{"id":"sn40.10","title":"With Sakka","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn40.10","title":"With Sakka","units":[{"id":"sn40.10:0","sourceIds":["sn40.10:0.1","sn40.10:0.2","sn40.10:0.3"],"kind":"text","text":{"pi":"Saṁyutta Nikāya 40.10\n1. Moggallānavagga\nSakkasutta","en":"Linked Discourses 40.10\n1. By Moggallāna\nWith Sakka"}},{"id":"sn40.10:1","sourceIds":["sn40.10:1.1","sn40.10:1.2"],"kind":"text","text":{"pi":"Atha kho āyasmā mahāmoggallāno—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evameva—jetavane antarahito devesu tāvatiṁsesu pāturahosi.\nAtha kho sakko devānamindo pañcahi devatāsatehi saddhiṁ yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhāsi. Ekamantaṁ ṭhitaṁ kho sakkaṁ devānamindaṁ āyasmā mahāmoggallāno etadavoca:","en":"And then Venerable Mahāmoggallāna, as easily as a strong person would extend or contract their arm, vanished from Jeta’s Grove and reappeared among the gods of the thirty-three.\nThen Sakka, lord of gods, with five hundred deities came up to Mahāmoggallāna, bowed, and stood to one side. Mahāmoggallāna said to him:"}},{"id":"sn40.10:2","sourceIds":["sn40.10:2.1","sn40.10:2.2","sn40.10:2.3","sn40.10:2.4","sn40.10:2.5","sn40.10:2.6"],"kind":"text","text":{"pi":"“Sādhu kho, devānaminda, buddhasaraṇagamanaṁ hoti.\nBuddhasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nSādhu kho, devānaminda, dhammasaraṇagamanaṁ hoti.\nDhammasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nSādhu kho, devānaminda, saṅghasaraṇagamanaṁ hoti.\nSaṅghasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.","en":"“Lord of gods, it’s good to go for refuge to the Buddha.\nIt’s the reason why some sentient beings, when their body breaks up, after death, are reborn in a good place, a heavenly realm.\nIt’s good to go for refuge to the teaching.\nIt’s the reason why some sentient beings, when their body breaks up, after death, are reborn in a good place, a heavenly realm.\nIt’s good to go for refuge to the Saṅgha.\nIt’s the reason why some sentient beings, when their body breaks up, after death, are reborn in a good place, a heavenly realm.”"}},{"id":"sn40.10:3","sourceIds":["sn40.10:3.1","sn40.10:3.2","sn40.10:3.3","sn40.10:3.4","sn40.10:3.5","sn40.10:3.6"],"kind":"text","text":{"pi":"“Sādhu kho, mārisa moggallāna, buddhasaraṇagamanaṁ hoti.\nBuddhasaraṇagamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nSādhu kho, mārisa moggallāna, dhammasaraṇagamanaṁ hoti.\nDhammasaraṇagamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nSādhu kho, mārisa moggallāna, saṅgha …pe…\nsugatiṁ saggaṁ lokaṁ upapajjantī”ti.","en":"“My good Moggallāna, it’s good to go for refuge to the Buddha …\nthe teaching …\nthe Saṅgha.\nIt’s the reason why some sentient beings, when their body breaks up, after death, are reborn in a good place, a heavenly realm.”"}},{"id":"sn40.10:4","sourceIds":["sn40.10:4.1","sn40.10:4.2","sn40.10:4.3","sn40.10:4.4"],"kind":"text","text":{"pi":"Atha kho sakko devānamindo chahi devatāsatehi saddhiṁ …pe…\natha kho sakko devānamindo sattahi devatāsatehi saddhiṁ …pe…\natha kho sakko devānamindo aṭṭhahi devatāsatehi saddhiṁ …pe…\natha kho sakko devānamindo asītiyā devatāsahassehi saddhiṁ yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhāsi. Ekamantaṁ ṭhitaṁ kho sakkaṁ devānamindaṁ āyasmā mahāmoggallāno etadavoca:","en":"Then Sakka, lord of gods, with six hundred deities …\nThen Sakka, lord of gods, with seven hundred deities …\nThen Sakka, lord of gods, with eight hundred deities …\nThen Sakka, lord of gods, with eighty thousand deities …"}},{"id":"sn40.10:5","sourceIds":["sn40.10:5.1","sn40.10:5.2","sn40.10:5.3","sn40.10:5.4","sn40.10:5.5","sn40.10:5.6"],"kind":"text","text":{"pi":"“Sādhu kho, devānaminda, buddhasaraṇagamanaṁ hoti.\nBuddhasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nSādhu kho, devānaminda, dhammasaraṇagamanaṁ hoti.\nDhammasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nSādhu kho, devānaminda, saṅghasaraṇagamanaṁ hoti.\nSaṅghasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti."}},{"id":"sn40.10:6","sourceIds":["sn40.10:6.1","sn40.10:6.2","sn40.10:6.3","sn40.10:6.4","sn40.10:6.5"],"kind":"text","text":{"pi":"“Sādhu kho, mārisa moggallāna, buddhasaraṇagamanaṁ hoti.\nBuddhasaraṇagamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nSādhu kho, mārisa moggallāna, dhammasaraṇagamanaṁ hoti …pe…\nsādhu kho, mārisa moggallāna, saṅghasaraṇagamanaṁ hoti.\nSaṅghasaraṇagamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti."}},{"id":"sn40.10:7","sourceIds":["sn40.10:7.1"],"kind":"text","text":{"pi":"Atha kho sakko devānamindo pañcahi devatāsatehi saddhiṁ yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhāsi. Ekamantaṁ ṭhitaṁ kho sakkaṁ devānamindaṁ āyasmā mahāmoggallāno etadavoca:","en":"Then Sakka, lord of gods, with five hundred deities came up to Mahāmoggallāna, bowed, and stood to one side. Mahāmoggallāna said to him:"}},{"id":"sn40.10:8","sourceIds":["sn40.10:8.1","sn40.10:8.2","sn40.10:8.3"],"kind":"text","text":{"pi":"“Sādhu kho, devānaminda, buddhe aveccappasādena samannāgamanaṁ hoti:\n‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.\nBuddhe aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.","en":"“Lord of gods, it’s good to have experiential confidence in the Buddha:\n‘That Blessed One is perfected, a fully awakened Buddha, accomplished in knowledge and conduct, holy, knower of the world, supreme guide for those fit for training, teacher of gods and humans, awakened, blessed.’\nIt’s the reason why some sentient beings, when their body breaks up, after death, are reborn in a good place, a heavenly realm."}},{"id":"sn40.10:9","sourceIds":["sn40.10:9.1","sn40.10:9.2","sn40.10:9.3"],"kind":"text","text":{"pi":"Sādhu kho, devānaminda, dhamme aveccappasādena samannāgamanaṁ hoti:\n‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.\nDhamme aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.","en":"It’s good to have experiential confidence in the teaching:\n‘The teaching is well explained by the Buddha—apparent in the present life, immediately effective, inviting inspection, relevant, so that sensible people can know it for themselves.’\nIt’s the reason why some sentient beings, when their body breaks up, after death, are reborn in a good place, a heavenly realm."}},{"id":"sn40.10:10","sourceIds":["sn40.10:10.1","sn40.10:10.2","sn40.10:10.3"],"kind":"text","text":{"pi":"Sādhu kho, devānaminda, saṅghe aveccappasādena samannāgamanaṁ hoti:\n‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.\nSaṅghe aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.","en":"It’s good to have experiential confidence in the Saṅgha:\n‘The Saṅgha of the Buddha’s disciples is practicing the way that’s good, direct, systematic, and proper. It consists of the four pairs, the eight individual persons. This is the Saṅgha of the Buddha’s disciples that is worthy of offerings dedicated to the gods, worthy of hospitality, worthy of a religious donation, worthy of greeting with cupped palms, and is the supreme field of merit for the world.’