{"id":"tha-ap523","title":"Tiṇamuṭṭhidāyakattheraapadāna","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"tha-ap523","title":"Tiṇamuṭṭhidāyakattheraapadāna","units":[{"id":"tha-ap523:0","sourceIds":["tha-ap523:0.1","tha-ap523:0.2","tha-ap523:0.3"],"kind":"text","text":{"pi":"Therāpadāna\nTiṇadāyakavagga\nTiṇamuṭṭhidāyakattheraapadāna"}},{"id":"tha-ap523:1","sourceIds":["tha-ap523:1.1","tha-ap523:1.2","tha-ap523:1.3","tha-ap523:1.4"],"kind":"text","text":{"pi":"“Himavantassāvidūre,\nlambako nāma pabbato;\nTattheva tisso sambuddho,\nabbhokāsamhi caṅkami."}},{"id":"tha-ap523:2","sourceIds":["tha-ap523:2.1","tha-ap523:2.2","tha-ap523:2.3","tha-ap523:2.4"],"kind":"text","text":{"pi":"Migaluddo pure āsiṁ,\naraññe kānane ahaṁ;\nDisvāna taṁ devadevaṁ,\ntiṇamuṭṭhimadāsahaṁ."}},{"id":"tha-ap523:3","sourceIds":["tha-ap523:3.1","tha-ap523:3.2","tha-ap523:3.3","tha-ap523:3.4"],"kind":"text","text":{"pi":"Nisīdanatthaṁ buddhassa,\ndatvā cittaṁ pasādayiṁ;\nSambuddhaṁ abhivādetvā,\npakkāmiṁ uttarāmukho."}},{"id":"tha-ap523:4","sourceIds":["tha-ap523:4.1","tha-ap523:4.2","tha-ap523:4.3","tha-ap523:4.4"],"kind":"text","text":{"pi":"Aciraṁ gatamattassa,\nmigarājā apothayi;\nSīhena pothito santo,\ntattha kālaṅkato ahaṁ."}},{"id":"tha-ap523:5","sourceIds":["tha-ap523:5.1","tha-ap523:5.2","tha-ap523:5.3","tha-ap523:5.4"],"kind":"text","text":{"pi":"Āsanne me kataṁ kammaṁ,\nbuddhaseṭṭhe anāsave;\nSumutto saravegova,\ndevalokamagañchahaṁ."}},{"id":"tha-ap523:6","sourceIds":["tha-ap523:6.1","tha-ap523:6.2","tha-ap523:6.3","tha-ap523:6.4"],"kind":"text","text":{"pi":"Yūpo tattha subho āsi,\npuññakammābhinimmito;\nSahassakaṇḍo satabheṇḍu,\ndhajālu haritāmayo."}},{"id":"tha-ap523:7","sourceIds":["tha-ap523:7.1","tha-ap523:7.2","tha-ap523:7.3","tha-ap523:7.4"],"kind":"text","text":{"pi":"Pabhā niddhāvate tassa,\nsataraṁsīva uggato;\nĀkiṇṇo devakaññāhi,\nāmodiṁ kāmakāmihaṁ."}},{"id":"tha-ap523:8","sourceIds":["tha-ap523:8.1","tha-ap523:8.2","tha-ap523:8.3","tha-ap523:8.4"],"kind":"text","text":{"pi":"Devalokā cavitvāna,\nsukkamūlena codito;\nĀgantvāna manussattaṁ,\npattomhi āsavakkhayaṁ."}},{"id":"tha-ap523:9","sourceIds":["tha-ap523:9.1","tha-ap523:9.2","tha-ap523:9.3","tha-ap523:9.4"],"kind":"text","text":{"pi":"Catunnavutito kappe,\nnisīdanamadāsahaṁ;\nDuggatiṁ nābhijānāmi,\ntiṇamuṭṭhe idaṁ phalaṁ."}},{"id":"tha-ap523:10","sourceIds":["tha-ap523:10.1","tha-ap523:10.2","tha-ap523:10.3","tha-ap523:10.4"],"kind":"text","text":{"pi":"Kilesā jhāpitā mayhaṁ,\nbhavā sabbe samūhatā;\nNāgova bandhanaṁ chetvā,\nviharāmi anāsavo."}},{"id":"tha-ap523:11","sourceIds":["tha-ap523:11.1","tha-ap523:11.2","tha-ap523:11.3","tha-ap523:11.4"],"kind":"text","text":{"pi":"Svāgataṁ vata me āsi,\nmama buddhassa santike;\nTisso vijjā anuppattā,\nkataṁ buddhassa sāsanaṁ."}},{"id":"tha-ap523:12","sourceIds":["tha-ap523:12.1","tha-ap523:12.2","tha-ap523:12.3","tha-ap523:12.4"],"kind":"text","text":{"pi":"Paṭisambhidā catasso,\nvimokkhāpi ca aṭṭhime;\nChaḷabhiññā sacchikatā,\nkataṁ buddhassa sāsanaṁ”."}},{"id":"tha-ap523:13","sourceIds":["tha-ap523:13.1"],"kind":"text","text":{"pi":"Itthaṁ sudaṁ āyasmā tiṇamuṭṭhidāyako thero imā gāthāyo abhāsitthāti."}},{"id":"tha-ap523:14","sourceIds":["tha-ap523:14.1"],"kind":"text","text":{"pi":"Tiṇamuṭṭhidāyakattherassāpadānaṁ paṭhamaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/tha-ap523/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}