassanāti pubbe ananussutesu dhammesu cakkhuṁ udapādi …pe…\nāloko udapādi …pe…\nsā kho panāyaṁ dhammesu dhammānupassanā bhāvetabbāti …pe…\nbhāvitāti pubbe ananussutesu dhammesu cakkhuṁ udapādi …pe…\nāloko udapādi …pe… ”."}},{"id":"ps2.6:46","sourceIds":["ps2.6:46.1"],"kind":"text","text":{"pi":"Dhammesu dhammānupassanā satipaṭṭhāne pannarasa dhammā, pannarasa atthā, tiṁsa niruttiyo, saṭṭhi ñāṇāni."}},{"id":"ps2.6:47","sourceIds":["ps2.6:47.1"],"kind":"text","text":{"pi":"Catūsu satipaṭṭhānesu saṭṭhi dhammā, saṭṭhi atthā, vīsatisataniruttiyo, cattālīsañca dve ca ñāṇasatāni."}},{"id":"ps2.6:48","sourceIds":["ps2.6:48.0","ps2.6:48.1","ps2.6:48.2","ps2.6:48.3","ps2.6:48.4","ps2.6:48.5"],"kind":"text","text":{"pi":"2.6.3. Iddhipādavāra\n“Ayaṁ chandasamādhipadhānasaṅkhārasamannāgato iddhipādoti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi.\nSo kho panāyaṁ chandasamādhipadhānasaṅkhārasamannāgato iddhipādo bhāvetabboti me, bhikkhave …pe…\nbhāvitoti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi."}},{"id":"ps2.6:49","sourceIds":["ps2.6:49.1","ps2.6:49.2","ps2.6:49.3","ps2.6:49.4","ps2.6:49.5","ps2.6:49.6"],"kind":"text","text":{"pi":"Ayaṁ vīriyasamādhi …pe…\nayaṁ cittasamādhi …pe…\nayaṁ vīmaṁsāsamādhipadhānasaṅkhārasamannāgato iddhipādoti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi.\nSo kho panāyaṁ vīmaṁsāsamādhipadhānasaṅkhārasamannāgato iddhipādo bhāvetabboti me, bhikkhave, pubbe ananussutesu dhammesu cakkhuṁ udapādi …pe…\nāloko udapādi”."}},{"id":"ps2.6:50","sourceIds":["ps2.6:50.1","ps2.6:50.2","ps2.6:50.3","ps2.6:50.4"],"kind":"text","text":{"pi":"“‘Ayaṁ chandasamādhipadhānasaṅkhārasamannāgato iddhipādo’ti pubbe ananussutesu dhammesu cakkhuṁ udapādi …pe…\nāloko udapādi …pe…\nso kho panāyaṁ chandasamādhipadhānasaṅkhārasamannāgato iddhipādo bhāvetabboti …pe…\nbhāvitoti pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”."}},{"id":"ps2.6:51","sourceIds":["ps2.6:51.1","ps2.6:51.2","ps2.6:51.3","ps2.6:51.4","ps2.6:51.5","ps2.6:51.6","ps2.6:51.7","ps2.6:51.8","ps2.6:51.9","ps2.6:51.10","ps2.6:51.11","ps2.6:51.12","ps2.6:51.13","ps2.6:51.14","ps2.6:51.15","ps2.6:51.16","ps2.6:51.17","ps2.6:51.18","ps2.6:51.19","ps2.6:51.20"],"kind":"text","text":{"pi":"Cakkhuṁ udapādīti—\nkenaṭṭhena?\nÑāṇaṁ udapādīti—\nkenaṭṭhena?\nPaññā udapādīti—\nkenaṭṭhena?\nVijjā udapādīti—\nkenaṭṭhena?\nĀloko udapādīti—\nkenaṭṭhena?\nCakkhuṁ udapādīti—\ndassanaṭṭhena.\nÑāṇaṁ udapādīti—\nñātaṭṭhena.\nPaññā udapādīti—\npajānanaṭṭhena.\nVijjā udapādīti—\npaṭivedhaṭṭhena.\nĀloko udapādīti—\nobhāsaṭṭhena."