{"id":"sn42.11","title":"With Bhadraka","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn42.11","title":"With Bhadraka","units":[{"id":"sn42.11:0","sourceIds":["sn42.11:0.1","sn42.11:0.2","sn42.11:0.3"],"kind":"text","text":{"pi":"Saṁyutta Nikāya 42.11\n1. Gāmaṇivagga\nBhadrakasutta","en":"Linked Discourses 42.11\n1. Chiefs\nWith Bhadraka"}},{"id":"sn42.11:1","sourceIds":["sn42.11:1.1","sn42.11:1.2","sn42.11:1.3","sn42.11:1.4","sn42.11:1.5","sn42.11:1.6","sn42.11:1.7","sn42.11:1.8","sn42.11:1.9","sn42.11:1.10","sn42.11:1.11"],"kind":"text","text":{"pi":"Ekaṁ samayaṁ bhagavā mallesu viharati uruvelakappaṁ nāma mallānaṁ nigamo.\nAtha kho bhadrako gāmaṇi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho bhadrako gāmaṇi bhagavantaṁ etadavoca:\n“sādhu me, bhante, bhagavā dukkhassa samudayañca atthaṅgamañca desetū”ti.\n“Ahañce te, gāmaṇi, atītamaddhānaṁ ārabbha dukkhassa samudayañca atthaṅgamañca deseyyaṁ:\n‘evaṁ ahosi atītamaddhānan’ti, tatra te siyā kaṅkhā, siyā vimati.\nAhañce te, gāmaṇi, anāgatamaddhānaṁ ārabbha dukkhassa samudayañca atthaṅgamañca deseyyaṁ:\n‘evaṁ bhavissati anāgatamaddhānan’ti, tatrāpi te siyā kaṅkhā, siyā vimati.\nApi cāhaṁ, gāmaṇi, idheva nisinno ettheva te nisinnassa dukkhassa samudayañca atthaṅgamañca desessāmi.\nTaṁ suṇāhi, sādhukaṁ manasi karohi; bhāsissāmī”ti.\n“Evaṁ, bhante”ti kho bhadrako gāmaṇi bhagavato paccassosi.\nBhagavā etadavoca:","en":"At one time the Buddha was staying in the land of the Mallas, near the Mallian town named Uruvelakappa.\nThen Bhadraka the village chief went up to the Buddha, bowed, sat down to one side, and said to him:\n“Please, sir, let the Blessed One teach me the origin and disappearance of suffering.”\n“Chief, if I were to teach you about the origin and disappearance of suffering in connection with the past, saying\n‘this is how it was in the past,’ you might have doubts or uncertainties about that.\nIf I were to teach you about the origin and disappearance of suffering in connection with the future, saying\n‘this is how it will be in the future,’ you might have doubts or uncertainties about that.\nRather, chief, I will teach you about the origin and disappearance of suffering as I am sitting right here and you are sitting right there.\nListen and apply your mind well, I will speak.”\n“Yes, sir,” Bhadraka replied.\nThe Buddha said this:"}},{"id":"sn42.11:2","sourceIds":["sn42.11:2.1","sn42.11:2.2","sn42.11:2.3","sn42.11:2.4","sn42.11:2.5","sn42.11:2.6","sn42.11:2.7","sn42.11:2.8","sn42.11:2.9","sn42.11:2.10","sn42.11:2.11","sn42.11:2.12","sn42.11:2.13","sn42.11:2.14","sn42.11:2.15","sn42.11:2.16","sn42.11:2.17","sn42.11:2.18","sn42.11:2.19","sn42.11:2.20","sn42.11:2.21","sn42.11:2.22"],"kind":"text","text":{"pi":"“Taṁ kiṁ maññasi, gāmaṇi,\natthi te uruvelakappe manussā yesaṁ te vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?\n“Atthi me, bhante, uruvelakappe manussā yesaṁ me vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti.\n“Atthi pana te, gāmaṇi, uruvelakappe manussā yesaṁ te vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā”ti?\n“Atthi me, bhante, uruvelakappe manussā yesaṁ me vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā”ti.\n“Ko nu kho, gāmaṇi, hetu, ko paccayo yena te ekaccānaṁ uruvelakappiyānaṁ manussānaṁ vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?\n“Yesaṁ me, bhante, uruvelakappiyānaṁ manussānaṁ vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā, atthi me tesu chandarāgo.\nYesaṁ pana, bhante, uruvelakappiyānaṁ manussānaṁ vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā, natthi me tesu chandarāgo”ti.\n“Iminā tvaṁ, gāmaṇi, dhammena diṭṭhena viditena akālikena pattena pariyogāḷhena atītānāgate nayaṁ nehi:\n‘yaṁ kho kiñci atītamaddhānaṁ dukkhaṁ uppajjamānaṁ uppajji sabbaṁ taṁ chandamūlakaṁ chandanidānaṁ.\nChando hi mūlaṁ dukkhassa.\nYampi hi kiñci anāgatamaddhānaṁ dukkhaṁ uppajjamānaṁ uppajjissati, sabbaṁ taṁ chandamūlakaṁ chandanidānaṁ.\nChando hi mūlaṁ dukkhassā’”ti.\n“Acchariyaṁ, bhante, abbhutaṁ, bhante.\nYāva subhāsitañcidaṁ, bhante, bhagavatā:\n‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.\nChando hi mūlaṁ dukkhassā’ti.\nAtthi me, bhante, ciravāsī nāma kumāro bahi āvasathe paṭivasati.\nSo khvāhaṁ, bhante, kālasseva vuṭṭhāya purisaṁ uyyojemi:\n‘gaccha, bhaṇe, ciravāsiṁ kumāraṁ jānāhī’ti.