{"id":"sn22.86","title":"With Anurādha","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn22.86","title":"With Anurādha","units":[{"id":"sn22.86:0","sourceIds":["sn22.86:0.1","sn22.86:0.2","sn22.86:0.3"],"kind":"text","text":{"pi":"Saṁyutta Nikāya 22.86\n9. Theravagga\nAnurādhasutta","en":"Linked Discourses 22.86\n9. Senior Mendicants\nWith Anurādha"}},{"id":"sn22.86:1","sourceIds":["sn22.86:1.1","sn22.86:1.2","sn22.86:1.3","sn22.86:1.4","sn22.86:1.5","sn22.86:1.6"],"kind":"text","text":{"pi":"Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.\nTena kho pana samayena āyasmā anurādho bhagavato avidūre araññakuṭikāyaṁ viharati.\nAtha kho sambahulā aññatitthiyā paribbājakā yenāyasmā anurādho tenupasaṅkamiṁsu; upasaṅkamitvā āyasmatā anurādhena saddhiṁ sammodiṁsu.\nSammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te aññatitthiyā paribbājakā āyasmantaṁ anurādhaṁ etadavocuṁ:\n“yo so, āvuso anurādha, tathāgato uttamapuriso paramapuriso paramapattipatto, taṁ tathāgato imesu catūsu ṭhānesu paññāpayamāno paññāpeti:\n‘hoti tathāgato paraṁ maraṇā’ti vā, ‘na hoti tathāgato paraṁ maraṇā’ti vā, ‘hoti ca na ca hoti tathāgato paraṁ maraṇā’ti vā, ‘neva hoti na na hoti tathāgato paraṁ maraṇā’ti vā”ti?","en":"At one time the Buddha was staying near Vesālī, at the Great Wood, in the hall with the peaked roof.\nNow at that time Venerable Anurādha was staying not far from the Buddha in a wilderness hut.\nThen several wanderers of other religions went up to Venerable Anurādha and exchanged greetings with him.\nWhen the greetings and polite conversation were over, they sat down to one side and said to him:\n“Reverend Anurādha, when a Realized One is describing a realized one—a supreme person, highest of people, who has reached the highest point—they describe them in these four ways:\nAfter death, a realized one still exists, or no longer exists, or both still exists and no longer exists, or neither still exists nor no longer exists.”"}},{"id":"sn22.86:2","sourceIds":["sn22.86:2.1","sn22.86:2.2","sn22.86:2.3","sn22.86:2.4","sn22.86:2.5","sn22.86:2.6"],"kind":"text","text":{"pi":"Evaṁ vutte, āyasmā anurādho te aññatitthiye paribbājake etadavoca:\n“yo so āvuso tathāgato uttamapuriso paramapuriso paramapattipatto taṁ tathāgato aññatra imehi catūhi ṭhānehi paññāpayamāno paññāpeti:\n‘hoti tathāgato paraṁ maraṇā’ti vā, ‘na hoti tathāgato paraṁ maraṇā’ti vā, ‘hoti ca na ca hoti tathāgato paraṁ maraṇā’ti vā, ‘neva hoti na na hoti tathāgato paraṁ maraṇā’ti vā”ti.\nEvaṁ vutte, aññatitthiyā paribbājakā āyasmantaṁ anurādhaṁ etadavocuṁ:\n“so cāyaṁ bhikkhu navo bhavissati acirapabbajito, thero vā pana bālo abyatto”ti.\nAtha kho aññatitthiyā paribbājakā āyasmantaṁ anurādhaṁ navavādena ca bālavādena ca apasādetvā uṭṭhāyāsanā pakkamiṁsu.","en":"When they said this, Venerable Anurādha said to those wanderers:\n“Reverends, when a Realized One is describing a realized one—a supreme person, highest of people, who has reached the highest point—they describe them other than these four ways:\nAfter death, a realized one still exists, or no longer exists, or both still exists and no longer exists, or neither still exists nor no longer exists.”