{"id":"sn54.16","title":"Several Mendicants (2nd)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"sn54.16","title":"Several Mendicants (2nd)","units":[{"id":"sn54.16:0","sourceIds":["sn54.16:0.1","sn54.16:0.2","sn54.16:0.3"],"kind":"text","text":{"pi":"Saṁyutta Nikāya 54.16\n2. Dutiyavagga\nDutiyabhikkhusutta","en":"Linked Discourses 54.16\nChapter Two\nSeveral Mendicants (2nd)"}},{"id":"sn54.16:1","sourceIds":["sn54.16:1.1","sn54.16:1.2","sn54.16:1.3","sn54.16:1.4"],"kind":"text","text":{"pi":"Atha kho sambahulā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinne kho te bhikkhū bhagavā etadavoca:\n“atthi nu kho, bhikkhave, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā satta dhamme paripūrenti, satta dhammā bhāvitā bahulīkatā dve dhamme paripūrentī”ti?\n“Bhagavaṁmūlakā no, bhante, dhammā …pe… bhagavato sutvā bhikkhū dhāressantī”ti.\n“Atthi, bhikkhave, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā satta dhamme paripūrenti, satta dhammā bhāvitā bahulīkatā dve dhamme paripūrenti.","en":"Then several mendicants went up to the Buddha, bowed, and sat down to one side. The Buddha said to them:\n“Mendicants, is there one thing that, when developed and cultivated, fulfills four things; and those four things, when developed and cultivated, fulfill seven things; and those seven things, when developed and cultivated, fulfill two things?”\n“Our teachings are rooted in the Buddha. …”\n“There is, mendicants."}},{"id":"sn54.16:2","sourceIds":["sn54.16:2.1","sn54.16:2.2"],"kind":"text","text":{"pi":"Katamo ca, bhikkhave, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā satta dhamme paripūrenti, satta dhammā bhāvitā bahulīkatā dve dhamme paripūrenti?\nĀnāpānassatisamādhi, bhikkhave, ekadhammo bhāvito bahulīkato cattāro satipaṭṭhāne paripūreti, cattāro satipaṭṭhānā bhāvitā bahulīkatā satta bojjhaṅge paripūrenti, satta bojjhaṅgā bhāvitā bahulīkatā vijjāvimuttiṁ paripūrentīti.","en":"And what is that one thing?\nImmersion due to mindfulness of breathing is one thing that, when developed and cultivated, fulfills the four kinds of mindfulness meditation. And the four kinds of mindfulness meditation, when developed and cultivated, fulfill the seven awakening factors. And the seven awakening factors, when developed and cultivated, fulfill knowledge and freedom."}},{"id":"sn54.16:3","sourceIds":["sn54.16:3.1","sn54.16:3.2","sn54.16:3.3","sn54.16:3.4"],"kind":"text","text":{"pi":"Kathaṁ bhāvito ca, bhikkhave, ānāpānassatisamādhi kathaṁ bahulīkato cattāro satipaṭṭhāne paripūreti?\nIdha, bhikkhave, bhikkhu araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.\nSo satova assasati, satova passasati …pe…\n‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati.","en":"And how is mindfulness of breathing developed and cultivated so as to fulfill the four kinds of mindfulness meditation?