}},{"id":"ps2.6:52","sourceIds":["ps2.6:52.1","ps2.6:52.2","ps2.6:52.3","ps2.6:52.4","ps2.6:52.5","ps2.6:52.6"],"kind":"text","text":{"pi":"Cakkhuṁ dhammo, ñāṇaṁ dhammo, paññā dhammo, vijjā dhammo, āloko dhammo.\nIme pañca dhammā dhammapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“dhammesu ñāṇaṁ dhammapaṭisambhidā”."}},{"id":"ps2.6:53","sourceIds":["ps2.6:53.1","ps2.6:53.2","ps2.6:53.3","ps2.6:53.4","ps2.6:53.5","ps2.6:53.6"],"kind":"text","text":{"pi":"Dassanaṭṭho attho, ñātaṭṭho attho, pajānanaṭṭho attho, paṭivedhaṭṭho attho, obhāsaṭṭho attho.\nIme pañca atthā atthapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“atthesu ñāṇaṁ atthapaṭisambhidā”."}},{"id":"ps2.6:54","sourceIds":["ps2.6:54.1","ps2.6:54.2","ps2.6:54.3","ps2.6:54.4","ps2.6:54.5","ps2.6:54.6"],"kind":"text","text":{"pi":"Pañca dhamme sandassetuṁ byañjananiruttābhilāpā, pañca atthe sandassetuṁ byañjananiruttābhilāpā.\nImā dasa niruttiyo niruttipaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“niruttīsu ñāṇaṁ niruttipaṭisambhidā”."}},{"id":"ps2.6:55","sourceIds":["ps2.6:55.1","ps2.6:55.2","ps2.6:55.3","ps2.6:55.4","ps2.6:55.5","ps2.6:55.6"],"kind":"text","text":{"pi":"Pañcasu dhammesu ñāṇāni, pañcasu atthesu ñāṇāni, dasasu niruttīsu ñāṇāni.\nImāni vīsati ñāṇāni paṭibhānapaṭisambhidāya ārammaṇā ceva honti gocarā ca.\nYe tassā ārammaṇā te tassā gocarā.\nYe tassā gocarā te tassā ārammaṇā.\nTena vuccati—\n“paṭibhānesu ñāṇaṁ paṭibhānapaṭisambhidā”."}},{"id":"ps2.6:56","sourceIds":["ps2.6:56.1"],"kind":"text","text":{"pi":"Chandasamādhipadhānasaṅkhārasamannāgate iddhipāde pannarasa dhammā, pannarasa atthā, tiṁsa niruttiyo, saṭṭhi ñāṇāni."}},{"id":"ps2.6:57","sourceIds":["ps2.6:57.1","ps2.6:57.2","ps2.6:57.3","ps2.6:57.4","ps2.6:57.5","ps2.6:57.6","ps2.6:57.7"],"kind":"text","text":{"pi":"“Ayaṁ vīriyasamādhi …pe…\nayaṁ cittasamādhi …pe…\nayaṁ vīmaṁsāsamādhipadhānasaṅkhārasamannāgato iddhipādoti pubbe ananussutesu dhammesu cakkhuṁ udapādi …pe…\nāloko udapādi …pe…\nso kho panāyaṁ vīmaṁsāsamādhipadhānasaṅkhārasamannāgato iddhipādo bhāvetabboti …pe…\nbhāvitoti pubbe ananussutesu dhammesu cakkhuṁ udapādi …pe…\nāloko udapādi …pe… ”."}},{"id":"ps2.6:58","sourceIds":["ps2.6:58.1"],"kind":"text","text":{"pi":"Vīmaṁsāsamādhipadhānasaṅkhārasamannāgate iddhipāde pannarasa dhammā, pannarasa atthā, tiṁsa niruttiyo, saṭṭhi ñāṇāni."}},{"id":"ps2.6:59","sourceIds":["ps2.6:59.1"],"kind":"text","text":{"pi":"Catūsu iddhipādesu saṭṭhi dhammā, saṭṭhi atthā, vīsatisataniruttiyo, cattālīsañca dve ca ñāṇasatāni."