\nWhen he said this, the wanderers said to him:\n“This mendicant must be junior, recently gone forth, or else a foolish, incompetent senior mendicant.”\nThen, after rebuking Venerable Anurādha by calling him “junior” and “foolish”, the wanderers rose from their seats and left."}},{"id":"sn22.86:3","sourceIds":["sn22.86:3.1","sn22.86:3.2","sn22.86:3.3"],"kind":"text","text":{"pi":"Atha kho āyasmato anurādhassa acirapakkantesu tesu aññatitthiyesu paribbājakesu etadahosi:\n“sace kho maṁ te aññatitthiyā paribbājakā uttariṁ pañhaṁ puccheyyuṁ.\nKathaṁ byākaramāno nu khvāhaṁ tesaṁ aññatitthiyānaṁ paribbājakānaṁ vuttavādī ceva bhagavato assaṁ, na ca bhagavantaṁ abhūtena abbhācikkheyyaṁ, dhammassa cānudhammaṁ byākareyyaṁ, na ca koci sahadhammiko vādānuvādo gārayhaṁ ṭhānaṁ āgaccheyyā”ti?","en":"Soon after they had left, Anurādha thought:\n“If those wanderers were to inquire further,\nhow should I answer them so as to repeat what the Buddha has said, and not misrepresent him with an untruth? How should I explain in line with his teaching, so that there would be no legitimate grounds for rebuttal and criticism?”"}},{"id":"sn22.86:4","sourceIds":["sn22.86:4.1","sn22.86:4.2","sn22.86:4.3","sn22.86:4.4","sn22.86:4.5","sn22.86:4.6"],"kind":"text","text":{"pi":"Atha kho āyasmā anurādho yena bhagavā tenupasaṅkami; upasaṅkamitvā …pe… ekamantaṁ nisinno kho āyasmā anurādho bhagavantaṁ etadavoca:\n“idhāhaṁ, bhante, bhagavato avidūre araññakuṭikāyaṁ viharāmi.\nAtha kho, bhante, sambahulā aññatitthiyā paribbājakā yenāhaṁ tenupasaṅkamiṁsu …pe… maṁ etadavocuṁ:\n‘yo so, āvuso anurādha, tathāgato uttamapuriso paramapuriso paramapattipatto taṁ tathāgato imesu catūsu ṭhānesu paññāpayamāno paññāpeti—\nhoti tathāgato paraṁ maraṇāti vā, na hoti …\nhoti ca na ca hoti, neva hoti na na hoti tathāgato paraṁ maraṇāti vā’”ti?","en":"Then Venerable Anurādha went up to the Buddha, bowed, sat down to one side, and told him all that had happened."}},{"id":"sn22.86:5","sourceIds":["sn22.86:5.1","sn22.86:5.2","sn22.86:5.3","sn22.86:5.4","sn22.86:5.5","sn22.86:5.6","sn22.86:5.7"],"kind":"text","text":{"pi":"Evaṁ vuttāhaṁ, bhante, te aññatitthiye paribbājake etadavocaṁ:\n“yo so, āvuso, tathāgato uttamapuriso paramapuriso paramapattipatto, taṁ tathāgato aññatra imehi catūhi ṭhānehi paññāpayamāno paññāpeti:\n‘hoti tathāgato paraṁ maraṇā’ti vā …pe…\n‘neva hoti na na hoti tathāgato paraṁ maraṇā’ti vāti.\nEvaṁ vutte, bhante, te aññatitthiyā paribbājakā maṁ etadavocuṁ:\n‘so cāyaṁ bhikkhu na vo bhavissati acirapabbajito thero vā pana bālo abyatto’ti.\nAtha kho maṁ, bhante, te aññatitthiyā paribbājakā navavādena ca bālavādena ca apasādetvā uṭṭhāyāsanā pakkamiṁsu."