{"id":"sn46.3","title":"Ethics","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn46.3","title":"Ethics","units":[{"id":"sn46.3:0","sourceIds":["sn46.3:0.1","sn46.3:0.2","sn46.3:0.3"],"kind":"text","text":{"pi":"Saṁyutta Nikāya 46.3\n1. Pabbatavagga\nSīlasutta","en":"Linked Discourses 46.3\n1. Mountains\nEthics"}},{"id":"sn46.3:1","sourceIds":["sn46.3:1.1","sn46.3:1.2","sn46.3:1.3","sn46.3:1.4","sn46.3:1.5","sn46.3:1.6","sn46.3:1.7","sn46.3:1.8","sn46.3:1.9"],"kind":"text","text":{"pi":"“Ye te, bhikkhave, bhikkhū sīlasampannā samādhisampannā ñāṇasampannā vimuttisampannā vimuttiñāṇadassanasampannā, dassanampāhaṁ, bhikkhave, tesaṁ bhikkhūnaṁ bahukāraṁ vadāmi;\nsavanampāhaṁ, bhikkhave, tesaṁ bhikkhūnaṁ bahukāraṁ vadāmi;\nupasaṅkamanampāhaṁ, bhikkhave, tesaṁ bhikkhūnaṁ bahukāraṁ vadāmi;\npayirupāsanampāhaṁ, bhikkhave, tesaṁ bhikkhūnaṁ bahukāraṁ vadāmi;\nanussatimpāhaṁ, bhikkhave, tesaṁ bhikkhūnaṁ bahukāraṁ vadāmi;\nanupabbajjampāhaṁ, bhikkhave, tesaṁ bhikkhūnaṁ bahukāraṁ vadāmi.\nTaṁ kissa hetu?\nTathārūpānaṁ, bhikkhave, bhikkhūnaṁ dhammaṁ sutvā dvayena vūpakāsena vūpakaṭṭho viharati—kāyavūpakāsena ca cittavūpakāsena ca.\nSo tathā vūpakaṭṭho viharanto taṁ dhammaṁ anussarati anuvitakketi.","en":"“Mendicants, when a mendicant is accomplished in ethics, immersion, knowledge, freedom, or the knowledge and vision of freedom, even the sight of them is very helpful, I say.\nEven to hear them,\napproach them,\npay homage to them,\nrecollect them,\nor go forth following them is very helpful, I say.\nWhy is that?\nBecause after hearing the teaching of such mendicants, a mendicant will live withdrawn in both body and mind,\nas they recollect and think about that teaching."}},{"id":"sn46.3:2","sourceIds":["sn46.3:2.1","sn46.3:2.2","sn46.3:2.3","sn46.3:2.4"],"kind":"text","text":{"pi":"Yasmiṁ samaye, bhikkhave, bhikkhu tathā vūpakaṭṭho viharanto taṁ dhammaṁ anussarati anuvitakketi, satisambojjhaṅgo tasmiṁ samaye bhikkhuno āraddho hoti;\nsatisambojjhaṅgaṁ tasmiṁ samaye bhikkhu bhāveti;\nsatisambojjhaṅgo tasmiṁ samaye bhikkhuno bhāvanāpāripūriṁ gacchati.\nSo tathā sato viharanto taṁ dhammaṁ paññāya pavicinati pavicarati parivīmaṁsamāpajjati.","en":"At such a time, a mendicant has initiated the awakening factor of mindfulness;\nthey develop it\nand perfect it.\nAs they live mindfully in this way they investigate, explore, and inquire into that teaching with wisdom."}},{"id":"sn46.3:3","sourceIds":["sn46.3:3.1","sn46.3:3.2","sn46.3:3.3","sn46.3:3.4"],"kind":"text","text":{"pi":"Yasmiṁ samaye, bhikkhave, bhikkhu tathā sato viharanto taṁ dhammaṁ paññāya pavicinati pavicarati parivīmaṁsamāpajjati, dhammavicayasambojjhaṅgo tasmiṁ samaye bhikkhuno āraddho hoti;\ndhammavicayasambojjhaṅgaṁ tasmiṁ samaye bhikkhu bhāveti;\ndhammavicayasambojjhaṅgo tasmiṁ samaye bhikkhuno bhāvanāpāripūriṁ gacchati.\nTassa taṁ dhammaṁ paññāya pavicinato pavicarato parivīmaṁsamāpajjato āraddhaṁ hoti vīriyaṁ asallīnaṁ.","en":"At such a time, a mendicant has initiated the awakening factor of investigation of principles;\nthey develop it\nand perfect it.