}},{"id":"ps2.6:60","sourceIds":["ps2.6:60.0","ps2.6:60.1","ps2.6:60.2","ps2.6:60.3","ps2.6:60.4","ps2.6:60.5"],"kind":"text","text":{"pi":"2.6.4. Sattabodhisattavāra\n“‘Samudayo samudayo’ti kho, bhikkhave, vipassissa bodhisattassa pubbe ananussutesu dhammesu cakkhuṁ udapādi …pe…\nāloko udapādi.\n‘Nirodho nirodho’ti kho, bhikkhave, vipassissa bodhisattassa pubbe ananussutesu dhammesu cakkhuṁ udapādi …pe…\nāloko udapādi”.\nVipassissa bodhisattassa veyyākaraṇe dasa dhammā, dasa atthā, vīsati niruttiyo, cattālīsaṁ ñāṇāni."}},{"id":"ps2.6:61","sourceIds":["ps2.6:61.1","ps2.6:61.2","ps2.6:61.3","ps2.6:61.4","ps2.6:61.5","ps2.6:61.6","ps2.6:61.7","ps2.6:61.8","ps2.6:61.9"],"kind":"text","text":{"pi":"“‘Samudayo samudayo’ti kho, bhikkhave, sikhissa bodhisattassa …pe…\nvessabhussa bodhisattassa …pe…\nkakusandhassa bodhisattassa …pe…\nkoṇāgamanassa bodhisattassa …pe…\nkassapassa bodhisattassa pubbe ananussutesu dhammesu cakkhuṁ udapādi …pe…\nāloko udapādi.\n‘Nirodho nirodho’ti kho, bhikkhave, kassapassa bodhisattassa pubbe ananussutesu dhammesu cakkhuṁ udapādi …pe…\nāloko udapādi”.\nKassapassa bodhisattassa veyyākaraṇe dasa dhammā, dasa atthā, vīsati niruttiyo, cattālīsaṁ ñāṇāni."}},{"id":"ps2.6:62","sourceIds":["ps2.6:62.1","ps2.6:62.2","ps2.6:62.3","ps2.6:62.4","ps2.6:62.5"],"kind":"text","text":{"pi":"“‘Samudayo samudayo’ti kho, bhikkhave, gotamassa bodhisattassa pubbe ananussutesu dhammesu cakkhuṁ udapādi …pe…\nāloko udapādi.\n‘Nirodho nirodho’ti kho, bhikkhave, gotamassa bodhisattassa pubbe ananussutesu dhammesu cakkhuṁ udapādi …pe…\nāloko udapādi”.\nGotamassa bodhisattassa veyyākaraṇe dasa dhammā, dasa atthā, vīsati niruttiyo, cattālīsaṁ ñāṇāni."}},{"id":"ps2.6:63","sourceIds":["ps2.6:63.1"],"kind":"text","text":{"pi":"Sattannaṁ bodhisattānaṁ sattasu veyyākaraṇesu sattati dhammā, sattati atthā, cattālīsasataṁ niruttiyo, asīti ca dve ca ñāṇasatāni."}},{"id":"ps2.6:64","sourceIds":["ps2.6:64.0","ps2.6:64.1","ps2.6:64.2","ps2.6:64.3","ps2.6:64.4"],"kind":"text","text":{"pi":"2.6.5. Abhiññādivāra\n“‘Yāvatā abhiññāya abhiññaṭṭho ñāto diṭṭho vidito sacchikato phassito paññāya.\nAphassito paññāya abhiññaṭṭho natthī’ti—\ncakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”.\nAbhiññāya abhiññaṭṭhe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:65","sourceIds":["ps2.6:65.1","ps2.6:65.2","ps2.6:65.3","ps2.6:65.4","ps2.6:65.5","ps2.6:65.6","ps2.6:65.7"],"kind":"text","text":{"pi":"“‘Yāvatā pariññāya pariññaṭṭho …pe…\nyāvatā pahānassa pahānaṭṭho …pe…\nyāvatā bhāvanāya bhāvanaṭṭho …pe…\nyāvatā sacchikiriyāya sacchikiriyaṭṭho ñāto diṭṭho vidito sacchikato phassito paññāya.\nAphassito paññāya sacchikiriyaṭṭho natthī’ti—\ncakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”.