}},{"id":"sn22.86:6","sourceIds":["sn22.86:6.1","sn22.86:6.2","sn22.86:6.3"],"kind":"text","text":{"pi":"Tassa mayhaṁ, bhante, acirapakkantesu tesu aññatitthiyesu paribbājakesu etadahosi:\n‘sace kho maṁ te aññatitthiyā paribbājakā uttariṁ pañhaṁ puccheyyuṁ.\nKathaṁ byākaramāno nu khvāhaṁ tesaṁ aññatitthiyānaṁ paribbājakānaṁ vuttavādī ceva bhagavato assaṁ, na ca bhagavantaṁ abhūtena abbhācikkheyyaṁ, dhammassa cānudhammaṁ byākareyyaṁ, na ca koci sahadhammiko vādānuvādo gārayhaṁ ṭhānaṁ āgaccheyyā’”ti?"}},{"id":"sn22.86:7","sourceIds":["sn22.86:7.1","sn22.86:7.2","sn22.86:7.3","sn22.86:7.4","sn22.86:7.5","sn22.86:7.6","sn22.86:7.7","sn22.86:7.8","sn22.86:7.9","sn22.86:7.10","sn22.86:7.11","sn22.86:7.12","sn22.86:7.13","sn22.86:7.14","sn22.86:7.15","sn22.86:7.16"],"kind":"text","text":{"pi":"“Taṁ kiṁ maññasi, anurādha,\nrūpaṁ niccaṁ vā aniccaṁ vā”ti?\n“Aniccaṁ, bhante”.\n“Yaṁ panāniccaṁ dukkhaṁ vā taṁ sukhaṁ vā”ti?\n“Dukkhaṁ, bhante”.\n“Yaṁ panāniccaṁ dukkhaṁ vipariṇāmadhammaṁ kallaṁ nu taṁ samanupassituṁ:\n‘etaṁ mama, esohamasmi, eso me attā’”ti?\n“No hetaṁ, bhante”.\n“Vedanā …\nsaññā …\nsaṅkhārā …\nviññāṇaṁ niccaṁ vā aniccaṁ vā”ti?\n“Aniccaṁ, bhante” …pe…\ntasmātiha …pe…\nevaṁ passaṁ …pe…\nnāparaṁ itthattāyāti pajānāti”.","en":"“What do you think, Anurādha?\nIs form permanent or impermanent?”\n“Impermanent, sir.”\n“But if it’s impermanent, is it suffering or happiness?”\n“Suffering, sir.”\n“But if it’s impermanent, suffering, and perishable, is it fit to be regarded thus:\n‘This is mine, I am this, this is my self’?”\n“No, sir.”\n“Is feeling …” …\n“… perception …” …\n“… choices …” …\n“Is consciousness permanent or impermanent?”\n“Impermanent, sir.” …\n“So you should truly see …\nSeeing this …\nThey understand: ‘… there is nothing further for this place.’"}},{"id":"sn22.86:8","sourceIds":["sn22.86:8.1","sn22.86:8.2","sn22.86:8.3","sn22.86:8.4","sn22.86:8.5","sn22.86:8.6","sn22.86:8.7","sn22.86:8.8"],"kind":"text","text":{"pi":"“Taṁ kiṁ maññasi, anurādha,\nrūpaṁ tathāgatoti samanupassasī”ti?\n“No hetaṁ, bhante”.\n“Vedanaṁ …\nsaññaṁ …\nsaṅkhāre …\nviññāṇaṁ tathāgatoti samanupassasī”ti?\n“No hetaṁ, bhante”.","en":"What do you think, Anurādha?\nDo you consider that the label ‘realized one’ applies to form?”\n“No, sir.”\n“Do you consider that the label ‘realized one’ applies to feeling?” …\n“… perception?” …\n“… choices?” …\n“… consciousness?”\n“No, sir.”"}},{"id":"sn22.86:9","sourceIds":["sn22.86:9.1","sn22.86:9.2","sn22.86:9.3","sn22.86:9.4","sn22.86:9.5","sn22.86:9.6","sn22.86:9.7","sn22.86:9.8","sn22.86:9.9","sn22.86:9.10","sn22.86:9.11","sn22.86:9.12","sn22.86:9.13","sn22.86:9.14"],"kind":"text","text":{"pi":"“Taṁ kiṁ maññasi, anurādha,\nrūpasmiṁ tathāgatoti samanupassasī”ti?\n“No hetaṁ, bhante”.\n“Aññatra rūpā tathāgatoti samanupassasī”ti?\n“No hetaṁ, bhante”.\n“Vedanāya …pe…\naññatra vedanāya …pe…\nsaññāya …\naññatra saññāya …\nsaṅkhāresu …\naññatra saṅkhārehi …\nviññāṇasmiṁ …\naññatra viññāṇā tathāgatoti samanupassasī”ti?