\nIt’s when a mendicant—gone to a wilderness, or to the root of a tree, or to an empty hut—sits down cross-legged, sets their body straight, and brings mindfulness to the present. …"}},{"id":"sn54.16:4","sourceIds":["sn54.16:4.1","sn54.16:4.2","sn54.16:4.3","sn54.16:4.4","sn54.16:4.5","sn54.16:4.6","sn54.16:4.7"],"kind":"text","text":{"pi":"Yasmiṁ samaye, bhikkhave, bhikkhu dīghaṁ vā assasanto ‘dīghaṁ assasāmī’ti pajānāti, dīghaṁ vā passasanto ‘dīghaṁ passasāmī’ti pajānāti, rassaṁ vā assasanto ‘rassaṁ assasāmī’ti pajānāti …pe…\nsabbakāyappaṭisaṁvedī …pe…\n‘passambhayaṁ kāyasaṅkhāraṁ assasissāmī’ti sikkhati, ‘passambhayaṁ kāyasaṅkhāraṁ passasissāmī’ti sikkhati—\nkāye kāyānupassī, bhikkhave, bhikkhu tasmiṁ samaye viharati ātāpī sampajāno satimā, vineyya loke abhijjhādomanassaṁ.\nTaṁ kissa hetu?\nKāyaññatarāhaṁ, bhikkhave, etaṁ vadāmi, yadidaṁ—assāsapassāsaṁ.\nTasmātiha, bhikkhave, kāye kāyānupassī bhikkhu tasmiṁ samaye viharati ātāpī sampajāno satimā, vineyya loke abhijjhādomanassaṁ."}},{"id":"sn54.16:5","sourceIds":["sn54.16:5.1","sn54.16:5.2","sn54.16:5.3","sn54.16:5.4","sn54.16:5.5","sn54.16:5.6","sn54.16:5.7","sn54.16:5.8"],"kind":"text","text":{"pi":"Yasmiṁ samaye, bhikkhave, bhikkhu pītippaṭisaṁvedī …pe…\nsukhappaṭisaṁvedī …\ncittasaṅkhārappaṭisaṁvedī …\n‘passambhayaṁ cittasaṅkhāraṁ assasissāmī’ti sikkhati, ‘passambhayaṁ cittasaṅkhāraṁ passasissāmī’ti sikkhati—\nvedanāsu vedanānupassī, bhikkhave, bhikkhu tasmiṁ samaye viharati ātāpī sampajāno satimā, vineyya loke abhijjhādomanassaṁ.\nTaṁ kissa hetu?\nVedanāññatarāhaṁ, bhikkhave, etaṁ vadāmi, yadidaṁ—assāsapassāsānaṁ sādhukaṁ manasikāraṁ.\nTasmātiha, bhikkhave, vedanāsu vedanānupassī bhikkhu tasmiṁ samaye viharati ātāpī sampajāno satimā, vineyya loke abhijjhādomanassaṁ."}},{"id":"sn54.16:6","sourceIds":["sn54.16:6.1","sn54.16:6.2","sn54.16:6.3","sn54.16:6.4","sn54.16:6.5","sn54.16:6.6","sn54.16:6.7","sn54.16:6.8"],"kind":"text","text":{"pi":"Yasmiṁ samaye, bhikkhave, bhikkhu cittappaṭisaṁvedī …pe…\nabhippamodayaṁ cittaṁ …pe…\n‘samādahaṁ cittaṁ assasissāmī’ti sikkhati, ‘samādahaṁ cittaṁ passasissāmī’ti sikkhati;\n‘vimocayaṁ cittaṁ assasissāmī’ti sikkhati, ‘vimocayaṁ cittaṁ passasissāmī’ti sikkhati—\ncitte cittānupassī, bhikkhave, bhikkhu tasmiṁ samaye viharati ātāpī sampajāno satimā, vineyya loke abhijjhādomanassaṁ.\nTaṁ kissa hetu?\nNāhaṁ, bhikkhave, muṭṭhassatissa asampajānassa ānāpānassatisamādhibhāvanaṁ vadāmi.\nTasmātiha, bhikkhave, citte cittānupassī bhikkhu tasmiṁ samaye viharati ātāpī sampajāno satimā, vineyya loke abhijjhādomanassaṁ."}},{"id":"sn54.16:7","sourceIds":["sn54.16:7.1","sn54.16:7.2","sn54.16:7.3","sn54.16:7.4","sn54.16:7.5","sn54.16:7.6","sn54.16:7.7"],"kind":"text","text":{"pi":"Yasmiṁ samaye, bhikkhave, bhikkhu aniccānupassī …pe…\nvirāgānupassī …pe…\nnirodhānupassī …pe…\n‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati—\ndhammesu dhammānupassī, bhikkhave, bhikkhu tasmiṁ samaye viharati ātāpī sampajāno satimā, vineyya loke abhijjhādomanassaṁ.