\nAs they investigate principles with wisdom in this way their energy is roused up and unflagging."}},{"id":"sn46.3:4","sourceIds":["sn46.3:4.1","sn46.3:4.2"],"kind":"text","text":{"pi":"Yasmiṁ samaye, bhikkhave, bhikkhuno taṁ dhammaṁ paññāya pavicinato pavicarato parivīmaṁsamāpajjato āraddhaṁ hoti vīriyaṁ asallīnaṁ, vīriyasambojjhaṅgo tasmiṁ samaye bhikkhuno āraddho hoti; vīriyasambojjhaṅgaṁ tasmiṁ samaye bhikkhu bhāveti; vīriyasambojjhaṅgo tasmiṁ samaye bhikkhuno bhāvanāpāripūriṁ gacchati.\nĀraddhavīriyassa uppajjati pīti nirāmisā.","en":"At such a time, a mendicant has initiated the awakening factor of energy; they develop it and perfect it.\nWhen they’re energetic, rapture not of the flesh arises."}},{"id":"sn46.3:5","sourceIds":["sn46.3:5.1","sn46.3:5.2"],"kind":"text","text":{"pi":"Yasmiṁ samaye, bhikkhave, bhikkhuno āraddhavīriyassa uppajjati pīti nirāmisā, pītisambojjhaṅgo tasmiṁ samaye bhikkhuno āraddho hoti; pītisambojjhaṅgaṁ tasmiṁ samaye bhikkhu bhāveti; pītisambojjhaṅgo tasmiṁ samaye bhikkhuno bhāvanāpāripūriṁ gacchati.\nPītimanassa kāyopi passambhati, cittampi passambhati.","en":"At such a time, a mendicant has initiated the awakening factor of rapture; they develop it and perfect it.\nWhen the mind is full of rapture, the body and mind become tranquil."}},{"id":"sn46.3:6","sourceIds":["sn46.3:6.1","sn46.3:6.2"],"kind":"text","text":{"pi":"Yasmiṁ samaye, bhikkhave, bhikkhuno pītimanassa kāyopi passambhati cittampi passambhati, passaddhisambojjhaṅgo tasmiṁ samaye bhikkhuno āraddho hoti; passaddhisambojjhaṅgaṁ tasmiṁ samaye bhikkhu bhāveti; passaddhisambojjhaṅgo tasmiṁ samaye bhikkhuno bhāvanāpāripūriṁ gacchati.\nPassaddhakāyassa sukhino cittaṁ samādhiyati.","en":"At such a time, a mendicant has initiated the awakening factor of tranquility; they develop it and perfect it.\nWhen the body is tranquil and one feels bliss, the mind becomes immersed in samādhi."}},{"id":"sn46.3:7","sourceIds":["sn46.3:7.1","sn46.3:7.2"],"kind":"text","text":{"pi":"Yasmiṁ samaye, bhikkhave, bhikkhuno passaddhakāyassa sukhino cittaṁ samādhiyati, samādhisambojjhaṅgo tasmiṁ samaye bhikkhuno āraddho hoti; samādhisambojjhaṅgaṁ tasmiṁ samaye bhikkhu bhāveti; samādhisambojjhaṅgo tasmiṁ samaye bhikkhuno bhāvanāpāripūriṁ gacchati.\nSo tathāsamāhitaṁ cittaṁ sādhukaṁ ajjhupekkhitā hoti.","en":"At such a time, a mendicant has initiated the awakening factor of immersion; they develop it and perfect it.\nThey closely watch over that mind immersed in samādhi."}},{"id":"sn46.3:8","sourceIds":["sn46.3:8.1"],"kind":"text","text":{"pi":"Yasmiṁ samaye, bhikkhave, bhikkhu tathāsamāhitaṁ cittaṁ sādhukaṁ ajjhupekkhitā hoti, upekkhāsambojjhaṅgo tasmiṁ samaye bhikkhuno āraddho hoti; upekkhāsambojjhaṅgaṁ tasmiṁ samaye bhikkhu bhāveti; upekkhāsambojjhaṅgo tasmiṁ samaye bhikkhuno bhāvanāpāripūriṁ gacchati.","en":"At such a time, a mendicant has initiated the awakening factor of equanimity; they develop it and perfect it."