\nSacchikiriyāya sacchikiriyaṭṭhe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:66","sourceIds":["ps2.6:66.1"],"kind":"text","text":{"pi":"Abhiññāya abhiññaṭṭhe, pariññāya pariññaṭṭhe, pahānāya pahānaṭṭhe, bhāvanāya bhāvanaṭṭhe, sacchikiriyāya sacchikiriyaṭṭhe pañcavīsasataṁ dhammā, pañcavīsasataṁ atthā, aḍḍhateyyāni niruttisatāni, pañca ñāṇasatāni."}},{"id":"ps2.6:67","sourceIds":["ps2.6:67.0","ps2.6:67.1","ps2.6:67.2","ps2.6:67.3","ps2.6:67.4"],"kind":"text","text":{"pi":"2.6.6. Khandhādivāra\n“‘Yāvatā khandhānaṁ khandhaṭṭho, ñāto diṭṭho vidito sacchikato phassito paññāya.\nAphassito paññāya khandhaṭṭho natthī’ti—\ncakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”.\nKhandhānaṁ khandhaṭṭhe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:68","sourceIds":["ps2.6:68.1","ps2.6:68.2","ps2.6:68.3","ps2.6:68.4","ps2.6:68.5","ps2.6:68.6","ps2.6:68.7","ps2.6:68.8"],"kind":"text","text":{"pi":"“‘Yāvatā dhātūnaṁ dhātuṭṭho …pe…\nyāvatā āyatanānaṁ āyatanaṭṭho …pe…\nyāvatā saṅkhatānaṁ saṅkhataṭṭho …pe…\nyāvatā asaṅkhatassa asaṅkhataṭṭho ñāto diṭṭho vidito sacchikato phassito paññāya.\nAphassito paññāya asaṅkhataṭṭho natthī’ti—\ncakkhuṁ udapādi …pe…\nāloko udapādi”.\nAsaṅkhatassa asaṅkhataṭṭhe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:69","sourceIds":["ps2.6:69.1"],"kind":"text","text":{"pi":"Khandhānaṁ khandhaṭṭhe, dhātūnaṁ dhātuṭṭhe, āyatanānaṁ āyatanaṭṭhe saṅkhatānaṁ saṅkhataṭṭhe, asaṅkhatassa asaṅkhataṭṭhe pañcavīsatisataṁ dhammā, pañcavīsatisataṁ atthā, aḍḍhateyyāni niruttisatāni, pañca ñāṇasatāni."}},{"id":"ps2.6:70","sourceIds":["ps2.6:70.0","ps2.6:70.1","ps2.6:70.2","ps2.6:70.3","ps2.6:70.4"],"kind":"text","text":{"pi":"2.6.7. Saccavāra\n“‘Yāvatā dukkhassa dukkhaṭṭho, ñāto diṭṭho vidito sacchikato phassito paññāya.\nAphassito paññāya dukkhaṭṭho natthī’ti—\ncakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”.\nDukkhassa dukkhaṭṭhe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:71","sourceIds":["ps2.6:71.1","ps2.6:71.2","ps2.6:71.3","ps2.6:71.4","ps2.6:71.5","ps2.6:71.6","ps2.6:71.7"],"kind":"text","text":{"pi":"“‘Yāvatā samudayassa samudayaṭṭho …pe…\nyāvatā nirodhassa nirodhaṭṭho …pe…\nyāvatā maggassa maggaṭṭho ñāto diṭṭho vidito sacchikato phassito paññāya.\nAphassito paññāya maggaṭṭho natthī’ti—\ncakkhuṁ udapādi …pe…\nāloko udapādi”.\nMaggassa maggaṭṭhe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:72","sourceIds":["ps2.6:72.1"],"kind":"text","text":{"pi":"Catūsu ariyasaccesu sataṁ dhammā, sataṁ atthā, dve niruttisatāni, cattāri ñāṇasatāni."