\nIt’s the reason why some sentient beings, when their body breaks up, after death, are reborn in a good place, a heavenly realm."}},{"id":"sn40.10:11","sourceIds":["sn40.10:11.1","sn40.10:11.2"],"kind":"text","text":{"pi":"Sādhu kho, devānaminda, ariyakantehi sīlehi samannāgamanaṁ hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi.\nAriyakantehi sīlehi samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.","en":"It’s good to have the ethical conduct that’s loved by the noble ones, unbroken, impeccable, spotless, and unmarred, liberating, praised by sensible people, not mistaken, and leading to immersion.\nIt’s the reason why some sentient beings, when their body breaks up, after death, are reborn in a good place, a heavenly realm.”"}},{"id":"sn40.10:12","sourceIds":["sn40.10:12.1","sn40.10:12.2","sn40.10:12.3"],"kind":"text","text":{"pi":"“Sādhu kho, mārisa moggallāna, buddhe aveccappasādena samannāgamanaṁ hoti:\n‘itipi so …pe… satthā devamanussānaṁ buddho bhagavā’ti.\nBuddhe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.","en":"“My good Moggallāna, it’s good to have experiential confidence in the Buddha …"}},{"id":"sn40.10:13","sourceIds":["sn40.10:13.1","sn40.10:13.2","sn40.10:13.3"],"kind":"text","text":{"pi":"Sādhu kho, mārisa moggallāna, dhamme aveccappasādena samannāgamanaṁ hoti:\n‘svākkhāto bhagavatā dhammo …pe… paccattaṁ veditabbo viññūhī’ti.\nDhamme aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.","en":"the teaching …"}},{"id":"sn40.10:14","sourceIds":["sn40.10:14.1","sn40.10:14.2","sn40.10:14.3"],"kind":"text","text":{"pi":"Sādhu kho, mārisa moggallāna, saṅghe aveccappasādena samannāgamanaṁ hoti:\n‘suppaṭipanno bhagavato sāvakasaṅgho …pe… anuttaraṁ puññakkhettaṁ lokassā’ti.\nSaṅghe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.","en":"the Saṅgha …"}},{"id":"sn40.10:15","sourceIds":["sn40.10:15.1","sn40.10:15.2"],"kind":"text","text":{"pi":"Sādhu kho, mārisa moggallāna, ariyakantehi sīlehi samannāgamanaṁ hoti akhaṇḍehi …pe… samādhisaṁvattanikehi.\nAriyakantehi sīlehi samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.","en":"and to have the ethical conduct that’s loved by the noble ones …\nIt’s the reason why some sentient beings, when their body breaks up, after death, are reborn in a good place, a heavenly realm.”"}},{"id":"sn40.10:16","sourceIds":["sn40.10:16.1","sn40.10:16.2","sn40.10:16.3","sn40.10:16.4"],"kind":"text","text":{"pi":"Atha kho sakko devānamindo chahi devatāsatehi saddhiṁ …pe….\nAtha kho sakko devānamindo sattahi devatāsatehi saddhiṁ …pe….\nAtha kho sakko devānamindo aṭṭhahi devatāsatehi saddhiṁ …pe….\nAtha kho sakko devānamindo asītiyā devatāsahassehi saddhiṁ yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhāsi. Ekamantaṁ ṭhitaṁ kho sakkaṁ devānamindaṁ āyasmā mahāmoggallāno etadavoca:","en":"Then Sakka, lord of gods, with six hundred deities …\nThen Sakka, lord of gods, with seven hundred deities …\nThen Sakka, lord of gods, with eight hundred deities …\nThen Sakka, lord of gods, with eighty thousand deities …"}},{"id":"sn40.10:17","sourceIds":["sn40.10:17.1","sn40.10:17.2","sn40.10:17.3"],"kind":"text","text":{"pi":"“Sādhu kho, devānaminda, buddhe aveccappasādena samannāgamanaṁ hoti:\n‘itipi so bhagavā …pe… satthā devamanussānaṁ buddho bhagavā’ti.\nBuddhe aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti."}},{"id":"sn40.10:18","sourceIds":["sn40.10:18.1","sn40.10:18.2","sn40.10:18.3"],"kind":"text","text":{"pi":"Sādhu kho, devānaminda, dhamme aveccappasādena samannāgamanaṁ hoti:\n‘svākkhāto bhagavatā dhammo …pe… paccattaṁ veditabbo viññūhī’ti.\nDhamme aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti."}},{"id":"sn40.10:19","sourceIds":["sn40.10:19.1","sn40.10:19.2","sn40.10:19.3"],"kind":"text","text":{"pi":"Sādhu kho, devānaminda, saṅghe aveccappasādena samannāgamanaṁ hoti:\n‘suppaṭipanno bhagavato sāvakasaṅgho …pe… anuttaraṁ puññakkhettaṁ lokassā’ti.\nSaṅghe aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti."}},{"id":"sn40.10:20","sourceIds":["sn40.10:20.1","sn40.10:20.2"],"kind":"text","text":{"pi":"Sādhu kho, devānaminda, ariyakantehi sīlehi samannāgamanaṁ hoti akhaṇḍehi …pe… samādhisaṁvattanikehi.\nAriyakantehi sīlehi samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti."}},{"id":"sn40.10:21","sourceIds":["sn40.10:21.1","sn40.10:21.2","sn40.10:21.3"],"kind":"text","text":{"pi":"“Sādhu kho, mārisa moggallāna, buddhe aveccappasādena samannāgamanaṁ hoti:\n‘itipi so bhagavā …pe… satthā devamanussānaṁ buddho bhagavā’ti.\nBuddhe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti."}},{"id":"sn40.10:22","sourceIds":["sn40.10:22.1","sn40.10:22.2","sn40.10:22.3"],"kind":"text","text":{"pi":"Sādhu kho, mārisa moggallāna, dhamme aveccappasādena samannāgamanaṁ hoti:\n‘svākkhāto bhagavatā dhammo …pe… paccattaṁ veditabbo viññūhī’ti.\nDhamme aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti."}},{"id":"sn40.10:23","sourceIds":["sn40.10:23.1","sn40.10:23.2","sn40.10:23.3"],"kind":"text","text":{"pi":"Sādhu kho, mārisa moggallāna, saṅghe aveccappasādena samannāgamanaṁ hoti:\n‘suppaṭipanno bhagavato sāvakasaṅgho …pe… anuttaraṁ puññakkhettaṁ lokassā’ti.\nSaṅghe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti."}},{"id":"sn40.10:24","sourceIds":["sn40.10:24.1","sn40.10:24.2"],"kind":"text","text":{"pi":"Sādhu kho, mārisa moggallāna, ariyakantehi sīlehi samannāgamanaṁ hoti akhaṇḍehi …pe… samādhisaṁvattanikehi.\nAriyakantehi sīlehi samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti."}},{"id":"sn40.10:25","sourceIds":["sn40.10:25.1","sn40.10:25.2"],"kind":"text","text":{"pi":"Atha kho sakko devānamindo pañcahi devatāsatehi saddhiṁ yenāyasmā mahāmoggallāno tenupasaṅkami …pe…\nekamantaṁ ṭhitaṁ kho sakkaṁ devānamindaṁ āyasmā mahāmoggallāno etadavoca:","en":"Then Sakka, lord of gods, with five hundred deities came up to Mahāmoggallāna,\nbowed, and stood to one side. Mahāmoggallāna said to him:"}},{"id":"sn40.10:26","sourceIds":["sn40.10:26.1","sn40.10:26.2","sn40.10:26.3","sn40.10:26.4"],"kind":"text","text":{"pi":"“Sādhu kho, devānaminda, buddhasaraṇagamanaṁ hoti.\nBuddhasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi.","en":"“Lord of gods, it’s good to go for refuge to the Buddha.\nIt’s the reason why some sentient beings, when their body breaks up, after death, are reborn in a good place, a heavenly realm.\nThey surpass other gods in ten respects:\nheavenly lifespan, beauty, happiness, glory, sovereignty, sights, sounds, smells, tastes, and touches."}},{"id":"sn40.10:27","sourceIds":["sn40.10:27.1","sn40.10:27.2","sn40.10:27.3","sn40.10:27.4"],"kind":"text","text":{"pi":"Sādhu kho, devānaminda, dhammasaraṇagamanaṁ hoti.\nDhammasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi.","en":"It’s good to go for refuge to the teaching …"}},{"id":"sn40.10:28","sourceIds":["sn40.10:28.1","sn40.10:28.2","sn40.10:28.3","sn40.10:28.4"],"kind":"text","text":{"pi":"Sādhu kho, devānaminda, saṅghasaraṇagamanaṁ hoti.\nSaṅghasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehī”ti.","en":"It’s good to go for refuge to the Saṅgha.\nIt’s the reason why some sentient beings, when their body breaks up, after death, are reborn in a good place, a heavenly realm.\nThey surpass other gods in ten respects:\nheavenly lifespan, beauty, happiness, glory, sovereignty, sights, sounds, smells, tastes, and touches.”"}},{"id":"sn40.10:29","sourceIds":["sn40.10:29.1","sn40.10:29.2","sn40.10:29.3","sn40.10:29.4"],"kind":"text","text":{"pi":"“Sādhu kho, mārisa moggallāna, buddhasaraṇagamanaṁ hoti.\nBuddhasaraṇagamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi.","en":"“My good Moggallāna, it’s good to go for refuge to the Buddha …”"}},{"id":"sn40.10:30","sourceIds":["sn40.10:30.1"],"kind":"text","text":{"pi":"Sādhu kho, mārisa moggallāna, dhammasaraṇagamanaṁ hoti …pe…."}},{"id":"sn40.10:31","sourceIds":["sn40.10:31.1","sn40.10:31.2","sn40.10:31.3","sn40.10:31.4"],"kind":"text","text":{"pi":"Sādhu kho, mārisa moggallāna, saṅghasaraṇagamanaṁ hoti.\nSaṅghasaraṇagamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehī”ti."}},{"id":"sn40.10:32","sourceIds":["sn40.10:32.1","sn40.10:32.2","sn40.10:32.3","sn40.10:32.4"],"kind":"text","text":{"pi":"Atha kho sakko devānamindo chahi devatāsatehi saddhiṁ …pe…\natha kho sakko devānamindo sattahi devatāsatehi saddhiṁ …pe…\natha kho sakko devānamindo aṭṭhahi devatāsatehi saddhiṁ …pe…\natha kho sakko devānamindo asītiyā devatāsahassehi saddhiṁ yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhāsi. Ekamantaṁ ṭhitaṁ kho sakkaṁ devānamindaṁ āyasmā mahāmoggallāno etadavoca:","en":"Then Sakka, lord of gods, with six hundred deities …\nThen Sakka, lord of gods, with seven hundred deities …\nThen Sakka, lord of gods, with eight hundred deities …\nThen Sakka, lord of gods, with eighty thousand deities …"}},{"id":"sn40.10:33","sourceIds":["sn40.10:33.1","sn40.10:33.2","sn40.10:33.3","sn40.10:33.4"],"kind":"text","text":{"pi":"“Sādhu kho, devānaminda, buddhasaraṇagamanaṁ hoti.\nBuddhasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi."}},{"id":"sn40.10:34","sourceIds":["sn40.10:34.1"],"kind":"text","text":{"pi":"Sādhu kho, devānaminda, dhammasaraṇagamanaṁ hoti …pe…."}},{"id":"sn40.10:35","sourceIds":["sn40.10:35.1","sn40.10:35.2","sn40.10:35.3","sn40.10:35.4"],"kind":"text","text":{"pi":"Sādhu kho, devānaminda, saṅghasaraṇagamanaṁ hoti.\nSaṅghasaraṇagamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehī”ti."}},{"id":"sn40.10:36","sourceIds":["sn40.10:36.1","sn40.10:36.2","sn40.10:36.3","sn40.10:36.4","sn40.10:36.5","sn40.10:36.6"],"kind":"text","text":{"pi":"“Sādhu kho, mārisa moggallāna, buddhasaraṇagamanaṁ hoti …pe…\nsādhu kho, mārisa moggallāna, dhammasaraṇagamanaṁ hoti …pe…\nsādhu kho, mārisa moggallāna, saṅghasaraṇagamanaṁ hoti.\nSaṅghasaraṇagamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehī”ti."}},{"id":"sn40.10:37","sourceIds":["sn40.10:37.1"],"kind":"text","text":{"pi":"Atha kho sakko devānamindo pañcahi devatāsatehi saddhiṁ yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhāsi. Ekamantaṁ ṭhitaṁ kho sakkaṁ devānamindaṁ āyasmā mahāmoggallāno etadavoca:","en":"Then Sakka, lord of gods, with five hundred deities came up to Mahāmoggallāna, bowed, and stood to one side. Mahāmoggallāna said to him:"}},{"id":"sn40.10:38","sourceIds":["sn40.10:38.1","sn40.10:38.2","sn40.10:38.3","sn40.10:38.4","sn40.10:38.5"],"kind":"text","text":{"pi":"“Sādhu kho, devānaminda, buddhe aveccappasādena samannāgamanaṁ hoti:\n‘itipi so bhagavā …pe… satthā devamanussānaṁ buddho bhagavā’ti.