}},{"id":"sn46.3:9","sourceIds":["sn46.3:9.1","sn46.3:9.2","sn46.3:9.3","sn46.3:9.4","sn46.3:9.5","sn46.3:9.6","sn46.3:9.7","sn46.3:9.8","sn46.3:9.9","sn46.3:9.10","sn46.3:9.11"],"kind":"text","text":{"pi":"Evaṁ bhāvitesu kho, bhikkhave, sattasu sambojjhaṅgesu evaṁ bahulīkatesu satta phalā sattānisaṁsā pāṭikaṅkhā.\nKatame satta phalā sattānisaṁsā?\nDiṭṭheva dhamme paṭikacca aññaṁ ārādheti.\nNo ce diṭṭheva dhamme paṭikacca aññaṁ ārādheti, atha maraṇakāle aññaṁ ārādheti.\nNo ce diṭṭheva dhamme paṭikacca aññaṁ ārādheti, no ce maraṇakāle aññaṁ ārādheti, atha pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.\nNo ce diṭṭheva dhamme paṭikacca aññaṁ ārādheti, no ce maraṇakāle aññaṁ ārādheti, no ce pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti, atha pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti.\nNo ce diṭṭheva dhamme paṭikacca aññaṁ ārādheti, no ce maraṇakāle aññaṁ ārādheti, no ce pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti, no ce pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti, atha pañcannaṁ orambhāgiyānaṁ saṁyojanānaṁ parikkhayā asaṅkhāraparinibbāyī hoti.\nNo ce diṭṭheva dhamme paṭikacca aññaṁ ārādheti, no ce maraṇakāle aññaṁ ārādheti, no ce pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti, no ce pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti, no ce pañcannaṁ orambhāgiyānaṁ saṁyojanānaṁ parikkhayā asaṅkhāraparinibbāyī hoti, atha pañcannaṁ orambhāgiyānaṁ saṁyojanānaṁ parikkhayā sasaṅkhāraparinibbāyī hoti.\nNo ce diṭṭheva dhamme paṭikacca aññaṁ ārādheti, no ce maraṇakāle aññaṁ ārādheti, no ce pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti, no ce pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti, no ce pañcannaṁ orambhāgiyānaṁ saṁyojanānaṁ parikkhayā asaṅkhāraparinibbāyī hoti, no ce pañcannaṁ orambhāgiyānaṁ saṁyojanānaṁ parikkhayā sasaṅkhāraparinibbāyī hoti, atha pañcannaṁ orambhāgiyānaṁ saṁyojanānaṁ parikkhayā uddhaṁsoto hoti akaniṭṭhagāmī.\nEvaṁ bhāvitesu kho, bhikkhave, sattasu bojjhaṅgesu evaṁ bahulīkatesu ime satta phalā sattānisaṁsā pāṭikaṅkhā”ti.\nTatiyaṁ.","en":"When the seven awakening factors are developed and cultivated in this way they can expect seven fruits and benefits.\nWhat seven?\nThey attain enlightenment early on in this very life.\nIf not, they attain enlightenment at the time of death.\nIf not, with the ending of the five lower fetters, they’re extinguished between one life and the next.\nIf not, with the ending of the five lower fetters they’re extinguished upon landing.\nIf not, with the ending of the five lower fetters they’re extinguished without extra effort.\nIf not, with the ending of the five lower fetters they’re extinguished with extra effort.\nIf not, with the ending of the five lower fetters they head upstream, going to the Akaniṭṭha realm.\nWhen the seven awakening factors are developed and cultivated in this way these are the seven fruits and benefits they can expect.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn46.3/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}