}},{"id":"ps2.6:73","sourceIds":["ps2.6:73.0","ps2.6:73.1","ps2.6:73.2","ps2.6:73.3","ps2.6:73.4","ps2.6:73.5"],"kind":"text","text":{"pi":"2.6.8. Paṭisambhidāvāra\n“‘Yāvatā atthapaṭisambhidāya atthapaṭisambhidaṭṭho, ñāto diṭṭho vidito sacchikato phassito paññāya.\nAphassito paññāya atthapaṭisambhidaṭṭho natthī’ti—\ncakkhuṁ udapādi …pe…\nāloko udapādi”.\nAtthapaṭisambhidāya atthapaṭisambhidaṭṭhe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:74","sourceIds":["ps2.6:74.1","ps2.6:74.2","ps2.6:74.3","ps2.6:74.4","ps2.6:74.5","ps2.6:74.6","ps2.6:74.7"],"kind":"text","text":{"pi":"“‘Yāvatā dhammapaṭisambhidāya dhammapaṭisambhidaṭṭho …pe…\nyāvatā niruttipaṭisambhidāya niruttipaṭisambhidaṭṭho …pe…\nyāvatā paṭibhānapaṭisambhidāya paṭibhānapaṭisambhidaṭṭho, ñāto diṭṭho vidito sacchikato phassito paññāya.\nAphassito paññāya paṭibhānapaṭisambhidaṭṭho natthī’ti—\ncakkhuṁ udapādi …pe…\nāloko udapādi”.\nPaṭibhānapaṭisambhidaṭṭhe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:75","sourceIds":["ps2.6:75.1"],"kind":"text","text":{"pi":"Catūsu paṭisambhidāsu sataṁ dhammā, sataṁ atthā, dve niruttisatāni, cattāri ñāṇasatāni."}},{"id":"ps2.6:76","sourceIds":["ps2.6:76.0","ps2.6:76.1","ps2.6:76.2","ps2.6:76.3","ps2.6:76.4","ps2.6:76.5"],"kind":"text","text":{"pi":"2.6.9. Chabuddhadhammavāra\n“‘Yāvatā indriyaparopariyattañāṇaṁ, ñātaṁ diṭṭhaṁ viditaṁ sacchikataṁ phassitaṁ paññāya.\nAphassitaṁ paññāya indriyaparopariyattañāṇaṁ natthī’ti—\ncakkhuṁ udapādi …pe…\nāloko udapādi”.\nIndriyaparopariyattañāṇe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:77","sourceIds":["ps2.6:77.1","ps2.6:77.2","ps2.6:77.3","ps2.6:77.4","ps2.6:77.5","ps2.6:77.6","ps2.6:77.7","ps2.6:77.8"],"kind":"text","text":{"pi":"“‘Yāvatā sattānaṁ āsayānusaye ñāṇaṁ …pe…\nyāvatā yamakapāṭihīre ñāṇaṁ …pe…\nyāvatā mahākaruṇāsamāpattiyā ñāṇaṁ …pe…\nyāvatā sabbaññutaññāṇaṁ …pe…\nyāvatā anāvaraṇaṁ ñāṇaṁ, ñātaṁ diṭṭhaṁ viditaṁ sacchikataṁ phassitaṁ paññāya.\nAphassitaṁ paññāya anāvaraṇaṁ ñāṇaṁ natthī’ti—\ncakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi”.\nAnāvaraṇe ñāṇe pañcavīsati dhammā, pañcavīsati atthā, paññāsaṁ niruttiyo, sataṁ ñāṇāni."}},{"id":"ps2.6:78","sourceIds":["ps2.6:78.1"],"kind":"text","text":{"pi":"Chasu buddhadhammesu diyaḍḍhasataṁ dhammā, diyaḍḍhasataṁ atthā, tīṇi niruttisatāni, cha ñāṇasatāni."}},{"id":"ps2.6:79","sourceIds":["ps2.6:79.1","ps2.6:79.2"],"kind":"text","text":{"pi":"Paṭisambhidādhikaraṇe aḍḍhanavadhammasatāni, aḍḍhanavaatthasatāni, niruttisahassañca satta ca niruttisatāni, tīṇi ca ñāṇasahassāni, cattāri ca ñāṇasatānīti.\nPaṭisambhidākathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ps2.6/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}