\nBuddhe aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi.","en":"“Lord of gods, it’s good to have experiential confidence in the Buddha:\n‘That Blessed One is perfected, a fully awakened Buddha … teacher of gods and humans, awakened, blessed.’\nIt’s the reason why some sentient beings, when their body breaks up, after death, are reborn in a good place, a heavenly realm.\nThey surpass other gods in ten respects:\nheavenly lifespan, beauty, happiness, glory, sovereignty, sights, sounds, smells, tastes, and touches."}},{"id":"sn40.10:39","sourceIds":["sn40.10:39.1","sn40.10:39.2","sn40.10:39.3"],"kind":"text","text":{"pi":"Sādhu kho, devānaminda, dhamme aveccappasādena samannāgamanaṁ hoti:\n‘svākkhāto bhagavatā dhammo …pe… paccattaṁ veditabbo viññūhī’ti.\nDhamme aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti …pe….","en":"It’s good to have experiential confidence in the teaching …"}},{"id":"sn40.10:40","sourceIds":["sn40.10:40.1","sn40.10:40.2","sn40.10:40.3"],"kind":"text","text":{"pi":"Sādhu kho, devānaminda, saṅghe aveccappasādena samannāgamanaṁ hoti:\n‘suppaṭipanno bhagavato sāvakasaṅgho …pe… lokassā’ti.\nSaṅghe aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti …pe….","en":"It’s good to have experiential confidence in the Saṅgha …"}},{"id":"sn40.10:41","sourceIds":["sn40.10:41.1","sn40.10:41.2","sn40.10:41.3","sn40.10:41.4"],"kind":"text","text":{"pi":"Sādhu kho, devānaminda, ariyakantehi sīlehi samannāgamanaṁ hoti akhaṇḍehi …pe… samādhisaṁvattanikehi.\nAriyakantehi sīlehi samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehī”ti.","en":"It’s good to have the ethical conduct that’s loved by the noble ones …”"}},{"id":"sn40.10:42","sourceIds":["sn40.10:42.1","sn40.10:42.2","sn40.10:42.3","sn40.10:42.4","sn40.10:42.5"],"kind":"text","text":{"pi":"“Sādhu kho, mārisa moggallāna, buddhe aveccappasādena samannāgamanaṁ hoti:\n‘itipi so bhagavā …pe… satthā devamanussānaṁ buddho bhagavā’ti.\nBuddhe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi.","en":"“My good Moggallāna, it’s good to have experiential confidence in the Buddha …”"}},{"id":"sn40.10:43","sourceIds":["sn40.10:43.1","sn40.10:43.2","sn40.10:43.3","sn40.10:43.4","sn40.10:43.5"],"kind":"text","text":{"pi":"Sādhu kho, mārisa moggallāna, dhamme aveccappasādena samannāgamanaṁ hoti:\n‘svākkhāto bhagavatā dhammo …pe… paccattaṁ veditabbo viññūhī’ti.\nDhamme aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi."}},{"id":"sn40.10:44","sourceIds":["sn40.10:44.1","sn40.10:44.2","sn40.10:44.3"],"kind":"text","text":{"pi":"Sādhu kho, mārisa moggallāna, saṅghe aveccappasādena samannāgamanaṁ hoti:\n‘suppaṭipanno bhagavato sāvakasaṅgho …pe… lokassā’ti.\nSaṅghe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti …pe…."}},{"id":"sn40.10:45","sourceIds":["sn40.10:45.1","sn40.10:45.2","sn40.10:45.3","sn40.10:45.4"],"kind":"text","text":{"pi":"Sādhu kho, mārisa moggallāna, ariyakantehi sīlehi samannāgamanaṁ hoti akhaṇḍehi …pe… samādhisaṁvattanikehi.\nAriyakantehi sīlehi samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehī”ti."