\nYāvakīvañca, bhante, so puriso nāgacchati, tassa me hoteva aññathattaṁ:\n‘mā heva ciravāsissa kumārassa kiñci ābādhayitthā’”ti.","en":"“What do you think, chief?\nAre there any people here in Uruvelakappa who, if they were executed, imprisoned, fined, or condemned, it would cause you sorrow, lamentation, pain, sadness, and distress?”\n“There are, sir.”\n“But are there any people here in Uruvelakappa who, if they were executed, imprisoned, fined, or condemned, it would not cause you sorrow, lamentation, pain, sadness, and distress?”\n“There are, sir.”\n“What’s the cause, chief, what’s the reason why, if this was to happen to some people it could cause you sorrow, while if it happens to others it does not?”\n“The people regarding whom this would give rise to sorrow are those I have desire and passion.\nThe people regarding whom this would not give rise to sorrow are those I don’t have desire and passion.”\n“With this present phenomenon that you have seen, understood, immediately attained, and fathomed, you can apply the same method to the past and future:\n‘All the suffering that arose in the past was rooted and sourced in desire.\nFor desire is the root of suffering.\nAll the suffering that will arise in the future will be rooted and sourced in desire.\nFor desire is the root of suffering.’”\n“It’s incredible, sir, it’s amazing!\nHow well said this was by the Buddha!\n‘All the suffering that arises is rooted and sourced in desire.\nFor desire is the root of suffering.’\nI have a boy called Ciravāsi, who resides in a house away from here.\nI rise early and dispatch someone, saying:\n‘Go, lad, and check on my boy Ciravāsi.’\nUntil they get back I worry:\n‘I hope nothing’s wrong with Ciravāsi!’”"}},{"id":"sn42.11:3","sourceIds":["sn42.11:3.1","sn42.11:3.2","sn42.11:3.3","sn42.11:3.4","sn42.11:3.5","sn42.11:3.6"],"kind":"text","text":{"pi":"“Taṁ kiṁ maññasi, gāmaṇi,\nciravāsissa kumārassa vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?\n“Ciravāsissa me, bhante, kumārassa vadhena vā bandhena vā jāniyā vā garahāya vā jīvitassapi siyā aññathattaṁ, kiṁ pana me nuppajjissanti sokaparidevadukkhadomanassupāyāsā”ti.\n“Imināpi kho etaṁ, gāmaṇi, pariyāyena veditabbaṁ:\n‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.\nChando hi mūlaṁ dukkhassā’ti.","en":"“What do you think, chief?\nIf Ciravāsi was executed, imprisoned, fined, or condemned, would it cause you sorrow, lamentation, pain, sadness, and distress?”\n“How could it not, sir?”\n“This too is a way to understand:\n‘All the suffering that arises is rooted and sourced in desire.\nFor desire is the root of suffering.’"}},{"id":"sn42.11:4","sourceIds":["sn42.11:4.1","sn42.11:4.2","sn42.11:4.3","sn42.11:4.4","sn42.11:4.5","sn42.11:4.6"],"kind":"text","text":{"pi":"Taṁ kiṁ maññasi, gāmaṇi,\nyadā te ciravāsimātā adiṭṭhā ahosi, assutā ahosi, te ciravāsimātuyā chando vā rāgo vā pemaṁ vā”ti?\n“No hetaṁ, bhante”.\n“Dassanaṁ vā te, gāmaṇi, āgamma savanaṁ vā evaṁ te ahosi:\n‘ciravāsimātuyā chando vā rāgo vā pemaṁ vā’”ti?\n“Evaṁ, bhante”.","en":"What do you think, chief?\nBefore you’d seen or heard of Ciravāsi’s mother, did you have any desire or passion or fondness for her?”\n“No, sir.”\n“Then was it because you saw or heard of her that you had\ndesire or passion or fondness for her?”\n“Yes, sir.”"}},{"id":"sn42.11:5","sourceIds":["sn42.11:5.1","sn42.11:5.2","sn42.11:5.3","sn42.11:5.4","sn42.11:5.5","sn42.11:5.6","sn42.11:5.7"],"kind":"text","text":{"pi":"“Taṁ kiṁ maññasi, gāmaṇi,\nciravāsimātuyā te vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?\n“Ciravāsimātuyā me, bhante, vadhena vā bandhena vā jāniyā vā garahāya vā jīvitassapi siyā aññathattaṁ, kiṁ pana me nuppajjissanti sokaparidevadukkhadomanassupāyāsā”ti.\n“Imināpi kho etaṁ, gāmaṇi, pariyāyena veditabbaṁ:\n‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.\nChando hi mūlaṁ dukkhassā’”ti.\nEkādasamaṁ.","en":"“What do you think, chief?\nIf Ciravāsi’s mother was executed, imprisoned, fined, or condemned, would it cause you sorrow, lamentation, pain, sadness, and distress?”\n“How could it not, sir?”\n“This too is a way to understand:\n‘All the suffering that arises is rooted and sourced in desire.\nFor desire is the root of suffering.’”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn42.11/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}