\n“No hetaṁ, bhante”.","en":"“What do you think, Anurādha?\nDo you consider that the label ‘realized one’ applies in relation to form?”\n“No, sir.”\n“Do you consider that the label ‘realized one’ applies apart from form?”\n“No, sir.”\n“Do you consider that the label ‘realized one’ applies in relation to feeling?” …\n“… apart from feeling?” …\n“… in relation to perception?” …\n“… apart from perception?” …\n“… in relation to choices?” …\n“… apart from choices?” …\n“… in relation to consciousness?” …\n“… apart from consciousness?”\n“No, sir.”"}},{"id":"sn22.86:10","sourceIds":["sn22.86:10.1","sn22.86:10.2","sn22.86:10.3"],"kind":"text","text":{"pi":"“Taṁ kiṁ maññasi, anurādha,\nrūpaṁ … vedanā … saññā … saṅkhārā … viññāṇaṁ tathāgatoti samanupassasī”ti?\n“No hetaṁ, bhante”.","en":"“What do you think, Anurādha?\nDo you consider that the label ‘realized one’ applies to one who has form?” … “… feeling?” … “… perception?” … “… choices?” … “… consciousness?”\n“No, sir.”"}},{"id":"sn22.86:11","sourceIds":["sn22.86:11.1","sn22.86:11.2","sn22.86:11.3"],"kind":"text","text":{"pi":"“Taṁ kiṁ maññasi, anurādha,\nayaṁ so arūpī … avedano … asaññī … asaṅkhāro … aviññāṇo tathāgatoti samanupassasī”ti?\n“No hetaṁ, bhante”.","en":"“What do you think, Anurādha?\nDo you consider that the label ‘realized one’ applies to that one who is without form?” … “… feeling?” … “… perception?” … “… choices?” … “… consciousness?”\n“No, sir.”"}},{"id":"sn22.86:12","sourceIds":["sn22.86:12.1","sn22.86:12.2","sn22.86:12.3","sn22.86:12.4"],"kind":"text","text":{"pi":"“Ettha ca te, anurādha, diṭṭheva dhamme saccato thetato tathāgate anupalabbhiyamāne kallaṁ nu te taṁ veyyākaraṇaṁ:\n‘yo so, āvuso, tathāgato uttamapuriso paramapuriso paramapattipatto taṁ tathāgato aññatra imehi catūhi ṭhānehi paññāpayamāno paññāpeti—\nhoti tathāgato paraṁ maraṇāti vā … na hoti … hoti ca na ca hoti … neva hoti na na hoti tathāgato paraṁ maraṇāti vā’”ti?\n“No hetaṁ, bhante”.","en":"“In that case, Anurādha, since a realized one is not found by you as a genuine fact in this very life, is it cogent for you to declare:\n‘Reverends, when a Realized One is describing a realized one—a supreme person, highest of people, who has reached the highest point—they describe them other than these four ways:\nAfter death, a realized one still exists, or no longer exists, or both still exists and no longer exists, or neither still exists nor no longer exists’?”\n“No, sir.”"}},{"id":"sn22.86:13","sourceIds":["sn22.86:13.1","sn22.86:13.2","sn22.86:13.3"],"kind":"text","text":{"pi":"“Sādhu sādhu, anurādha.\nPubbe cāhaṁ, anurādha, etarahi ca dukkhañceva paññapemi, dukkhassa ca nirodhan”ti.\nCatutthaṁ.","en":"“Good, good, Anurādha!\nIn the past, as today, what I describe is suffering and the cessation of suffering.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn22.86/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}