}},{"id":"sn40.10:46","sourceIds":["sn40.10:46.1","sn40.10:46.2","sn40.10:46.3","sn40.10:46.4"],"kind":"text","text":{"pi":"Atha kho sakko devānamindo chahi devatāsatehi saddhiṁ …pe…\natha kho sakko devānamindo sattahi devatāsatehi saddhiṁ …pe…\natha kho sakko devānamindo aṭṭhahi devatāsatehi saddhiṁ …pe…\natha kho sakko devānamindo asītiyā devatāsahassehi saddhiṁ yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhāsi. Ekamantaṁ ṭhitaṁ kho sakkaṁ devānamindaṁ āyasmā mahāmoggallāno etadavoca:","en":"Then Sakka, lord of gods, with six hundred deities …\nThen Sakka, lord of gods, with seven hundred deities …\nThen Sakka, lord of gods, with eight hundred deities …\nThen Sakka, lord of gods, with eighty thousand deities …"}},{"id":"sn40.10:47","sourceIds":["sn40.10:47.1","sn40.10:47.2","sn40.10:47.3","sn40.10:47.4","sn40.10:47.5"],"kind":"text","text":{"pi":"“Sādhu kho, devānaminda, buddhe aveccappasādena samannāgamanaṁ hoti:\n‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.\nBuddhe aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi."}},{"id":"sn40.10:48","sourceIds":["sn40.10:48.1","sn40.10:48.2","sn40.10:48.3","sn40.10:48.4","sn40.10:48.5"],"kind":"text","text":{"pi":"Sādhu kho, devānaminda, dhamme aveccappasādena samannāgamanaṁ hoti:\n‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.\nDhamme aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi."}},{"id":"sn40.10:49","sourceIds":["sn40.10:49.1","sn40.10:49.2","sn40.10:49.3","sn40.10:49.4","sn40.10:49.5"],"kind":"text","text":{"pi":"Sādhu kho, devānaminda, saṅghe aveccappasādena samannāgamanaṁ hoti:\n‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.\nSaṅghe aveccappasādena samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi."}},{"id":"sn40.10:50","sourceIds":["sn40.10:50.1","sn40.10:50.2","sn40.10:50.3","sn40.10:50.4"],"kind":"text","text":{"pi":"Sādhu kho, devānaminda, ariyakantehi sīlehi samannāgamanaṁ hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi.\nAriyakantehi sīlehi samannāgamanahetu kho, devānaminda, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehī”ti."}},{"id":"sn40.10:51","sourceIds":["sn40.10:51.1","sn40.10:51.2","sn40.10:51.3","sn40.10:51.4","sn40.10:51.5"],"kind":"text","text":{"pi":"“Sādhu kho, mārisa moggallāna, buddhe aveccappasādena samannāgamanaṁ hoti:\n‘itipi so bhagavā …pe… satthā devamanussānaṁ buddho bhagavā’ti.\nBuddhe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi."}},{"id":"sn40.10:52","sourceIds":["sn40.10:52.1","sn40.10:52.2","sn40.10:52.3","sn40.10:52.4","sn40.10:52.5"],"kind":"text","text":{"pi":"Sādhu kho, mārisa moggallāna, dhamme aveccappasādena samannāgamanaṁ hoti:\n‘svākkhāto bhagavatā dhammo …pe… paccattaṁ veditabbo viññūhī’ti.\nDhamme aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi."}},{"id":"sn40.10:53","sourceIds":["sn40.10:53.1","sn40.10:53.2","sn40.10:53.3","sn40.10:53.4","sn40.10:53.5"],"kind":"text","text":{"pi":"Sādhu kho, mārisa moggallāna, saṅghe aveccappasādena samannāgamanaṁ hoti:\n‘suppaṭipanno bhagavato sāvakasaṅgho …pe… anuttaraṁ puññakkhettaṁ lokassā’ti.\nSaṅghe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā …pe… dibbehi phoṭṭhabbehi."}},{"id":"sn40.10:54","sourceIds":["sn40.10:54.1","sn40.10:54.2","sn40.10:54.3","sn40.10:54.4","sn40.10:54.5"],"kind":"text","text":{"pi":"Sādhu kho, mārisa moggallāna, ariyakantehi sīlehi samannāgamanaṁ hoti akhaṇḍehi …pe… samādhisaṁvattanikehi.\nAriyakantehi sīlehi samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.\nTe aññe deve dasahi ṭhānehi adhigaṇhanti—\ndibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehī”ti.\nDasamaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn40.10/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}