\nSo yaṁ taṁ hoti abhijjhādomanassānaṁ pahānaṁ taṁ paññāya disvā sādhukaṁ ajjhupekkhitā hoti.\nTasmātiha, bhikkhave, dhammesu dhammānupassī bhikkhu tasmiṁ samaye viharati ātāpī sampajāno satimā, vineyya loke abhijjhādomanassaṁ."}},{"id":"sn54.16:8","sourceIds":["sn54.16:8.1"],"kind":"text","text":{"pi":"Evaṁ bhāvito kho, bhikkhave, ānāpānassatisamādhi evaṁ bahulīkato cattāro satipaṭṭhāne paripūreti."}},{"id":"sn54.16:9","sourceIds":["sn54.16:9.1","sn54.16:9.2","sn54.16:9.3","sn54.16:9.4"],"kind":"text","text":{"pi":"Kathaṁ bhāvitā ca, bhikkhave, cattāro satipaṭṭhānā kathaṁ bahulīkatā satta bojjhaṅge paripūrenti?\nYasmiṁ samaye, bhikkhave, bhikkhu kāye kāyānupassī viharati—upaṭṭhitāssa tasmiṁ samaye bhikkhuno sati hoti asammuṭṭhā.\nYasmiṁ samaye, bhikkhave, bhikkhuno upaṭṭhitā sati asammuṭṭhā—\nsatisambojjhaṅgo tasmiṁ samaye bhikkhuno āraddho hoti, satisambojjhaṅgaṁ tasmiṁ samaye bhikkhu bhāveti, satisambojjhaṅgo tasmiṁ samaye bhikkhuno bhāvanāpāripūriṁ gacchati."}},{"id":"sn54.16:10","sourceIds":["sn54.16:10.1","sn54.16:10.2","sn54.16:10.3"],"kind":"text","text":{"pi":"So tathāsato viharanto taṁ dhammaṁ paññāya pavicinati pavicarati parivīmaṁsamāpajjati.\nYasmiṁ samaye, bhikkhave, bhikkhu tathāsato viharanto taṁ dhammaṁ paññāya pavicinati pavicarati parivīmaṁsamāpajjati—\ndhammavicayasambojjhaṅgo tasmiṁ samaye bhikkhuno āraddho hoti, dhammavicayasambojjhaṅgaṁ tasmiṁ samaye bhikkhu bhāveti, dhammavicayasambojjhaṅgo tasmiṁ samaye bhikkhuno bhāvanāpāripūriṁ gacchati."}},{"id":"sn54.16:11","sourceIds":["sn54.16:11.1","sn54.16:11.2","sn54.16:11.3"],"kind":"text","text":{"pi":"Tassa taṁ dhammaṁ paññāya pavicinato pavicarato parivīmaṁsamāpajjato āraddhaṁ hoti vīriyaṁ asallīnaṁ.\nYasmiṁ samaye, bhikkhave, bhikkhuno taṁ dhammaṁ paññāya pavicinato pavicarato parivīmaṁsamāpajjato āraddhaṁ hoti vīriyaṁ asallīnaṁ—\nvīriyasambojjhaṅgo tasmiṁ samaye bhikkhuno āraddho hoti, vīriyasambojjhaṅgaṁ tasmiṁ samaye bhikkhu bhāveti, vīriyasambojjhaṅgo tasmiṁ samaye bhikkhuno bhāvanāpāripūriṁ gacchati."}},{"id":"sn54.16:12","sourceIds":["sn54.16:12.1","sn54.16:12.2","sn54.16:12.3"],"kind":"text","text":{"pi":"Āraddhavīriyassa uppajjati pīti nirāmisā.\nYasmiṁ samaye, bhikkhave, bhikkhuno āraddhavīriyassa uppajjati pīti nirāmisā—\npītisambojjhaṅgo tasmiṁ samaye bhikkhuno āraddho hoti, pītisambojjhaṅgaṁ tasmiṁ samaye bhikkhu bhāveti, pītisambojjhaṅgo tasmiṁ samaye bhikkhuno bhāvanāpāripūriṁ gacchati."}},{"id":"sn54.16:13","sourceIds":["sn54.16:13.1","sn54.16:13.2","sn54.16:13.3"],"kind":"text","text":{"pi":"Pītimanassa kāyopi passambhati, cittampi passambhati.\nYasmiṁ samaye, bhikkhave, bhikkhuno pītimanassa kāyopi passambhati, cittampi passambhati—\npassaddhisambojjhaṅgo tasmiṁ samaye bhikkhuno āraddho hoti, passaddhisambojjhaṅgaṁ tasmiṁ samaye bhikkhu bhāveti, passaddhisambojjhaṅgo tasmiṁ samaye bhikkhuno bhāvanāpāripūriṁ gacchati."}},{"id":"sn54.16:14","sourceIds":["sn54.16:14.1","sn54.16:14.2","sn54.16:14.3"],"kind":"text","text":{"pi":"Passaddhakāyassa sukhino cittaṁ samādhiyati.\nYasmiṁ samaye, bhikkhave, bhikkhuno passaddhakāyassa sukhino cittaṁ samādhiyati—\nsamādhisambojjhaṅgo tasmiṁ samaye bhikkhuno āraddho hoti, samādhisambojjhaṅgaṁ tasmiṁ samaye bhikkhu bhāveti, samādhisambojjhaṅgo tasmiṁ samaye bhikkhuno bhāvanāpāripūriṁ gacchati."}},{"id":"sn54.16:15","sourceIds":["sn54.16:15.1","sn54.16:15.2","sn54.16:15.3"],"kind":"text","text":{"pi":"So tathāsamāhitaṁ cittaṁ sādhukaṁ ajjhupekkhitā hoti.\nYasmiṁ samaye, bhikkhave, bhikkhu tathāsamāhitaṁ cittaṁ sādhukaṁ ajjhupekkhitā hoti—\nupekkhāsambojjhaṅgo tasmiṁ samaye bhikkhuno āraddho hoti, upekkhāsambojjhaṅgaṁ tasmiṁ samaye bhikkhu bhāveti, upekkhāsambojjhaṅgo tasmiṁ samaye bhikkhuno bhāvanāpāripūriṁ gacchati."}},{"id":"sn54.16:16","sourceIds":["sn54.16:16.1","sn54.16:16.2","sn54.16:16.3","sn54.16:16.4","sn54.16:16.5"],"kind":"text","text":{"pi":"Yasmiṁ samaye, bhikkhave, bhikkhu vedanāsu …pe…\ncitte …pe…\ndhammesu dhammānupassī viharati—upaṭṭhitāssa tasmiṁ samaye bhikkhuno sati hoti asammuṭṭhā.\nYasmiṁ samaye, bhikkhave, bhikkhuno upaṭṭhitā sati hoti asammuṭṭhā—\nsatisambojjhaṅgo tasmiṁ samaye bhikkhuno āraddho hoti, satisambojjhaṅgaṁ tasmiṁ samaye bhikkhu bhāveti—satisambojjhaṅgo tasmiṁ samaye bhikkhuno bhāvanāpāripūriṁ gacchati …pe…."}},{"id":"sn54.16:17","sourceIds":["sn54.16:17.1","sn54.16:17.2","sn54.16:17.3","sn54.16:17.4"],"kind":"text","text":{"pi":"So tathāsamāhitaṁ cittaṁ sādhukaṁ ajjhupekkhitā hoti.\nYasmiṁ samaye, bhikkhave, bhikkhu tathāsamāhitaṁ cittaṁ sādhukaṁ ajjhupekkhitā hoti—\nupekkhāsambojjhaṅgo tasmiṁ samaye bhikkhuno āraddho hoti, upekkhāsambojjhaṅgaṁ tasmiṁ samaye bhikkhu bhāveti, upekkhāsambojjhaṅgo tasmiṁ samaye bhikkhuno bhāvanāpāripūriṁ gacchati.\nEvaṁ bhāvitā kho, bhikkhave, cattāro satipaṭṭhānā evaṁ bahulīkatā satta bojjhaṅge paripūrenti."}},{"id":"sn54.16:18","sourceIds":["sn54.16:18.1","sn54.16:18.2","sn54.16:18.3","sn54.16:18.4","sn54.16:18.5","sn54.16:18.6"],"kind":"text","text":{"pi":"Kathaṁ bhāvitā ca, bhikkhave, satta bojjhaṅgā kathaṁ bahulīkatā vijjāvimuttiṁ paripūrenti?\nIdha, bhikkhave, bhikkhu satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ;\ndhammavicayasambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ …pe…\nupekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.\nEvaṁ bhāvitā kho, bhikkhave, satta bojjhaṅgā evaṁ bahulīkatā vijjāvimuttiṁ paripūrentī”ti.\nChaṭṭhaṁ.","en":"That’s how the seven awakening factors are developed and cultivated so as to fulfill knowledge and freedom.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/sn54.16/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}